Sentito (fisiolochía)

De Biquipedia
Ir a la navegación Ir a la búsqueda

Os sentitos son os procesos fisiolochicos de percepción u recepción d'informacions externas y internas per medio de bell organo especializato en ixa función.

Numero y clasificación[editar | editar código]

As diverchencias entre os neurologos a la hora de definir o que constituye un sentito fa que no bi haya consenso firme en o tocant a lo suyo numero. A clasificación tradicional, atribuita a Aristótil, parlaba de cinco sentitos: a vista, l'oída u oyida, o tacto, o fato y o gusto. Manimenos, os humans en poseyen beluns més. Una categorización més reconoixita ta os sentitos humans los clasifica dintro d'as quatre categorías sigüients: fotorrecepción, mecanorrecepción, quimiorrecepción y termorrecepción. Bells animals tamién cuentan con sentitos diferents, como la electrorrecepción.

Coloquialment se charra d'un seiseno sentito, quan como sinonimo d'intuición, quan como bella facultat parafisica indefinita, pero en no tractar-se de garra percepción fisiolochica no puet considerar-se un sentito. De trazas parellanas se parla de sentito común y sentito d'a realidat como sinonimos de "conoiximiento" y d'"esmo", y per extensión, de sentito practico, etc.

Sentitos humans[editar | editar código]

Visión[editar | editar código]

Zonas d'a luenga a on que se troba os gustos:
1) amargo
2) aceto
3) salato
4) dulce

A vista u visión ye a facultat que, per medio d'o cerebro y d'os uellos, permite de detectar as ondas electromagneticas adintro d'o campo de visión (luz) u anviesta. No bi ha alcuerdo en si ista percepción ye feita per un, dos u tres sentitos. Os neuroanatomistas gosan de clasificar-lo como dos sentitos, ya que son dos receptors diferents os responsables d'a percepción d'a color (a freqüencia de fotons de luz) y d'a brilor (amplitut/intensidat - numero de fotons de luz).

A incapacidat de veyer-ie se conoix como ceguera u anopsia.

Audición[editar | editar código]

A 'oída, oyida u audición ye a facultat de percibir o sonito. Como lo sonito ye o conchunto de vibracions que se propagan per l'aire u altros medios, a oída u detección d'istas vibracions ye considerato un sentito mecanico, afín en iste aspecto a lo d'o tacto, encara que un de més especializato. En os humans, d'ista percepción se'n encargan unas fibras u peletz muito chicotz en l'odito interno que perciben o movimiento d'una membrana, a quala vibra en respuesta a cambios en a presión exercita per particulas atmosfericas dintro un radio de 20 ta 22000 Hertz, con importants variacions entre endividos. O sonito tamién puet estar detectato como vibracions per medio d'o tacto. As freqüencias superiors u inferiors a las que pueden sentir-se no pueden detectar-se que per iste medio.

A incapacidat de sentir-ie se conoix como xordera u anacusia.

Gustación[editar | editar código]

O gusto u gustación ye a facultat de percibir sustancias quimicas disueltas, como as que contienen os alimentos. Como bi ha a lo menos quatre tipos de gustos que pueden estar percibitos per a luenga (dulce, salato, agro u aceto, y amargo), bells anatomistas consideran que s'habría de parlar de quatre u més sentitos diferents, ya que cada receptor pareix soministrar información a rechions d'o celebro licherament diferents. Un cinqueno receptor, o que percibe l'acido glutamico u o glutamato, estió confirmato en l'anyo 2000[1] y denominato como umami ("gustoso" en chaponés).

Encara que o vocablo gusto se fa servir a ormino ta indicar a sabor u sapia d'as cosas, scientificament no ha de confundir-se as dos cosas, ya que per "sabor" s'entiende a impresión sensitiva que incluye o sentito d'o fato.

A incapacidat de gustar se conoix como acheusia.

Olfacción[editar | editar código]

O fato u olfacción ye a facultat de percibir os compuestos quimicos conoixitos como olors, per medio de receptors especializatos a ixa fin, como as cabidatz nasals en o caso d'os sers vertebratos. En o celebro, a olfacción ye procesata per o sistema olfactorio.

A incapacidat d'olorar se conoix como anosmia.

Tactación[editar | editar código]

Misacha fendo uso d'o sentito d'a equilibriocepción pa mantener una tenalla sobre a capeza.

O tacto u tactación ye a facultat de percibir a presión, per un regular en a piel. Bi ha diferents rematanzas niervosas que responden a variacions en a presión. Altras percepcions como a termocepción, uei consideratas a parti, s'han asociato per un regular a las sensacions táctils.

A incapacidat de notar ista percepción se conoix como anafia. A falta de percepción sensorial cheneralizata se conoix como anestesia.

Equilibriocepción[editar | editar código]

O equilibrio u equilibriocepción ye a facultat de percibir o movimiento, acceleración y dirección d'un cuerpo, y de mantener o equilibrio d'a posición. Ye o sentito que permite de mantener-se de piet, fer equilibrios u notar l'acceleración d'as cosas u la gravedat terrestre. L'organo d'a equilibriocepción ye o sistema vestibular d'o laberinto, en l'odito interno d'as dos orellas, y ye determinato per o suyo nivel de fluido endolinfatico.

Mareyos, vertigos u desorientacions son alteracions que afectan as funcions d'a equilibriocepción.

Termocepción[editar | editar código]

A termocepción ye a facultat de percibir a calor u l'ausencia de calor (fridor) per medio d'a piel y conductos internos d'a piel. Os termorreceptors d'a piel son prou diferents d'os termorreceptors homeostaticos d'o celebro (hipotalamo), que soministran a información d'a temperatura corporal interna.

Propiocepción[editar | editar código]

A cinestesia u propiocepción ye a facultat de percibir a posición relativa d'as partis d'o cuerpo. Ye o sentito que, per eixemplo, permite de saber mover-se en a escuredat, de tocar-se con un dido a punta d'o naso con os uellos trancatos, u de botar una pilota sin necesidat de mirar-se de contino a posición d'a pilota y d'a man.

A cansera, a desorientación y altros factors pueden alterar temporalment a propiocepción.

Nocicepción[editar | editar código]

A nocicepción, u dolor fisiolochica, ye a facultat de percibir os mals u intencions danyosas en o teixito. Os tres tipos de receptors de dolor son cutanios (piel), somaticos (uesos y chuegos) y viscerals (organos d'o cuerpo). Se gosaba creyer que a dolor yera causata per una sobrecarga d'os receptors d'a presión, pero a investigación fisiolochica d'a primer metat d'o sieglo XX contrimostró que a dolor ye un fenomeno diferenciato que guarda relación con totz os altros sentitos, mesmo lo tacto. D'antis tamién se creyó que se trataba d'una experiencia plenament subchectiva, pero estudios recients[2] indican que a dolor se rechistra en a frontalera d'a circumvolución cingular d'o celebro.

Interocepción[editar | editar código]

A interocepción ye a denominación con que se conoix o conchunto de sentitos internos, estimulatos de normal en o interior d'o cuerpo, y que embrecan muitos receptors sensorials d'os organos internos neurolochicament conectatos con o celebro, como los receptors cutanios, os d'as mucosas d'a farinche, os d'a vuixica urinaria y d'o estentín cular, etc. A interocepción abraca, per eixemplo, sensacions como a sete, a fartera u a rubor, u as que se producen en o garganchón quan s'engulle u se vomeca.

Sentitos no humans[editar | editar código]

O tiburón martiello ye un d'os animals que cuentan con electrorreceptors.

Muitos animals cuentan con sentitos analogos a os d'os humans, encara que a sobén a suya capacidat u posición ye diferent.

Os cans, per eixemplo, tienen o sentito d'o fato muito més aguto, encara que o mecanismo sía parello. Os insectos tienen encambio los receptors olfactorios en as suyas antenas. Os gatos pueden veyer quasi a escuras gracias a uns musclos alredol d'os iris y a una membrana que optimiza la imachen; igualment cuentan con un fin sentito d'a propiocepción que ye a que produz a impresión que os gatos siempre cayen sobre as quatre patas.

Entre os sentitos de bells animals que no tienen os humans, bi son os siguients:

  • a electrocepción, que ye a facultat de detectar os campos electricos, y que ye particularment significativa en bells peixes y tiburons;
  • a ecolocalización, u "sonar biolochico", que ye a facultat de determinar a orientación per medio d'a entrepretación d'o sonito reflectato, y que ye una habilidat bien conoixita en os moriciegos y os cetacios;
  • a magnetocepción, que ye a facultat de percibir fluctuacions en os campos magneticos, y que ye de normal observata en os paixaros;
  • a detección de luz polarizata, que permite d'orientar-se en días emboiratos a las abellas, u tamién a las sepias.

Referencias[editar | editar código]