Sant Fertús (Boltanya)

De Biquipedia
Ir a la navegación Ir a la búsqueda
Sant Fertús
Localidat d'Aragón
Entidat
 • País
 • Provincia
 • Comarca
 • Municipio
Lugar
Flag of Aragon.svg Aragón
Flag of Huesca (province).svg Uesca
Sobrarbe
Boltanya
Población
 • Total

0 hab. (2009)
Altaria 790 m.
Parroquial
 • Diocesi
 •Arciprestato

Balbastro-Monzón
Sobrarbe

Sant Fertús ye un nuclio de población que perteneix a o municipio de Boltanya. Se troba en a ripa dreta d'o barranco de Sant Martín, en a partida d'a valle de Boltanya que os autoctonos dicen a Solana de Canyimars, en as garras d'a Sierra de Sant Visorio por a part d'a faldada d'o Tozal d'o Pozo, a bell ciento de metros per alto d'o cabal d'o barranco. Se gosa albirar, de luent y a la dreta conforme s'asciende, dende o camín que puya de Boltanya ta lo Portiello d'as Valles y pasa ta Moriello de Sant Pietro.

Se tracta d'un despoblau de muit deficil acceso, sin de garra camín balizau u lempido que i arribe. Una pintada en a frontera d'una d'as dos casas que el composan pareix que i diz (anque a lectura se fa deficil) «[...] quintos 1915», lo que puede fer una imachen de quals i fuoron a zaguer cheneración que i residión. Por o diario d'o soldau d'artillería Francisco Pérez, que yera natural de Boltanya y combatió en a Bolsa de Bielsa, podemos saber que lo menos quan que a Guerra Civil espanyola encara i veviban chent.[1]

As dos casas (más dos bordas) que forman o nuclio se troban en estau d'enruna, anque encara son parcialment de pietz. As puertas obiertas y a tamas d'ixo, bells muebles en o interior, una cuba en o patio d'una d'ellas, y qualques ventanas que encara guardan os veires fan d'ir de qué poca chent se i ha puesto amanar, gracias a la vechetación que gosa barrar os pasos, ta que i haigan puesto fer garra saqueo como ha gosau pasar en tantismos altros despoblaus. Per demés, as partes espaldadas que as dos viviendas tienen han arrozegau ta tierra buena cosa d'as cambras habitaderas y con ellas os muebles que se conservasen (un somier de muelles rebentau que sobresale d'entre as buscas ye buena prueba de tot ixo).

En a redolada d'o lugar se i pueden trobar quantiosas faixas por el que se gosa deducir que os habitants d'o lugar i caultibaban, a la forma altaragonesa, cereyals que se labraban y segaban a man. A estretura que tienen as fincas ya fa pensar-se per qué se les fación complicatos os anyos a partir que se popularizó d'emplegar maquinaria: o paso ta meter-ie maquinas en as faixetas sería masiau complexo en a mayoría d'os casos, imposible en a resta. Como en muitos altros lugars, ista puede haber estau a causa que fació marchar a os pobladors de Sant Fertús. Bells árbols fruters en as marguins encara sobreviven, asilvestraus.

En a versión d'a canción popular Nina bonica popularizada por La Ronda de Boltaña (1996) se fa alusión en as parolas a iste lugar y a la suya ubicación cheografica.

Ninya bonita, levántate
que ralla l'alba por Gallisué
que Sant Fertuoso ya baixará
por o barranco de Canyimars

A forma «San Fertuoso» ye un hibrido d'entre a forma onomastica aragonesa «Fertús» y a suya equivalent castellana «Fructuoso», dando lugar a ixa forma mesclosa que fa muito l'estilo d'a comarca. Manimenos, a forma en toponimia, que ixo ye, o nombre d'o lugar, se conserva en a parla viva con a forma plenament aragonesa «Sant Fertús», y lo que menta a canción ye una referencia a o santo, anque se fa indirectament bien clara l'alusión a iste lugar. A diferencia d'entre l'uso ta decir o santo y ta decir o lugar se vei en a siguient estrofa d'a canción:

Si me das el sí, morena
me pondré de fogonero
en o tren de mercancías
de Sant Fertús ta Moriello

Camins[editar | editar código]

Anque os camins y senders s'han invadido por a vechetación y ya no se puede parlar mica d'ellos como si existisen, tradicionalment Sant Fertús teneba las siguients conexions, y encara se pueden seguir:

Moriello de Sant Pietro Sant Vicient d'A Buerda
Reinel wind rose round.png
Boltanya

Referencias[editar | editar código]

  1. (es) Diario de Operaciones (desde el 10 de marzo de 1938 al 1º de abril de 1939), diario de Francisco Pérez, consultau l'11 d'abril de 2010 a traviés d'a pachina d'o Centro de Estudios de Sobrarbe.


Lugars d'o municipio de Boltanya
L'Aligar | Alastrué | Ascaso | Bibán | Boltanya | Campodarbe | Casa bco. St. Martín | Espierlo | Sant Fertús | Luparuelo | Malgurguet | Santa María d'Ascaso | Sant Martín de la Valle | Matidero | Mesón d'Albars | Mesón d'o Barranco Fondo | Mesón de Fuevola | Mesón d'o Piojo | Miz | Montalbán | Morcat | Moriello de Sant Pietro | Sant Pietro | Puimorcat | Seso | Sieste | Silves | Torrulluela de la Plana | Torrulluela de lo Vico | La Valle | Sant Velián