Portiello d'as Valles

De Biquipedia
Ir a la navegación Ir a la búsqueda
O Portiello d'as valles dende la par d'Ascaso. En o fundo i son envistables as montanyas d'a valle de Chistau y d'A Cinca: Dende la ezquierra enta la dreta Pica d'Ordiceto, Maristás (més chicot), Punta Suelza, Punta Lierga, Cotiella y Penya Montanyesa.

O Portiello d'as Valles ye un puerto de montanya en as sierras interiors pirenencas d'Aragón, paso natural d'entre la valle de Vio y la par baixa de l'Ara (la dita valle de Boltanya u cambo de Boltanya), en l'aria central d'o Sobrarbe.

O portiello ye una collata en o lumo que ba dende las garras d'o Nabaín enta la Sierra de Sant Visorio, que d'altra manera sería una barrera natural d'entre las dos valles, per alto d'os 1000 m d'altitut, pero que per estar-ie la crestera més abaixata permite que se i haiga pasato tradicionalment d'una man enta l'altra. O portiello se pasa per un camín (pista forestal) que puya dende Boltanya (per dezaga d'o tozal d'o Castiello) y i endreta puyando tota la costera d'o barranco de Canyimars. Dende Boltanya son quatre kilometros de caminata, y lo camín ye partialment tamién el que endreta enta Ascaso, que se desepara bells centenars de metros d'antes quan ya s'alvista lo portiello.

Per haber feto parte como paso prencipal en as rotas transuants d'enantes, que i yiban per astí dica las estivas d'as valles de Puértolas y Vio, o portiello d'as valles tiene qualques graus y corrals dispersos en poquetz centenars de metros en arredol suyo, resta d'a vida d'enantes en estas valles que yera tan albocata en a ganadería y lo bestiar. As remadas d'a tierra baixa puyaban a lo Sobrarbe per Lecina, trabesando la foyeta d'o Viello Sobrarbe y d'Arcusa, pasaban més luego per Boltanya s'enfilaban alavez per Canyimars habendo de pasar a nueit no pocas veces en o Mesón d'o Piojo u en qualsiquier d'os graus que i heban en a parzana.

Un grau en a redolada d'o Portiello d'as valles.

O portiello d'as valles permite de pasar dende Boltanya enta Moriello de Sant Pietro, que ye lo primer lugar d'a valle de Vio, anque i perteneixca a lo concello de Boltanya.

Se veiga tamién[editar | editar código]