Sala de trobar

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo tracta sobre as salas de trobar. Ta atros usos d'a palabra «sala» se veiga Sala (desambigación).

Un eixemplo de sala de trobar.

A sala de trobar ye o nombre que tradicionalment reciben en l'Alto Aragón as salas nobles que tienen as casas fuertes u as ditas «Casas Grans» de muitos lugars, que s'emplegaba ta recibir a las pesonalidaz y despartir, en principio, os temas importants ta la comunidat.

A la practica, ye a sala a on que se trobaba l'amo d'a casa con os atros vecins de lugar, u con as personalidaz a las cuals, d'alcuerdo con a tradición, s'atribuiba mas importancia (o mosén, l'alcalde -en caso de que no n'estase él mismo-, representants de l'autoridat, etc.) y asinas poder fer colación.

Ye común que os habitants d'as casas que en tienen se refieran a ellas simplament como «a sala».

Arquitectura y disenyo

As salas de trobar son salas de grans dimensions, a sobén a estancia mas gran en l'edificio, y o mobiliario ye acorde con os posibles de a casa, estando no mica infrecuent que os amos (por pocos recursos que tenesen) i hesen invertiu especialment en acondicionar-la pa fer-la aparentar mas. As salas se gosaban comportar, muitas vegadas y a la vista d'os receptors d'a cultura tradicional (a sobén mas clasista que l'actual), como un simbolo d'un status social superior, dillá d'o que as casas con menos posibles podeban adubir.

As salas solen tener una ubicación central en a dita «planta noble» u primer planta d'a casa, con uberturas enta l'exterior, como finestras u bel balcón, que faigan millor a suya iluminación natural, y con buena comunicación con l'atra cambra con funcions socials en a casa: a cocina. O mobiliario soleba incluir bella mesa gran con as sillas correspondients, arredol d'a cual se podesen posar toz y fer lifara en as ocasions especials (s'ha de recordar que enantes, de regular, en as casas se minchaba en a cocina), pero que se'n podese retirar en caso de necesidat d'espacio pa bellatras ocasions, como por eixemplo en as Fiestas u en as vodas ta fer-ie bailes si caleba.

Lizenas pa guardar o ixovar d'a casa (de vez que s'amuestra a las vesitas), escritorios u secreters especialment en casas con miembros eclesiasticos u letraus, u bel sofá u butacas se i podeba trobar tamién. As cadieras son menos frecuents por considerar-se muebles pobres en as zagueras decadas. Unatro elemento tipico d'as salas de trobar, mas que mas en a Montanya altoaragonesa, yeran os reloches de paret, tan populars en o sieglo XIX en zonas como o Sobrarbe, a partir d'o fenomeno d'as emigracions temporals ta Francia, que muitos amos se'n feban trayer belún por os miembros d'a familia emigraus de tornada.

Usos actuals

En l'actualidat, pocas casas que en tenesen una la conservan tal cual yera, pus a mayoría s'han refeito como comedors (con mobiliario y utillache moderno) u s'ha trestallau ta fer-ne cambras, u parte ta fer-ne cambras y parte ta fer-ne comedor. Isto se debe a la mida que tienen as salas tradicionals y a os usos mas racionals d'o espacio que se fa contemporaniament, a on que prima tener espacios funcionals mas que no t'as vesitas, y a la perda progesiva d'as creyencias tradicionals sobre l'aparencia y a clase social.

Se veiga tamién

• Cambra.
• Cocina.
• Reposte.
• Patio.
• Falsa.
• Masadería.
• Cuadra.
  • Zolle.
  • Estallo.
• Bodega.