Estallo

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Iste articlo tracta sobre o estallo, subdivisión de a cuadra. Ta atros usos d'«estallo», se veiga Estallo (desambigación).
Una cuadra con estallos y una rastillera con hierba.

Un estallo (puede estar que de o latín <STABULU, pero tamién de «des» + «tallar») ye una subdivisión adintro d'una cuadra[1], feita por un regular con latas y percullos perens en forma de cleta, que delimita un espacio de bels metros cuadraus en o que se puede zarrar uns pocos animals.

S'emplega sobre tot ta deseparar o ganau menor (uellas u crabas), a sobén repartindo un rabanyo en os diferents estallos de a cuadra, pero puede emplegar-se tamién ta vacas y bueis, cabendo-ne lochicament menos en cada estallo.

En as cuadras ta caballería, as cletas d'os estallos gosan estar mas alteras, ta privar que os animals (que se guarda desligaus) tomen mal si miran de brincar por alto.

En benasqués se diz estall, y se'n conoix a forma estaje[2], por una posible castellanización fonetica a partir de l'anterior. Por metonimia, un rabanyo chicot formau aproximadament por o numer de uellas u crabas que cabrían en un estallo tamién recibe o nombre d'estallo.

Referencias[editar | modificar o codigo]

  1. (an)(es) ANDOLZ CANELA, Rafael, Diccionario Aragonés, Aragonés-Castellano Castellano-Aragonés (5ena ed.); Mira Editores. Zaragoza 2004. ISBN 84-8465-160-6
  2. (es) MOTT, Brian L.. Diccionario etimológico chistabino-castellano castellano-chistabino. Institución «Fernando el Católico». Zaragoza, 2000. ISBN 84-7820-553-5

Se veiga tamién[editar | modificar o codigo]