Pueblos berbers
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
| Pueblos berbers Imazighen / ⵉⵎⴰⵣⵉⵖⴻⵏ | ||||||||||||||||||
|---|---|---|---|---|---|---|---|---|---|---|---|---|---|---|---|---|---|---|
 | ||||||||||||||||||
 | ||||||||||||||||||
|
| ||||||||||||||||||
| ||||||||||||||||||
| Berber | ||||||||||||||||||
| Islam, cristianismo | ||||||||||||||||||
 Mapa de situación actual d'as etnias berbers. | ||||||||||||||||||
.svg){kind=small}
Os pueblos berbers[1] (en berber ⵉⵎⴰⵣⵉⵖⴻⵏ, imazighen) son a población nativa d'o norte d'Africa a l'ueste d'o río Nilo, en parte conoixita como Berbería, en a rechión que s'estendilla dende las islas Canarias (guanches) dica l'oasi de Siwa en Echipto, y que mantienen l'uso d'as luengas d'a familia berber, anteriors en Africa a la presencia d'a luenga arabe que las va substituyindo.
Pueblos berbers actuals son os rifenyos, os xluh, os berbers de l'Atlas meyo, os cabilenyos, os chagüiya, os cherbans, os mozabís, os tuaregs, os nefusas, os siwís, os zenagas y atros de menors.
Modos de vida tradicionals
[editar | modificar o codigo]Os modos de vida tradicionals que tienen u han tenito amás gran part d'os berbers dica fa pocas decadas son:
- Agricultors sedentarios de montanya: en o Rif y en as Kabilias.
- Agricultors sedentarios de oasis.
- Pastors transhumants: En as montanyas de l'Atlas.
- Pastors nomadas: os tuareg son os millors representants.
Relichión
[editar | modificar o codigo]A relichión orichinal yera politeista como en atros pueblos de l'aria mediterrania, y como en o Mediterranio esta relichión tenió sincretismos con as relichions de pueblos que los influencioron u invadioron, (fenicios, cartachineses, romanos, ecetra..). En o periodo d'influencia fenicia prenió muita importancia o culto a o dios solar Baal Ammon, (L' Ammon Ra d'os echipcios). O zaguer periodo d'arte rupestre sahariano, o periodo d'os carros ye obra de berbers pagans que controlaban as rutas comercials saharianas primero con caballos y carros y dimpués con camellos.
Existioron berbers cristianizatos, (Sant Agostín podió estar d'orichen berber). Parte d'os cristianos rurals nortafricanos yeran en realidat semitas punicos y no berbers. Cuan plegoron os arabes musulmans encara existiban muitos pagans. Encara que no se'n charre guaire en as fuents islamicas, os omeyas cordobeses ninviaban achents islamizadors ta o Magreb. L'arte rupestre sahariano desapareixió con a islamización, (as zagueras representan siellas arabes por lo que son posteriors a lo S VII). O islam yera iconoclasta y prohibiba a representación d'animals d'este arte pagano. O cristianismo pervivió en Túniz dica o sieglo XIII, pero en poblacions que probablement u ya no yeran berbers u yeran descendients d'a población romanizata (os rumís).
A islamización d'os berbers ye completa y nomás quedan que repuis de l'antiga relichión politeista. Amás gran parte d'os berbers son musulmans. Bi n'ha beluns de relichión chodiga. En o pasato i habió muitos musulmans kharichitas y bels musulmans chiitas pero dende o periodo almurabit predominan os musulmans sunitas. Os nuclios kharichitas son muito localizatos (Cherba, Mzab, y Chabal Nefusa).
Historia
[editar | modificar o codigo]Dimpués d'una historia de mas de 3000 anyos d'invasions de pueblos con cultura urbana mas desembolicata, (echipcios, fenicios, cartachineses, griegos, romanos, arabes, potencias occidentals), os berbers actuals son representatos precisament por a chent de zonas de monts y desiertos que se resisten a prener elementos culturals d'atras culturas. Os berbers de zonas planas, bien comunicatas u interesants pa as culturas alochenas se facioron punicos, romanos u arabes seguntes a epoca, estando estos zagueros os que mas abanzoron en a asimilación d'os berbers. Amás gran parte d'os arabes nordafricans son en realidat berbers arabizatos dende tiempos medievals. Os aboríchens canarios que se troboron os conquistadors yeran berbers.
Os berbers en o Edat Meya Musulmana
[editar | modificar o codigo]En a primera invasión efectiva d'os arabes musulmans, que trayó a relichión musulmana, 100.000 arabes s'establioron en Ifriquiya, (Norte de Túniz). En os primeros sieglos de dominio arabe musulmán tamién n'i habió en atros puestos. As zonas d'arabización lingüistica yeran o Sahel Tunizín, (Arredol d'a ciudat de Caiurán), o Norte de Costantina, o norte de Termizén, y Fez. Os berbers s'islamizoron por comenencia u intrés politico y formaban a masa d'exercitos on mandaban os arabes. En as montanyas de l'interior y os desiertos a islamización estió mas lenta.
Os berbers prenioron a forma kharichita d'o islam pa reivindicar a igualdat con os arabes y facioron bellas revueltas, belunas con exito. Part d'a Edat Meya musulmana d'o Norte d'Africa s'explica por a rivalidat d'a confederación Zanata con a confederación Zenacha, y por l'aparición succesiva de poblacions marguinals que aproveitan una forma d'islam mas reivindicativa pa chustificar prener o poder contra o poder d'atros berbers y arabes mas ricos y con atra forma d'islam antigament reivindicativa y que se relaxaba, (almurabitz, almuhades, benimarins, etc...).
Os berbers barwata d'o norte de Marruecos formoron un reino islamico basato en a identidat berber y en una herechía derivata de l'islam kharichita entre 744 y 1058.
Os ismailitas consiguioron l'aduya militar d'a Kutama pa forachitar a os aglabís d'Ifriqiya y fundar o califato fatimita, que primero s'estendillaba por Berbería, y dimpués prenió o control d'Echipto. Os fatimitas deixoron Berbería baixo control d'os Zirís. En o S XI os fatimitas ninvioron dos tribus d'arabes beduins, Banu Hilal y Banu Sulaim, pa castigar a os zirís, que heban tornato a la ortodoxia sunní malequita y heban acceptato l'autoridat d'os abasís de Bagdad. Encara que los vencioron, a presencia d'estos nomadas desfació a sociedat agricola sedentaria d'os berbers de tierra plana y con o tiempo tamién se filtroron ta zonas deserticas desplazando u asimilando a berbers nomadas. Dende esta segunda invasión os berbers quedoron localizatos en os isloz on huei los trobamos.
En a Edat Meya os países costeros d'o Norte d'Africa yeran conoixitos en Europa como Berbería.
Os berbers tamién estioron presents en tota a Edat Meya en Al-Andalus.
Se veiga tamién
[editar | modificar o codigo]Referencias
[editar | modificar o codigo]- ↑ (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
Vinclos externos
[editar | modificar o codigo]
Se veigan as imáchens de Commons sobre Pueblos berbers.
Datos: Q45315- Multimedia: Berber people / Q45315