Feno

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Un tractor chirando o feno.

O feno u fen (d'o latín <FENUM), anque ye muit freqüent que se le diga simplament «hierba», ye a mezcla de hierbas secas con a qual s'alimenta a bells animals herbivoros domesticos, especialment quan se tienen en condicions de reclusión y no pueden paixentar-se solos.

O feno actúa como base de l'alimentación de bells animals domesticos, como os conillos, que por estar fuyedizos no pueden deixar-se en puestos ubiertos a on que podrían consumir a hierba solos. Tamién ye la base d'alimentación que tienen totz os grans herbivoros, dende ovellas y crabas dica vacas, bueis, mulas y caballos, en os meses fridos.

Manimenos, a totz os animals alimentaus con feno ye convenient que se les complemente a dieta con belatros alimentos, como cerials (principalment s'emplega l'hordio u o cevau) y/u prensos sinteticos.

Composición

O feno se composa de hierbas diversas, no siempre cautivadas, u d'una sola especie en función d'a on procede. Anque existe especies domesticadas principalment ta fer-ne feno, como l'alfalz, y cada vegada con más freqüencia o feno se fa con ixas especies, tradicionalment tamién s'ha aprofitau o feno natural que dimana de fenals u extensions a on que a diversidat d'especies herbacias s'ha manteniu, de forma natural, porque se i feba pasturar os animals domesticos.

Por ixo, o feno de fenal tipico se forma d'una gran diversidat de hierbas d'entre as que predominan as graminias (especialment, as que se conoix de forma colectiva como belluecas) por estar mas resistents y adaptaderas a la pastura freqüent de o ganau. Iste tipo de feno s'asocia con expleitacions rurals, no mecanizadas, en as quals a siega d'a «hierba» se fa en os propios erials a on que en os meses favorables s'ha feito paixentar a os animals.

Muit a sobén, os fenals de feno natural son luent de o nuclio de población y no son terrens de cultura, sino semi-silvestres que fan parte d'un paisache humanizau, a on que a pastura d'os animals durant anyos ha condicionau a formación d'un prau herboso pero con especies silvestres. O feno d'iste tipo d'extensions se siega a mano, con o dallo, y se transporta ligau en falciellos con bastes y samugas sobre os mastos, u en carro.

A despoblación d'o mundo rural, que ha deixau desamortizadas muitas fincas que enantes yeran precisas ta la producción d'alimentos humans, en chunto con a mecanización de l'agricultura, ha favoreixiu o cautivo de l'alfalz como especie fenera. En l'actualidat, en países de clima mediterranio (como o que tenemos en a peninsula Iberica) l'alfalz ye a principal especie que s'emplega como feno; y a demés se cautiva de propio ta ello, mientres que fa bellas decadas quan no i heba tanta maquinaria en as fayenas de l'agricultura, os campos d'alfalz yeran una minoría.

Importancia

As reservas de feno yeran cabals en a ganadería tradicional, pus de l'acumulación de hierba dependeba a supervivencia de o ganau en os periodos de carencia, como l'hibierno. Ta iste manester, quasi todas as casas con reses de ganau segaban y guardaban hierba en hierbers u en pallers en o verano, y a cantidat que se podese guardar en istas dependencias yera muit a sobén o factor limitant que determinaba o numero maximo de cabezas que podeba tener una casa.

A demés d'isto, o feno se podeba almagazenar apilau en niedas, arredol d'un niedil, anque como d'ista forma ye mas exposau a o tempero, gosa calamonar-se y tiene una vida menor.

Se veiga tamién

• Palla.
• Hierbero.
• Roscadero.
• Banasto.

Vinclos externos

• O Biquizionario tien una dentrada sobre fen.