Escureixiu

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Escureixiu en Botsuana.

O escureixiu (u escureixito), u boca de nuei, ye l'inte d'o día en que o Sol se pone per l'Ueste, dispareixendo per debaixo lo plan de l'horizont.^[1]

A hora d'o escureixiu varía seguntes o tiempo de l'anyo y a latitut d'o puesto dende o qual se lo mira. Istas variacions se deben a la inclinación de l'eixe d'a Tierra y a lo movimiento d'o planeta arredol d'a suya orbita. En as semanas que abracan os solsticios de verano y d'hibierno, igual lo escureixiu como l'alba se rezagan una mica cada día. A refracción per l'atmosfera d'as rayadas d'o Sol fan que veigamos a suya luz mesmo quan o Sol ya s'ha puesto. Ixa refracción aluenga o día y alcuerza la nuei. En o "Libro del Trasoro" parlan sobre a variación d'a duración d'o día y a nueit seguntes o tiempo de l'anyo en zonas muito septentrionals:

Estas e muytas otras tierras e islas son de alla Bretanya e ultra la tierra de Noruega; mas la isla de Cile es la çaguera, qui es en el fondon al cabo de septentrión que esta, quando el sol es en el signo de Cançer, en los grandes días, la nueyt es asi chica que ella semella atraspassar como ha no res. E el yujerno quando el sol entra en Capitornj en las grandes nueytes, el dia es asi muy chica que ellos no han njngunt spacio entre leuant e ponjent del sol. Et vltra alen es la mar congelada e tenyent, en do ella no ha njngun departimjento de leuant e de ponyent, segunt el conto dize alla do el faula del curso del sol. Encara yes la isla de Vndas, do los omnes que alla habitan no han ansia e ellos biuen de pexes e de leyt. Encara y son las islas Orcadas, en do no abita njnguna gent. Mas aqui se calla el conto de faular de Europa, que fina en Spanya, e dira de la .iij-ª partida, esta yes Africa.

A difusión Rayleigh de luz azul per o polvo atmosferico produz os tipicos tintes royiscos en o cielo ta lo escureixiu, que pueden fer-sen más espectaculars per l'efecto d'as boiras, o fumo, a cenisa d'as erupcions volcanicas u os gases causaus per l'actividat humana. O brilo d'as colors acostumbra a estar más intenso que ta la boca de día, ya que per un regular bi ha más polvo en a baixa atmosfera ta la fin d'a chornada, si bien tot pende muito d'a ubicación cheografica d'o espectador.

Como simbolo, o escureixiu representa os intes zaguers de bella cosa, como la viellera en a vida d'as personas.