Denominación d'Orichen Protechida Cebolla Fuents d'Ebro
A Denominación d'Orichen Protechida Cebolla Fuents d'Ebro ye una denominación d'orichen protechida aragonesa sobre as cebollas cautivadas, elaboradas, almagacenadas y envasadas en 6 municipios d'a zona de Fuents d'Ebro (Zaragoza, Aragón), y que son d'a variedat cebolla dolza de Fuents, tamién dita cebolla blanca gruesa de Fuents, inscrita en o Catalogo Común de Variedaz d'Especies de Plantas Horticolas.[1]
L'aprebación d'a normativa especifica d'a Denominación d'Orichen Protechida Cebolla Fuents d'Ebro fue publicada en noviembre de 2010 en o Boletín Oficial d'Aragón.[2] O 31 de chinero de 2011 se reyalizó a presentación oficial d'a denominación d'orichen protechida Cebolla Fuents d'Ebro,[3] salindo as primeras con iste sello de calidat a o mercau en chulio de 2011.
Orichens
[editar | modificar o codigo]L'orichen d'o cautivo d'ista cebolla en o termin municipal de Fuents d'Ebro y a suya redolada data d'os primers asentamientos romanos, que construyiron un sistema de riegos. Con a plegada d'os musulmans s'amilloró l'uso de l'augua a traviés d'a construcción d'un amplo ret de cequias dende os azutes dica os campos d'a comarca. En Fuents d'Ebro encara se conserva iste sistema de riego d'orichen arabe.[1]
Redolada
[editar | modificar o codigo]A zona cheografica d'ista denominación d'orichen protechida incluye 6 municipios d'as comarcas Central y Ribera Baixa d'Ebro, en a provincia de Zaragoza.
Clima
[editar | modificar o codigo]O clima d'ista zona ye caracterizau por tres factors: l'aridez, a continentalidat y os vientos.
A poca pluya, de tasament 350 mm anyals y mayors en primavera y agüerro, creya chunto a las altas temperaturas un periodo d'estrés hidrico entre os meses de chunio y octubre. A isoterma meya anyal se troba entre os 13 y os 15°C. As temperaturas minimas pueden baixar d'os 5°, rechistrando-se as valors mas baixas en aviento y chinero. As meyas maximas en verano puyan d'os 30°, estando chunio, chulio y agosto os meses mas calidos. Como en atros puestos d'a val d'Ebro, o cierzo, viento fredo y seco, bufa en l'aria de cautivo.
Demarcación cheografica
[editar | modificar o codigo]Os municipios incluyius en a Denominación d'Orichen son: Fuents d'Ebro, Mediana d'Aragón, Osera d'Ebro, Pina d'Ebro, Quinto y Villafranca d'Ebro.[4]
Caracteristicas
[editar | modificar o codigo]A cebolla Fuents d'Ebro se caracteriza por tener o tallo grueso, forma globosa redondiada por a radíz y lucherament alargada enta o cuello, color externa blanca-palla, napas internas blancas y por a suya textura tierna, crocant y muit sucosa, debiu a o suyo elevau conteniu en augua, pero mas que mas destaca por estar una cebolla suau, dichestiva, d'escasa picor y con ausencia u lieu retrogusto en boca.
Entre a suyas amplas virtuz destaca, en cocina, por estar excepcional pa o suyo disfrute en ensalada y por caramelizar sin menester d'adhibir zucre por a suya dolzor natural; ixo la fa estar una d'as hortalicias preferidas de consumidors y cociners, amás d'estar ideyal pa o consumo por parti d'os ninos.
Variedaz
[editar | modificar o codigo]As cebollas dolzas son cautivadas en tierras con baixas cantidaz d'ixufre, por lo que gosan tener livels d'acido piruvico inferiors a 5,5 mmoles/l debant d'as cebollas d'almagacenamiento (cebolla comuna u no dolza) que por un regular plegan a os 10–13 mmoles/l.[5] Istos complexos sulfurosos son os que causan as glarimas, a picor y a indichestión. A cebolla dolza por tener-ne menor cantidat no pica ni ye fartadera.
Producción y comercialización
[editar | modificar o codigo]A etiqueta con o logotipo d'a Denominación d'Orichen Protegida guarencia que ye consumindo l'autentica cebolla Fuents d'Ebro, producida en a zona cheografica delimitada y que cumple con os maximos parametros de calidat, pasando uns estrictos controls tanto en o campo como en as empresas comercializadoras. Se pueden identificar diferents tipos d'etiquetas, bien en cada cebolla unitaria u en os envases.[6]
As cebollas de Fuents d'Ebro se cautivan en unas 150 hectarias en a zona de huerta d'os ríos Chiner y Ebro, con una producción estimada d'entre 40.000 y 50.000 kilos por cadaguna d'ellas. Se troban en o mercau dende l'inicio d'a suya replega, en zaguerías de chulio, dica zaguerías d'aviento/chinero.
Empresas
[editar | modificar o codigo]I hai 3 empresas comercializadoras de cebollas con DOP Cebolla de Fuents:[7]
- Cebollas Agrofuentes S.L. (Fuents d'Ebro)
- Finca La Corona (Fuents d'Ebro)
- Jumosol Fruits (Fuents d'Ebro)
Referencias
[editar | modificar o codigo]- ↑ 1,0 1,1 (es) Las cebollas de Fuentes de Ebro ya son DO. Aragón - Hernández, agrocope.com. 10 de mayo de 2010
- ↑ (es) BOA
- ↑ (es) La Cebolla Fuentes de Ebro la primera en España con Denominación de Origen.
- ↑ (es) Pliego de la Denominación de Origen Protegida "Cebolla Fuentes de Ebro"
- ↑ (es) ¿Qué es una Cebolla dulce?
- ↑ (es) Web oficial Cebolla Fuentes de Ebro
- ↑ (es) Ccomercializadora. DOP Cebolla Fuents d'Ebro
Vinclos externos
[editar | modificar o codigo]
| Alimentos con denominación d'orichen protechida (D.O.P.) en Aragón | 
|
|---|---|
| Aceite d'o Baixo Aragón | Aceite Sierra de Moncayo | Aceite d'o Semontano * | Ailés | Cebolla Fuents d'Ebro | Calatayú | Campo de Borcha | Carinyena | Cava | Pernil de Teruel | Presiego de Calanda | Semontano | Urbezo * | |
| * en tramite |
| Control d'autoridaz |
|
|---|
Datos: Q5759699
Multimedia: Cebolla Fuentes de Ebro / Q5759699