Denominación d'Orichen Protechida Semontano

Bodega Sommos

A Denominación d'Orichen Protechida Semontano ye una denominación d'orichen protechida de vins con seu en a ciudat aragonesa de Balbastro, que existe en o Semontano de Balbastro dende l'anyo 1984. As variedaz d'ugas con que se fan istos vins son moristel, tempranillo, garnacha, parraleta, cabernet sauvignon, pinot noir, macabeu, garnacha blanca, chardonay y gewürztraminer, entre atros.

Orichens

I hai documentación de l'anyo 500 aC que sinyala que a vit se cautivaba en a val d'Ebro en o sieglo II aC y que a producción de vin en a zona yera important. En o Semontano de Balbastro s'estableixioron os romanos, trayendo tecnicas vitivinicolas avanzadas.

Mientres a Edat Meya o cautivo de viz s'estendilla por toda a provincia, tenendo un papel important en o suyo desarrollo os monesterios, ya que o vin ye un producto esencial en os rituals catolicos.

En o sieglo XIX con l'ataque d'a filoxera a os vinyals franceses se veyió incrementada a producción vinicola d'ista comarca, igual que la d'atras d'Aragón, asinas como as exportacions. Ye en a decada de 1960 cuan se creya a cooperativa comarcal, agrupando asinas a la mayoría de viticultors d'a zona y dando trangos enta a creyación d'a denominación d'orichen que plegaría dos decadas dimpués.

Redolada

Localización d'a D.O.P. Semontano.

Clima

Os vinyers gosan estar situaus en o fondón d'as vals, a on i hai un microclima con unas temperaturas anyals de 14,7 °C una mica mayors que en as atras denominacions d'orichen d'Aragón. O suelo tien arenisca, archila y salagón.

Demarcación cheografica

Etiqueta d'un vino d'a D.O.P. Semontano.

Os siguients termins municipals son incluyius en a zona cheografica d'a Denominación d'Orichen Protechida Semontano:

Abiego, Adauesca, Alcalá d'o Bispe, Angüés, Antillón, Alquezra, Argavieso, Ascellas-Ponzano, Azara, Aflor, Balbastro, Barbunyals, Berbegal, Blecua-Torres, Biarche, Capella, Casbas de Uesca, Castillazuelo, Colungo, Estada, Estadilla, Fonz, Lo Grau, Graus, Ibieca, Ilche, A Luenga, Nabal, Olbena, Oz y Costeán, Peralta d'Alcofeya, Peraltiella, Perarruga, A Perdiguera, Pertusa, Pozán de Vero, La Puebla de Castro, Salas Altas, Salas Baixas, Santa María de Dulcis, Secastiella, Sietemo y Torres d'Alcanadre.

Caracteristicas

Ugas

Vino d'a D.O.P. Semontano.

Tintas

• Tempranillo.
• Cabernet sauvignon.
• Merlot.
• Moristel.
• Garnacha tinta.
• Parraleta.
• Pinot noir.
• Syrah.

Blancas

• Macabeu.
• Garnacha blanca.
• Alcanyón.
• Chardonnay.
• Gewürztraminer.

Producción y comercialización

I hai 4.644 hectarias de vinya. O 90% d'a producción se divide entre as tres bodegas mas importants, encara que cada vegada n'i hai mas.

Bodegas

Istas son as 27 bodegas que fan parti d'a denominación d'orichen:

Abinasa (Ascellas) Aldahara (Estadilla) Alodia (Adauesca) Bal d'Isábena (Llaguarres) Batán de Salas (Balbastro) Blecua (Balbastro) Castillo de Monesma (Enate) Chesa (Balbastro) El Grillo y la Luna (Balbastro) Enate (Salas Baixas) Fábregas (Balbastro) Idrias (Ascellas) Lalanne (Balbastro) Lasierra (Bespén)

Laus (Balbastro) Leo&Niné (Estadilla) Meler (Balbastro) Mipanas (Lo Grau) Monte Odina (Ilche) Obergo (Ubiergo) Osca (Ponzano) Otto Bestué (Enate) Pirineos (Balbastro) Sers (Cofita) Sommos (Balbastro) Valdovinos (Antillón) Viñas del Vero (Balbastro)

Vinclos externos

• (es) Pachina web oficial d'a D.O.P. Semontano.

• Datos: Q1938017
• Multimedia: Somontano (DO) / Q1938017