Pluya
A pluya[1][nota 1], pluvia[1][nota 1], plevia[1], ploya[1] u plucha[1][nota 1] (d'o latín pluvĭa) ye un fenomeno meteorolochico que produce a cayida de gotas d'augua y que s'inicia con a condensación d'a vapor d'augua que forma gotas d'augua, as cualas pasan a formar as nubles y cayen a tierra. A calor atmosferica orichina a puyada d'as nubles y o suyo refriamiento, con lo que creixe a grandaria d'as gotas d'augua y o suyo mayor peso las fa cayer enta a superficie terrestre, dando orichen asinas a la pluya. Pa o perteneixient u relativo a la pluya, se fa servir l'adchectivo "pluvial".[1]
As gotas no tienen forma de glarima sino que as mas chicotas son cuasi esfericas, mientres que las de mayor grandaria son aplanadas.
Clasificación de precipitacions acuosas
[editar | modificar o codigo]
A precipitación de pluya dende l'atmosfera enta la superficie terrestre se diz "plevida"[2][3][nota 2]. L'acción de cayer a pluya se diz "plever"[nota 3] y, si lo fa en poca cantidat, alavez ye "plevusquiar".[nota 4]
- Augualera: no ye propiamente pluya, sino una forma de condensación d'a humedat de l'ambient en as nueis fredas y enrasadas, cuan a vapor d'augua se condensa formando chicotas gotas en as fuellas d'as plantas u en atras superficies fredas.
- Auguanieu: ye a pluya mezclada con nieu.
- Plevizna: pluya muit débil en a que a sobén as gotas son muit finas y mesmo pulverizadas en l'aire. En una plevizna a pluviosidat u acumulación ye cuasi inapreciable. Popularment le'n diz auguachurris, borrasquinya, chirrimirri, flaina u gotiflaina.
- Pluya: ye un termín cheneral para referir-se a la mayoría de precipitacions acuosas. Puet tener cualsiquier intensidat, encara que lo mas frecuent ye que siga entre débil y moderada.
- Ruixazo: ye pluya de curta durada, por un regular d'intensidat moderada u cerenya. Os ruixazos pueden estar acompanyaus de viento.
- Tronada: ye pluya acompanyada d'actividat electrica y, por un regular, de viento moderau u cerenyo, y, mesmo, con piedra. As tronadas pueden tener intensidaz dende muit débils dica torrencials, y, mesmo, a vegadas son practicament secas. A combinación de tronada secas y ruixazos puet presentar-se en cualsiquier caso. Ye decir, un ruixazo cerenyo con tronada tien una aria pluvial reducida, que puet estar rodiada por una mena de cerclo de mayor grandaria a on se deixan sentir os truenos y as lampadas pero no pleve.
Mazadas
[editar | modificar o codigo]- Cuan pleve y fa sol, tiempo del caragol.[4]
- As plevias de chinero plenan as cubas, tinallas y graneros.[5]
- A plevia de marzo ta o ganau ye pasto.[5]
- Si s'agarra a cenisa en o badil, pleve en marzo y en abril.[5]
- Si pleve ta l'Ascensión pleve cuarenta días seguius.[5]
- Ta yo pleva en abril y mayo y ta tú o que queda de l'anyo.[5]
- Malo si, por sant Bernabé, no ha parau de plever.[5]
- Si pleve muito en agosto no feremos buen mosto.[5]
Referencias
[editar | modificar o codigo]- ↑ 1,0 1,1 1,2 1,3 1,4 1,5 (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
- ↑ (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008.ISBN 978-84-8094-061-0
- ↑ (an) Silbia Garcés Lardiés,Francho Rodés Orquín:Un borguil de parolas.Bocabulario dialeutal escolar, Gubierno d'Aragón, 2006, ISBN 84-689-7358-0, p.42
- ↑ (es) José Enrique Gargallo Gil:Los refranes meteorológicos en aragonés, en el marco de la paremiología románica, Alazet n°20, 2008, ISSN 0214-7602, p.11-31
- ↑ 5,0 5,1 5,2 5,3 5,4 5,5 5,6 (an) "Sapienzia en purnas. L'añada en o refranero altoaragonés". Chusé Antón Santamaría Loriente. Aladrada Ediciones. Colección Clarión, 12. Zaragoza, 2017. ISBN 978-84-947712-2-4
Notas
[editar | modificar o codigo]- ↑ 1,0 1,1 1,2 Tamién existen as formas palatalizadas plluya, plluvia y pllucha
- ↑ Con as suyas variants "plevita", "plovida" / "pllovida" y "plloveda".
- ↑ Atras variants son "plover", "pllover" y "plloure"
- ↑ Atras formas son "plevidiar", "pleviniar" / "ploviniar", "plevuciar", "plloviniar", "pllovizoniar", "pllovizniar", "plloviznar" u "pllovisniar"
Vinclos externos
[editar | modificar o codigo]
O Biquizionario tien una dentrada sobre a pluya.
Se veigan as imáchens de Commons sobre a pluya.
