Cruz de Basarán

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo tracta sobre a Cruz de Basarán. Ta atros emplegos de Basarán se veiga Basarán (desambigación).

A Cruz de Basarán ye un parache en o Sobrepuerto, situau aproximadament en o centro cheografico de la dita comarca, a bels 300 metros d'o nuclio despoblau de Basarán (que le da nombre) y a poca distancia tamién d'o cuello Basarán, conoixiu mas que mas por estar o puesto a on que confluyen as dos solas pistas forestals que s'adentran en a dita comarca de Sobrepuerto: a que puya dende Yebra de Basa por Sta. Orosia y a que i puya dende Oliván por o cuello Basarán.

O nombre le viene de que ye astí a on se trobaba una cruz de suelo d'o lugar de Basarán (d'a cual no i queda si que o calcil d'a peana). Ye o punto d'a on que rancaban os camins tradicionals que uniban Basarán con Ainielle y Bergusa, coincidindo parcialment con a pista actual d'Oliván, y con o puerto de Santa Orosia, coincidindo con a pista de Yebra. A Cruz de Basarán se troba en un prato, lo cual facilita o estacionamiento de vehiclos a motor y que sía o puesto d'a on que a sobén comienzan as excursions a piet por a redolada.

D'a Cruz de Basarán ranca un camal de pista que se prolarga dica o nuclio deshabitau de Basarán, accesible en pocos minutos a piet, y una tercera pista forestal construida fa relativament pocos anyos que vadeya o barranco Forcos en o parache d'a dita Plana 'a Glera y s'enfila dimpués por a man cuentra dica Escartín (ista pista no ye practicable si que con 4x4). Dende ista pista d'Escartín se'n desbarra unatra en muit mal estau, en a man izquierda, que s'enfila ta o cuello d'Ainielle y que ha estau o solo acceso rodau (actualment impracticable) que nunca ha teniu o despoblau d'Ainielle.

Se veiga tamién[editar | modificar o codigo]