Comanda de Villel

De Biquipedia
Ir a la navegación Ir a la búsqueda

La Comanda de Villel estió una comanda primero templera y dimpués hespitalera con seu en Villel que incluyiba ames las localidatz de Bellestar, Libros y Río Deva.[1] Yera situada entre lo Rincón d'Ademuz (Reino de Valencia) y la Comunidat de Teruel (Reino d'Aragón), fendo part d'este zaguero reino.

Los templers emprendioron prochectos de colonización y repoblación con cristians aragoneses y d'atros orichens en esta comanda. Las cartas puebla de qualques localidatz d'esta comanda son escritas en aragonés. Manimenos en Villel quedó una important población musulmana.

Quan por orden papal la Orden de lo Temple fue disuelta a principios de lo sieglo XIV la comanda de Villel estió una de las comandas templeras que presentoron resistencia a lo exercito de Chaime II d'Aragón. Manimenos lo Castiello de Villel remató capitulando.

Las Cronicas de los Chudeces de Teruel n'informan, dicindo cosas como:

Fue cercada Villuel que era del Temple. (1307, versión BAR).
Fue cercada Villel porque se estrujo el Temple. (1307, versión B).
Fueron estroidos los templeros. (1307, versión A).
En esti año fue destruido el Temple et el Papa Juan XXII dio la sentencia en Viana et fizieron estrado et vestidos de duelo porque destruian tan alta orden et fueron vestidos de maregas; aquel año fueron sobre Villel et todos los otros lugares de los templeros destruidos et cercados. (1307, versión AHT, la més tardana).

La bula de lo 2 de mayo de l'anyo 1313 disposó que las propiedatz europeas de los templers pasasen a depender de la Orden de lo Hespital. Lo rei Chaime II d'Aragón pretendió adhibir las propiedatz templeras a lo patrimonio reyal y nombró administradors pa las diferents comandas en l'anyo 1312. Dimpués d'unas negociacions las comandas templeras situadas en lo Reino d'Aragón y en Catalunya pasoron a los Hespitalers. Lo ixamplamiento territorial de la orden estió tan gran que habioron de fer una reorganización administrativa y creyar la Castellanía d'Amposta lo 26 de chuliol de 1319 pa las anteriors comandas templeras que yeran en lo Reino d'Aragón, como yera lo caso de la Comanda de Villel.

En lo fogache de 1495 encara se menciona a la Comanda de Villel.

Por lo menos en ciertos periodos temporals tamién ha perteneixiu a la Comanda de Villel la localidat de Cabronciello, mesmo quan a principios de lo sieglo XIX yera una simpla partida de lo termin de Rio Deva.[2]

Referencias[editar | editar código]

  1. (es) Antonio Ubieto Arteta: Historia de Aragón Divisiones Administrativas, Anubar, 1983, pp 80.
  2. (es) Gaceta de Madrid, Volumen 1. Colaborador: España. Ministerio de la Gobernación. Editor: Imprenta Real, 1821. p 717

Bibliografía[editar | editar código]