Coagulación d'a leit

De Biquipedia
Ir ta: navego, busca

A coagulación d'a leit ye provocada por a desnaturalización d'a caseína, proteína mayoritaria d'a leit. A materia grasa y as seroproteínas tienen un rol pasivo.

As diferents caseínas son organizadas en micelas que son agregaus d'unas quantas moleculas de caseína. Ye un complexo de proteínas fosforadas precipitants a pH 4,6, u bien baixo l'acción d'enzimas especificas, como a quimosina, extracto de maceración d'o cuallar de vediello que, con un atra enzima, a pepsina, forman o cuallo.

En tecnolochía quesera se distingue doncas dos tipos de coagulacions:

  • A coagulación acida.
  • A coagulación enzimatica.

En aragonés o proceso de coagulación d'a leit s'expresa con o verbo triar-se u trigar-se, mainemos qualques autors dan una accepción diferent d'este verbo y lo rechistran con o significau de "pasar-se a leit"[1]. A leit que s'ha trigau ye a "grullada", parola relacionada con o latín VOLUCULU[2]. En aragonés chistabín se reculle a parola grullo con o significau de "siero de leit"[3], pero se fa servir poco"[4]. En aragonés de Valle de Vio se reculle brullo, tamién derivau de VOLUCULU pero con o significau de "requesón"[5].

Referencias[editar | editar código]

  1. (es) Chabier Tomás Arias. El aragonés del Biello Sobrarbe. Instituto de Estudios Altoaragoneses, 1999. ISBN 84-8127-095-4, p 308.
  2. (es) Manuel Alvar: El habla del Campo de Jaca. Universidad de Salamanca, 1948, p 212.
  3. (es) Brian Mott: El Habla de Gistain. Instituto de Estudios Altoaragoneses, 1989, pp 131-132.
  4. (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. ISBN978-84-8094-061-0
  5. (es) Artur Quintana i Font: El Aragonés nuclear de Nerín y Sercué (Valle de Vio), Ed. Gara d'Edicions + Institución Fernando el Católico + Diputación de Zaragoza; Zaragoza 2007. ISBN 978-84-8094-060-3, p 51.

Veyer tamién[editar | editar código]