Chueves Santo

A "Zaguera cena" por Simon Ushakov (1685)

O Chueves Santo ye o cinqueno día d'a Semana Santa cristiana. Ye o día en que remata a quaresma y o zaguer chueves antis d'o Domingo de Resurrección.

Ye o día en que se remera a zaguera cena de Chesús con os suyos disciplos antis d'a suya muerte. D'antis más o Chueves Santo yera un día de silencio, a chent no saliba de casa, se feba ayuno y as campanas no bandeyaban como sinyal de rispeto.

Liturchia de Chueves Santo

Antis d'a fiesta de Pascua, Chesús sapeba que yera plegata la suya hora, la de pasar d'iste mundo ta o Pai. Ell, que heba aimau a os suyos que yeran en meyo d'o mundo, lis contrimostró lo suyo amor dica la fin. Mientres cenaban, quan o diaple heba ya enducito a Chudas, fillo de Simón Escariot, a traicionar-lo, sapendo que o Pai li heba meso tot en as suyas mans y que de Dios procedeba y enta Dios tornaba, se devantó d'a mesa, dixó lo manto y, prenendo una tovalla, la se cinyó. Dimpués redamó augua en un barrenyo y se metió a lavar-lis os pietz a os disciplos y ixecar-lis-ne con a tovalla que levaba cinyita. En arrimar-se ta Pietro iste li dició:

-«Sinyor, tu me quiers lavar os pietz a yo?»
Chesús li refetó:
-«Tu no apercazas agora o que yo soi fendo, pero lo replecarás aintro de bell tiempo.»
Li dició Pietro:
-«No me lavarás os piez en a vida.»
Li respondió Chesús:
-«Si no deixas que te lave, no tendrás parti con yo.»
Simón Pietro li dició:
-«Sinyor, si asinas ye, no nomás os pietz, lava-me tamién as mans y a capeza»
Chesús li contestó:
-«O que ya se ye banyato no necesita que li laven que os pietz. Ye de raso lempedo. Tamién vusatros sotz lempedos, encara que no totz»
Chesús sapeba qui l'iba a entregar, por ixo dició:
«No pas sotz totz lempedos.»
Quan lis habió lavato os pietz, prenió lo suyo manto y se posó de nuevas a la mesa. Allora lis dició:

-«Apercazatz o que he feito con vusatros? Vusatros me clamatz Mayestro y Sinyor, y con ragón, porque lo soi. Pos si yo, lo Sinyor y o Mayestro, tos he lavato os pietz, tamién vusatros debez lavar-tos os pietz os uns a os atros. Ye dicir, tos dixo un ixemplo ta que igual como yo he feito con vusatros, faigatz tamién vusatros».(Chn 13, 1-15)

Celebracions en Aragón

Elevación de la Cruz en Zaragoza

En Zaragoza diferents cofadrías (Llegada, Columna, Despojado, Exaltación, Verónica, Crucifixión, Coronación, Silencio, Huerto, Coronación, Resucitado, Prendimiento, Descendimiento y Eucaristía) fan procesions por toda a ciudat.

En o Baixo Aragón se fa a tradicional Rompida de la Hora, en totz os lugars fueras de Calanda, en a meyanueit d'o Chueves Santo.

Día d'ayuno chunto a o Viernes Santo, d'antis mas se treballaba nomás dica meyodía y se creyeba que si s'escobaba dimpués d'ista hora apareixeban formigas en a casa a resta de l'anyo.