Adoba

De Biquipedia
Ir a la navegación Ir a la búsqueda
Este articlo tracta sobre las adobas como material de construcción. Pa las lamas de fusta que fan parte de los tonels, se veiga Adoba (fusta).
Construcción d'adobas.

L'adoba[1][2] (de l'arabe < attub) ye un ladriello feito con una masa d'archila y bella cosa más, secada a lo sol y a l'aire (ixoriada), y sin cocer-la. A diferencia d'os ladriellos, l'adoba, en chunto con o tapial, fa parte d'os materials de construcción basaus en o bardo que no precisan cocción.

L'adoba ye un material de construcción muito antigo, y encara s'emplega en amplas rechions por estar fácil de fer y d'emplegar. Funciona muit bien en rechions de clima seco y soleyau por estar buen aislant termico, anque s'erosiona con as plevidas freqüents. D'antes se podeban fer con lo tarquín de las ceicas, anque en puestos como l'Alto Aragón ye tipico que sen faiga con buro y palla.[3]

Historia[editar | modificar o codigo]

Casa tipica d'os semontanos de Uesca. Buena cosa ye feita d'adobas, anque s'alterna con piedra en os pisos d'abaixo.

La més antiga ciudat conoixida, Çatal Höyük, en Anatolia, de lo VII milenio antes de Cristo, teneba las casas construitas con adobas.

En l'Antiguo Echipto s'empleó l'adoba, fendo-la con limo de lo Nilo, en la costrucción de casas, tumbas (mastabas), fortalezas, y mesmo palacios; encara que estioron los primers en emplegar la piedra tallada pa alzar templos, piramides y atras edificacions monumentals.

En Espanya, l'adoba ye tipica de las rechions secas de Castiella y Leyón u d'Aragón, a on s'anyade palla a lo bardo. Las construccions d'adoba gosan cubrir-se con una napa de lo mesmo bardo, con lo que dan ixa traza tan curiosa a las casas tipicas de Tierra de Campos. Tamién ye usual en rechions semideserticas d'Africa, America Central y America de lo Sud (rancho).

En Aragón, as adobas s'han feito servir por toda la depresión d'Ebro y os semontanos d'o Pireneu de conchunta con os ladriellos y os muros de tapial, pos o clima seco que fa que tarden más en desfer-se, y a manca de piedra, que la feba cara y en bell caso se teneba que trayer de leixos, han feito que o buro estase o principal material popular entre a-saber-los anyos.[3] Aún en o sieglo XXI ye cosa regular que en as zonas rurals se trobe edificacions de fa anyos feitas con iste material.

Elaboración[editar | modificar o codigo]

Muller d'antes más fendo adobas con o molde en a era.

Pa fer as adobas a la manera tradicional como se'n feba en Aragón, lo primero que cal fer ye picar y quitar o buro d'un puesto an que i haiga tierra de buro de buena calidat, y alavetz carriar-lo ta la «era» d'adobas an se vulcará n'un montón pa emplegar-lo dimpués. Una buena era d'adobas gosará estar en un puesto que no sía leixos ni de la mina de buro ni d'una fuent d'augua,[3] pos si no s'habrá de carriar la uno u lo atro, lo que ferá que o proceso se torne un escamallo, pero tamién habrá d'estar bien esposada a o sol y a l'aire.

Dimpués, se socava en o suelo una zancha no guaire fonda, que se diz a «masadera», que ye an se vulcará a tierra de buro y se mesclará con augua aduyando-se con un pozal y un ixau. Pa que o bardo no se crebe quan sía seco, y pa dotar-lo de bella cosa d'estructura, se meterá palla limpia en a mescla. A palla fa que l'adoba que en salga no s'acrebace, pos o buro solo se torna fráchil en secar.

A masa que resulta de tot ixe proceso se saca en unatro pozal y se replena en un molde feito con madera y meso sobre o suelo d'a era, molde que será igual pa todas as piezas, mirando bien que no quede vanos ni espacios bofos adintro que luego farían que l'adoba se crebase. Alavetz s'atabla la cara superior pa que quede plana como la d'abaixo. Pa que a mezcla no se pegue n'o molde s'ixambrará con arena u polvo. Una vez ye plano o molde y pleno con a mezcla, se debanta y, si s'ha espolvoriau bien, l'adoba fresca en saldrá por primer vez d'una pieza.

Era con as adobas mesas a xoriar.

A continación principia o proceso d'ixoriar as adobas. As piezas quedarán esposadas a pleno sol y a l'aire entre varias semanas, dreitament en o suelo d'a era, de manera que l'augua se vaiga evaporando. De contino s'irá chirando as adobas pa que s'ixorien bien por totz laus.[3]

A la fin, se transportará as adobas dica o puesto de construcción an que sían precisas. Ixo se soleba fer con un abrío (un masto u un somero) que se le clavaba un aparello que se deciba «halma»,[3] que yera común en o transporte d'atros materials de construcción como ladriellos y piedras, y va dencima o baste de l'animal.

Referencias[editar | modificar o codigo]

  1. (es) BARCOS, Miguel Ánchel, El Aragonés Ansotano: estudio lingüístico de Ansó y Fago; Gara d'Edizions. Zaragoza, 2007, p 165.ISBN 978-84-8094-058-0
  2. PARDO ASSO, José, Nuevo diccionario etimológico aragonés (voces, frases y modismos usados en el habla de Aragón) (Facsímil); Institución «Fernando el Católico» + Gara d'Edizions. Zaragoza, 2002. ISBN 84-8094-101-4
  3. 3,0 3,1 3,2 3,3 3,4 MONESMA, Eugenio (realizador), Los adobes. Construcción tradicional de una caseta con tierra, paja y agua. (documental).

Se veiga tamién[editar | modificar o codigo]