Adchectivos posesivos tonicos en aragonés

Os adchectivos posesivos tonicos en aragonés se composan de todas as formas d'adchectivo y determinant posesivos tonicos que s'emplega en l'aragonés y que son as formas principals d'introducir a relación de posesión gramatical en l'idioma, con a sola excepción d'os parentescos que demandan d'expresar-se con o posesivo atono.

L'adchectivo posesivo

A forma basica d'o posesivo, en aragonés como en as atras luengas romances, dimana de l'adchectivo posesivo. Os posesivos aragoneses son:

• 1a persona de singular: mío, mía, míos, mías (d'o latín <MEU, MEA, MEOS, MEAS),
• 2a persona de singular: tuyo, tuya, tuyos, tuyas (lat. <TUU, TUA, TUOS, TUAS)
• 3a de singular: suyo, suya, suyos, suyas (lat. <SUU, SUA, SUOS, SUAS)
• 1a persona de plural: nuestro, nuestra, nuestros, nuestras (lat. <NOSTRU, NOSTRA, NOSTRUS, NOSTRAS)
• 2a persona de plural: vuestro, vuestra, vuestros, vuestras (lat. <VOSTRU, VOSTRA, VOSTRUS, VOSTRAS)
• 3a persona de plural: analochica con a tercera de singular.

Son eixemplos d'adchectivos posesivos: «a vaca nuestra», «ha marchau con l'auto suyo», «ixos licotes tuyos», «Que no pasen as uellas vuestras!», «los crío en o huerto mío», «os caixigos suyos», etc. Como se veye, funcionan asinas cuan se meten dezaga d'o substantivo.

O pronombre posesivo

As mesmas formas que s'emplega como adchectivos se puede emplegar tamién como pronombres cuan no i hai substantivo u en a función d'atributo: «Aquel can yera o suyo», «Quiero lo mío», «ixos potes son tuyos», etc.

Construcción d'o posesivo

«O mío trasoro» estaría una forma tipica d'o posesivo tonico en aragonés.

A forma mas tipica de proposición posesiva en aragonés se forma cuan o pronombre posesivo se mete adebant d'o substantivo u, lo que ye mas conciso, cuan l'adchectivo va anteposau entre ixe y l'articlo definiu: o mío libro, a mía camisa, os míos amigos, a suya familia, o nuestro lugar.

Tamién pasa que en l'aragonés oral, pa las formas que corresponde con a tercera persona de plural, a-sobén se prefiere recalcar a pertenencia de quí ye metendo d'él, d'ella, d'éls/ellos, d'ellas por cuentas de meter o posesivo. «A casa d'ella», «o gato d'éls», «l'auto d'él», etc.

Diatopismos

Ansotano

En aragonés ansotano, en zaguerías de sieglo XIX, Jean-Joseph Saroïhandy i documentó as variants d'as formas plurals nueso, nuesa, nuesos, nuesas y vueso, vuesa, vuesos, vuesas. Eixemplos: «Quálo ye o nueso?», «o vueso herencio», «a nuesa fuent», «o nueso lugar», etc. As ditas formas agora son cuasi desconoixidas en ixe dialecto. L'estudioso de l'ansotano Miguel Ánchel Barcos sostiene que ya por ixas envueltas ya debeban coexistir con as formas completas de l'aragonés en l'ansotano, formas que por asimilación habrían rematau por imposar-se, pero que por estar ixas tan curiosas Saroïhandy en replegó buena copia, lo que habría causau un paradigma falso de pensar que yeran as unicas que se i deciba en a val.

Benasqués

En benasqués existe tamién as variants nostro, nostra, nostros y nostras pa la primera persona de plural, y vostro, vostra, vostros y vostras pa la segunda. Tamién tienen as comuns de tot l'aragonés. A vacilación en diptongar u no as vocals largas d'o latín ye una caracteristica definidera d'o benasqués.

Tamién en a variant mas septentrional d'o dialecto (municipios de Saúnc y Benás) ye tipico que faigan as formas plurals de femenino mía, tuya, suya, nuestra/nostra y vuestra/vostra como mies, tuyes, suyes, nuestres/nostres y vuestres/vostres, seguindo a tendencia local de fer os plurals femeninos en -es.

Se veiga tamién

• Articlo definiu en aragonés.
• Adchectivos posesivos atonos en aragonés.

• Datos: Q110100269