Unión Polaco-Lituana
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Unión Polaco-Lituana ye un termin que se fa servir pa referir-se a l'alianza que formoron o Reino de Polonia y o Gran Ducau de Lituania baixo un mesmo monarca en unión personal dende a Unión de Krewo en 1385 y que condució a la creyación d'a Republica d'as Dos Nacions en a Unión de Lublin (1569). En 1386 se desvinió o casamiento reyal d'Eudovichis, filla d'o rei de Polonia Loís d'Anchú y lo gran duque Jogaila. Jogaila se converte a lo catolicismo y fue esleito rei de Polonia con o nombre de Ladislau II Jagellón. Os lituanos y os polacos s'heban unito pa fer frent un enemigo común, a Orden Teutonica y teneban como enemigos comuns tamién a os tartaros d'a Mar Negra. En 1399 muere Eudovichis y o tractau de Vilna de 1401 establió o mantenimiento indefinito d'a unión personal entre Polonia y Lituania. Ye o prencipio d'a Unión Polaco-Lituana, en a que se respectaban as diferencias entre os dos estatos, que yeran gobernatos por o mesmo rei. Esta nueva entidat representó en a suya epoca una potencia important.
En o reinato de Ladislau II Jagellón (1386-1434) os polacos, lituanos y rutens vencen a los caballers teutonicos (que heban ocupato Samotichia) en a Batalla de Tannemberg (1410). Baixo o reinato de Vytautas o Gran Ducau de Lituania s'extendilla dica plegar a la costa d'a Mar Negra.
Casimiro IV reinó dica 1492 y refirmó revueltas contra os caballers teutonicos: d'os nobles polacos en Pomerelia, d'os burgueses de Prusia y d'os marins de Dantzig, (1454-1466) a guerra d'as trece anyatas, que remata por a tractau de Torún, por o que Polonia recupera l'acceso a la Mar Baltica: a Orden Teutonica esdeviene vasalla d'o rei de Polonia y ha de ceder Pomerelia, Dancig y Varmia (Ermland).
L'apocheu d'a Unión Polaco-Lituana contina en o sieglo XVI. En ixe sieglo as amenazas exteriors, (alemans y tartaros) son poco importants. A dinastía de Jogaila a sobén reina tamién en Hongría. En o extenso estato polaco-lituano bi ha una estabilidat y coexistencia entre catolicos, ortodoxos, protestants y chodigos. En o plan cultural bi ha una florata cultural, con penetración d'influencias d'o renaiximiento italiano. A nobleza rutena y lituana se polonizan.
A fins d'o sieglo XVI a Unión Polaco-Lituana encomienza a perder a hechemonía en Europa Centro-Oriental por a presencia en a escena de dos potencias que son puyando: l'Imperio Otomán y Moscovia, futuro Imperio Ruso.
- Os otomans prenen o control de Moldavia (que se disputaban Hongría y Polonia), y ye o mesmo Solimán o Magnifico qui la sozmete. Tamién a costa d'a Mar Negra caye en poder otomán. En 1475 conquieren o sud d'a Peninsula de Crimea a los chenoveses que fan d'o Khanato de Crimea o suyo protectorau, y pa creyar un corredor terrestre en 1484 s'anexionan Buchac (o sud de Besarabia, que yera d'o prencipau de Moldavia) y en 1526 Jedisan, que Vytautas heba adhibito un sieglo enantes a Lituania. En o corredor terrestre de Buchac y Jedisan asientan nogais. Tamién en 1526 os otomans vencen a los hongaros en Mohacs y ocupan parte d'Hongría.
- Moscovia deixa de pagar tributo a los tartaros en 1480 y encomienzan una expansión territorial: con Iván III ocupan Viazma, Briansk, Novgorod Severski, Chernigov, y Basilio III prene Smolensko en 1514.
En a zona d'a Baltica a Orden Teutonica remata de desapareixer por a secularización da Orden en 1525, convertindo-se o suyo gran mayestre en duque de Prusia y vasallo d'o rei de Polonia. En Livonia a solución se retrasa y Iván lo Terrible la invaden ocupando en 1558 Narva y Dorpat. En 1561 se decide un reparto: o grant mayestre Kettler se converte en duque de Curlandia y vasallo d'o rei de Polonia, o estato polaco-lituano s'anexiona a parte central (dita Livonia), y Suecia fa lo mesmo con Estonia, y Dinamarca con a isla de Osel, quedando pendient forachitar a los ocupants rusos.
En textos oficials escritos en a scripta aragonesa no trobamos mencions a la Unión Polaco-Lituana, pero sí en a traducción aragonesa d'o "Libro d'as Marabillas d'o Mundo" de Chuan de Mandevilla como "Reino de Cracovia y de Lituania":
Bibliografía
- André Sellier, Jean Sellier ATLAS DE LOS PUEBLOS DE EUROPA CENTRAL. Acento editorial.