Laco (erosión alveolar)
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- Este articlo ye sobre una forma d'erosión alveolar; pa atros significaus de la parola Laco, vaiga a Laco (desambigación).
Los lacos u gnamas son clots u chicotas depresions que se fan por erosión alveolar en superficies horizontals u cuasi horizontals de ciertas rocas como las piedras d'arena u las rocas metamorficas y ignias con textura granuta.
L'orichen d'un laco ye una irregularidat en la superficie que retién l'augua y permite que se desembolique millor la meteorización.
En la depresión d'Ebro las gnamas son bien estudiadas en lo semontano pirenenco, Os Monegros y semontano iberico. Las estratos de piedra d'arena horizontals u subhorizontals que bi ha en Frayella presentan muitas gnamas.[1] En Tramacet tamién bi ha gnamas tipicas.[2]
Denominacions
La denominación australiana gnama ye d'uso prou cheneral entre los cheomorfologos de tot lo mundo, pero bi ha muitos nombres locals que pueden amaneixer u no en obras cheormorfolochicas. En la Sierra d'Albarracín los lacos que se fan en lo rodeno se dicen "clochas", parola que puet designar a atros cloz u chicotas depresions de lo terreno en ixa zona u en atras de lo Sistema Iberico aragonés u valenciano. En las zonas graniticas de la Meseta Espanyola reciben la denominación de pilancones.
En parlas altoaragonesas actuals l'uso de "laco" que se documenta con sentiu cheomorfolochico ye por eixemplo:
- En lo Semontano de Balbastro ye una basa en piedra viva u lenera que se plena con augua que rechuma u con una fuent.
- En la Val de Rodellar un laco ye un clot que se fa en una lastra y a on permaneixe muito tiempo l'augua.[3]
En zonas a on se charró aragonés dica fa pocos sieglos tamién se puet sentir. Por eixemplo en Castelserás un laco ye una chicota depresión en un camín que lo fa incomodo de transitar.
Referencias
- ↑ (es) Fernando Biarge: Piedra de arena. El paisaje monegrino. Ediciones del Mallo. 2004, pp 58-78
- ↑ (es) Fernando Biarge, José María García Ruiz, Ana Biarge: Roca viva. El modelado del paisaje pirenaico. Diputación de Huesca, 2001. p 100
- ↑ (es) Chesús Vázquez Obrador: Toponimia de Pedruel, Las Almunias y San Hipólito (valle de Rodellar). Argensola: Revista de Ciencias Sociales del Instituto de Estudios Altoaragoneses, ISSN 0518-4088, Nº 87, 1979 , pachinas 103-134
Bibliografía
- (es) Francisco Pellicer Corcellano, María Teresa Echevarría Arnedo: Formas de relieve del centro de la depresión del Ebro. Institución Fernando el Católico. 1989
- (es) Fernando Biarge: Piedra de arena. El paisaje monegrino. Ediciones del Mallo. 2004
- de Pedraza Gilsanz, Javier (1996), Geomorfología. Principios, métodos y aplicaciones, Rueda. ISBN 8472070875.