Equus grevyi

De Biquipedia

Iste articlo tien una bersión escrita con una grafía alternatiba esperimental propuesta por bels biquipedistas á dintro d'o Biquiproyeuto:Grafía. Puede beyer-se aquí.

Zebra de Grevy

Equus grevyi.

Estato de conserbazión

En periglo.

Clasificazión zentifica

Dominio:	Eukaryota
Reino:	Animalia
Filo:	Chordata
Clase:	Mammalia
Orden:	Perissodactyla
Familia:	Equidae
Chenero:	''Equus''
Espezie:	''E. grevyi''

Nomenclatura binomial

Equus grevyi

Oustalet, 1882

Destribuzión de la Equus grevyi en Africa.

A zebra de Grevy (Equus grevyi (Oustalet, 1882)) ye una zebra en grau rezesión d'o zentro-este d'Africa. Ye la más gran de todas las zebras e ha muitas rayas berticals que son muit chuntas, más que no en as altras espezies, e tamién as orellas grans e redondas que la fan de reconoxer cuan la se beye. Anque ye de plano más gran e más fuerte que no la zebra d'as planas, ye más defizil d'entrenar-la, por lo que nunca no la s'ha mirato de domesticar.

Una carateristica sozial d'a zebra de Grevy ye que por contra de como fan as altras espezies de zebras, os mastos d'ésta no forman farens. A suya estratechia ye prener lo control d'una pieza de terreno e mirar de cobrir-ie cualsiquier fembra que trascruze por o suyo territorio.

[editar] Destribuzión

O tamaño d'esta zebra e las suyas colors la fan inconfundible.

As zebras de Grevy abitan o norte de Kenia, dende la ribera d'o río Tana dica l'este d'o laco Turkana. Solament que esiste n'esta parte d'o norte de Kenia e n'una parte más d'Etiopía, á on que se cobillan só que cualques millars d'exemplars. A zebra de Grevy ocupa lo nincho d'entre meyo d'a zebra común (más dependedera de l'augua) e los burros salbaches (d'ambients más xucos). Abita en as planas d'o centro d'Africa, á on que i troba yerba e lastons anque sean xucos pa paxentar-se. En a naturaleza, s'asozia en ramadas con as zebras comuns, ramadas en as cuals siempre predominan as Grevys. Se conoxe que á tamas d'a suya combibenzia las dos espezies no s'ibridan en o meyo natural.

[editar] Comportamiento

De diya u de nueit, a zebra de Grevy ha un comportamiento sozial de raso diferent d'a zebra común. A suya soziabilidat ye semilar, anque sin d'embargo la zebra de Grevy ye territorial e forma grupos obiertos, sin de coesión. Á la contra que la zebra común, l'aseyo reziproco no lo han muito orminoso. A unidat basica d'a suya soziedat ye una fembra con o suyo potro, u con os suyos dos u tres potros más chobens. Estas familias son combinadas en grupos de 2 á 10 fembras con os suyos chobens, anque son poco duraderas e se disgregan fazilment. Os grupos tamién pueden encluyir atras espezies de zebras, como las comuns, e encluso espezies d'antilopes. En as sequeras, os grupos solen encluyir muitos más exemplars, con rebaños mistos de 100 u 200 exemplars, que á ormino brincan ta os 450 animals. Os rebaños migran chuntos ta buscar-se millor pasto anque dempués se dispersan pa no fer-se estorbo cuando falta la yerba.

Os mastos adultos son solitarios e territorials. Cheneralment, han territorios d'uns 6 km², las güegas d'os cuals solen á conzidir con azidents topograficos como la lera d'un arrueyo u semilar. Os bartos marcan os lemites d'os suyos dominios con orina e pilas de boña, antimás d'aber lo costumbre de fer-se notar a presenzia fesica con o suyo grito, contrazia d'o relinco d'o somero e lo ronque d'o hipopotamo. Á ormino, e si las condizions d'augua e alimento son adecuatas, os mastos más territorials pueden permanexer encluso en os suyos territorios por mientres de tot l'año, sin de chuntar-se con as migrazions con as cuals sólo marcharían as fembras, que las pueden aguardar que tornarán con o tempero de criar. Os mastos territorialss tamién sozializan en as güegas d'os suyos territorios por mano de tot un ligallo de rituals, e ocasionalment con peleyas ebentuals en as cuals as bestias se pretan os cuellos e mosigan o suyo albersario e se sueltan firmes calzes.