Trifolium

Trifolium
Follamen de Trifolium repens
Denominacions populars
Teflas, treflas, trefolio, trefollo
Clasificación scientifica
Dominio:	Eukaryota
Reino:	Plantae
División:	Magnoliophyta
Clase:	Magnoliopsida
Subclase:	Rosidae
Orden:	Fabales
Familia:	Fabaceae
Subfamilia:	Faboideae
Tribu:	Trifolieae
Chenero:	Trifolium
Descripción
Trifolium L., 1753
Destribución cheografica
Distribución de Trifolium.

As teflas u treflas (d'o latín <TRIFOLIA; scientificament o chenero Trifolium) son un chenero de plantas fabacias de port herbacio caracterizadas por que no tienen trallos aerio y por as suyas fuellas compuestas con 3 foliolos.

Se'n troba especies en as latitutz subtropicals y temperadas d'Eurasia y America, y en a francha costera d'o norte d'Africa. En o continent africano tamién i ha especies propias de climas tropicals. En total, i ha mas de 300 especies descritas en o chenero.

Descripción [editar]

Son hierbas baixas, de durada anyal, bianyal u perén de pocos anyos de vida, con fuellas compuestas de tres foliolos. Espontaniament en amaneix exemplars que en pueden tener un numero dispar, con 4, 5 u dica 7 foliolos.

As fuellas creixen en roseta, a ran de tierra, pus a planta no disposa de trallos aerios como muitas atras fabacias, y en muitas especies son fuertement fototacticas, o que significa que varian d'inclinación ta concarar-se o millor que pueden contra la luz, seguntes l'anglo en o qual les incida en cada momento d'o día.

Anque no tienen trallos, fan bulbos simples que permiten que as especies bianyals u perens sobrevivan a l'hibierno reducidas a istas estructuras soterranias de resistencia.

As flors son labiadas, d'entre 1 y 5 mm cadaguna, y amaneixen en una inflorescencia en forma d'espiga. A color pende de a especie y, bellas vegadas, tamién de l'exemplar: en o chenero en global son predominants as flors blancas y rosadas, pero tamién en i ha amariellas, moradas y encara royas.