Planta bianyal

De Biquipedia
Ir ta: navego, busca
L'apio ye una conoixida planta bianyal, anque se culle a finals de a suya primera anyada, chusto quan tiene mas volumen de teixius de reserva.

Una planta bianyal ye una especie de planta que completa o suyo ciclo vital en dos anyos, anque a senectut y muerte puede producir-se adintro d'una fracción determinada de o segundo anyo, sin arribar a completar necesariament dos anyos de vida.

En muitos casos, a estratechia d'site tipo de plantas consiste en fer trallos y fuellas aerios en os meses climatolochicament favorables d'o primer anyo, mientres que almagazenan substancias de reserva en teixius especializaus (de regular, soterranios) como radices tuberosas, rizomas, bulbos u tuberclos. Os ditos teixius aerios se marceixen cara ta's meses mas fridos, y a planta rebrosta de primaveras solo ta completar o suyo ciclo; en muitas especies solo ta fer flor, fructificar y alavetz morir.

Son exemplos de plantas bianyals domesticadas a remolacha, a berza, l'apio y a carota. Belatras, como a cebolla, completan o suyo ciclo en dos anyos diferents, presentando en o segundo anyo solo que o teixiu floral (inflorescencia) y o fruito posterior como teixius aerios, por o que a sobent s'entivoca con una blanta bianyal. Manimenos, en o caso d'a cebolla, a planta no muere anque si que seneixen as suyas partes aerias, y o bulbo torna a ser viable a l'anyo tercer, quarto y succesivos, por o que en verdat se tracta d'una planta perén.

Se veiga tamién[editar | editar código]

Vinclos externos[editar | editar código]