Señoría d'Albarrazín
De Biquipedia
|
||||
|
|
||||
| Capital | Albarrazín | |||
| Idioma ofizial | Latín | |||
| Atros idiomas | Aragonés | |||
| Gubierno | Señoría | |||
| Basallo de Santa María e Siñor d'Albarracín | ||||
| • 1170 | Pero Ruíz d'Azagra | |||
La Señoría d'Albarrazín estió un estato cristián gobernato por la Casa d'Azagra que se desembolicó en l'anterior Taifa d'Albarrazín e que se disputaban Castiella e Aragón cuan la Reconquiesta yera prou abanzata, incorporando-se á Aragón en lo sieglo XIII e sieglo XIV.
[editar] Istoria
Lo Siñor d'Estella Pero Ruíz d'Azagra, aliato de lo Rei Lop se fazió con lo poder de Santa María de Aben Razín u Señoría d'Albarrazín comprando-la u rezibindo-la á cambeyo de los suyos serbizios enta 1170. Pero Ruíz d'Azagra trayó con él bels repobladors de Nabarra e la Rioxa que esdebenirían una baxa nobleza propietaria.
En 1172 se creyó lo Bispato d'Albarrazín, dependient de l'Arzebispe de Toledo. La creyazión d'ixe bispato, en cuentra de los intreses de lo bispato de Zaragoza aturó que la señoría d'Albarrazín s'adibise a Aragón, e faborexió los intreses de la dinastía local de los Azagra, que quereban mantener-sen como siñors independients. D'ixa traza la Señoría d'Albarrazín no s'incorporó á lo reino de Nabarra y estió dimpués un estato chicot entre Castiella e Aragón, con un difizil equilibrio cheopolitico.
Lo prozeso de colonizazión feudal tendió a chenerar aldeyas agrupatas d'inmigrants que s'establiban e selezionaban los espazios agrarios més amplos, dixando los atros como esplotazions perifericas u puestos abandonatos. On millor se bei esto ye en Royuela. Los Azagra creyoron un conzello que controlaba a ixas aldeyas e permitiba que las aldeyas ofrexesen una caballería billana. La caballería billana e la baxa nobleza yeran os basallos direutos de los Azagra. Los Azagra teneban a més relazions con los monches de la Orden de Zistels de Piedra e con la Orden de San Chaime (por ixo bi ha una ilesia de San Chaime en Albarrazín).
La Casa d'Azagra entroncó con la Casa de Lara con lo matromonio de Teresa Álvarez de Azagra e Chuan Núñez de Lara. Lo suzesor de Chuan Núñez de Lara iba a estar lo suyo fillo Álvar, que no gobernó porque lo rei Pero lo Gran embadió la señoría, benzió a Chuan Núñez de Lara en la batalla de lo setio d'Albarrazín e lo desposeyó en 1283. Pero III adibió la señoría a lo Reino d'Aragón e li'n donó a lo suyo fillo borde que eba tenito con doña Inés Zapata. La redolada d'Albarrazín estió la zaguera en adibir-se a Aragón, pero la conquista de Pero III no estió definitiba. Pero III reorganizó la señoría, dió lo tetulo de ziudat a Albarrazín, que dica ixe inte yera billa e las aldeyas formoron la Comunidat d'Albarrazín.
Chaime II, reconoxió la inchustizia d'este feito e lo tornó a Juan de Lara en 1298, fillo de lo siñor desposeito, pero como yera aliato de los Zerdas e de lo birrei de Nabarra, Chaime lo tornó a desposeyer. Alifonso IV regalará Albarrazín en 1344 a lo suyo fillo Ferrando, qui lo tenió por 29 anatas. La señoría d'Albarrazín s'adibió a lo reino d'Aragón en 1379 ya pa cutio cuan Pero IV ordenó la muerte de Ferrando.
