Remiro II d'Aragón

De Biquipedia

Remiro II lo Monche

Informazión
Rei en	Aragón
dende	1134
dica	1157
Prezedito por	Alifonso I
Suzedito por	Peronella d'Aragón
Naximiento	1075
Muerte	16 d'agosto de 1157

Remiro II dito lo Monche estió rei d'Aragón entre 1134 y 1157

Dende que yera mui choben pasó la suya vida dedicato a la Iglesia, primero como monche en o monesterio franzés de San Ponz de Tomeras; dimpués como abate de San Pietro lo Biello en Uesca y, de zaguero, como bispe de Roda-Balbastro.

Signum Regis de Remiro II, á los cantos d'a cruz se beyen as letras alfa y omega

O suyo chirmán, o rei Alifonso I, fazió erederas d'os suyos reinos á las Ordens Melitars, pero nengún no quereba cumplir dito testamento y os nobles aragoneses, aplegatos en Chaca reconoxioron á Remiro como rei. Os nabarros esleyoron á Garzía Remíriz. En ixe inte Ramiro yera bispe de Roda-Balbastro, pero abió d'ocupar o tron.

Encara que no teneba esperenzia politica, sefocó con esito bellas rebueltas mientres o suyo reinato, que exerció només que tres años, entre 1134 y 1137.

En o Reino d'Aragón i eba bels bandos nobiliarios que luitaban por adubir mayors cotas de poder y de riqueza. Ixos bandos s'enfrentoron entre ers aprobeitando lo cambeo de monarca. En una d'ixas letigas Remiro II cuasi perdió lo tron, por lo que abió que cubillar-se en Besalú en 1135. Á la suya tornada soluzionó lo poblema mandando escabezar á bels nobles que eban enrestito una carabana de musulmans en tiempo de tregua. Iste suzeso dió orichen á la falordia de "A campana de Uesca".

Se casó o diya 13 de nobiembre de 1135 en a seu de Chaca con Agnés de Piteus, una noble biuda franzesa. D'iste matrimonio naxió a eredera, Peronella o diya 29 de chunio de 1136.

Prometió á la suya filla Peronella, con un año d'edá, con Remón Berenguer IV, conte de Barzelona. O casorio se siña en Balbastro o 11 d'agosto de 1137. O 13 de nobiembre d'ixa mesma añada, Remiro II zedió la potestas d'o reino en Remón Berenguer, anque no pas a dinnidá reyal, que mantenió ta a suya muerte n'o 1157. Dende ixe inte D.Remón, con tetulo de prenzipe d'Aragón y conte de Barzelona, s'encarga d'os dos estatos. En o mes d'agosto de 1150 o conte Remón Berenguer y doña Peronella se casoron en Leida.

D'ista traza, Remiro cumplió a misión de salbar a monarquía.

Os zaguers diyas de don Remiro los pasó entre San Pietro lo Biello de Uesca y San Úrbez de Sarrablo (Uesca). Morió en Uesca o diya 16 d'agosto de 1157 y estió soterrato en a capiella de San Bertolomé de San Pietro lo Biello de Uesca.