Plevia acida

De Biquipedia
Ir ta: navego, busca
Efectos de la plevia acida en una selva de la Republica Checa

La plevia acida se forma quan la humidat en l'aire se combina con l'oxido de nitrochén y lo dioxido d'ixufre emesos por fabricas, centrals electricas y vehiclos que creman carbón u productos derivatos de lo petrolio. En interacción con la vapor d'augua, estos gases forman acido sulfurico y acido nitrico. A la fin, estas sustancias quimicas cayen a la tierra acompanyando a las precipitacions, constituindo la plevia acida.

Los contaminants atmosfericos primarios que orichinan la plevia acida pueden recorrer grans distancias, los vientos los trasladan cientos u mils de kilometros enantes de precipitar en forma d'agualera, rosata, plevia, piedra, nieu u boira. Quan la precipitación se produce, puet malmeter muito lo medio ambient. La plevia acida se considera un impacto ambiental d'escala rechional.

La plevia normal por un regular presenta un pH de d'alto u baixo 5.65 (un poquet acido) por lo CO2 atmosferico, que forma acido carbonico, H2CO3. Se considera plevia acida si presenta un pH de menos de 5 e puet plegar a lo pH de lo vinagre (pH 3). Estos valors de pH s'alcanzan por la presencia d'acidos fuertes como l'acido sulfurico, H2SO4, y l'acido nitrico, HNO3. Estos acidos se forman a partir de lo dioxido d'ixufre, SO2, y lo monoxido de nitrochén, que reaccionan con l'augua y forman acidos.

Los hidrocarburos y lo carbón usatos como fuent d'enerchía, en grans cantidatz, pueden tamién producir oxidos d'ixufre y nitrochén.