Notonectidae

De Biquipedia
Ir ta: navego, busca
Notonectidae
Notonecta.obliqua.-.lindsey.jpg
Notonecta ye o chenero tipo d'os notonectidos.
Denominacions populars
Cucas de remo
Clasificación scientifica
Dominio:
Eukaryota
Reino:
Animalia
Filo:
Arthropoda
Clase:
Insecta
Orden:
Hemiptera
Suborden:
Heteroptera
Familia:
Notonectidae
Descripción
Notonectidae
LATREILLE, 1802

Os notonectidos (pronunciau /notone'tidos/~/notoned'tidos/; scientificament Notonectidae -en latín-), conoixius popularment como cucas de remo, son una familia d'insectos hemipteros heteropteros, depredadors d'atros invertebraus, con costumbres aquaticos y caracterizaus por a suya forma de nadar por debaixo d'a superficie de l'augua, de tripa t'alto y no fendo servir si que as dos patas zagueras ta propulsar-se.

Descripción[editar | editar código]

Todas as especies de notonectidos descritas tienen color marrón u verde quan son secas, con bella marca u parte d'o cuerpo más amarellisca u narancha en bells casos. Submerchidas en l'augua, que ye a forma más freqüent ta veyer-las, as cucas de remo puet pareixer que tiengan brilluras como de plata, especialment en a cara ventral de l'abdomen que ye a que exposan t'alto quan nadan, que son conseqüencia de l'aire atmosferico atrapau contra o cuerpo y que emplegan ta respirar.

O cuerpo ye muit aerodinamico, con a cabeza, o tórax y l'abdomen d'aspecto compacto por a cara dorsal. As alas se plegan contra l'abdomen de forma compacta. Pueden volar, y o fan ta desplazar-se d'entre badinas.

Son animals plans por a cara ventral, encara que ye ixa la cara que gosan exposar a la vista quan nadan, pus o fan sobre a espalda. En a tripa se'n destaca as dos patas zagueras, remeras, que les sirven ta propulsar-se y son prou mas largas y robustas que os dos pars primers. As quatro patas primeras les sirven ta caminar por tierra (quan surten de l'augua y caminan, arrociegan as patas zagueras, inservibles en o medio terrestre), ta amarrar-se debaixo de l'augua u ta capturar y subchectar as suyas presas.

Quan os notonectidos caminan en tierra arrociegan as patas zagueras, inútils difuera de l'augua.

Tienen pelos hidrofobicos por tot o cuerpo, pero especialment en l'abdomen, a on que retienen una gran bambolla d'aire apegada contra o cuerpo y en comunicación con o estigma u espiraclo principal de o sistema traquial, por a on que respiran, que se troba en o extrimo ventro-caudal de l'abdomen. Tipicament, quan puyan ta la superficie ta recambear l'aire, se refirman contra la cara inferior de a lama superficial con o mesmo extremo caudal de l'abdomen (tot metendo en comunicación o sistema traquial con l'atmosfera) y con o segundo par de patas, de forma que asemellan un tripode cabeza t'abaixo. En meter-se en comunicación, l'hidrofobismo d'os pelos de l'animal causa un efecto semi-micelar en o telo superficial de l'augua, gracias a la tensión superficial en a interfase, de forma que o estigma caudal queda en comunicación con l'atmosfera de forma seca y segura, tot desalpartando-se l'augua de forma automatica y privando que pueda penetrar y obturar os canyos d'o sistema traquial de l'insecto.

No tienen garra sistema de control de a densidat corporal que les sirva ta aguantar-se a qualque profundidat de forma voluntaria, por o que quan nadan submerchius han de bater as patas zagueras de forma constant u agarrar-se contra la vechetación u o substracto, pus quan deixan de fer-lo tornan a puyar ta la superficie inmediatament.

Alimentación[editar | editar código]

As cucas de remo son depredadors voraces y pueden estar canívals. En a imáchen, un imago (adulto) de Notonecta spp. devora una nimfa.

As cucas de remo son animals depredadors d'atros invertebraus, especialment insectos que naden u que haigan puesto cayer sobre a superficie de l'augua. Detectan as mimbracions en a superficie de l'augua quan son refirmaus, respirando, en a cara inferior d'o telo superficial.

Como os suyos parients os teixidors, as cucas de remo s'abalanzan sobre as presas quan sienten as mimbracions en a superficie. Comparten l'hábitat muit a sobén con os teixidors, de forma que compiten por l'alimento, anque por poder cazar submerchidas as cucas de remo tienen acceso a atras presas que os teixidors no pueden encalzar.

Como totz os hemipteros, os notonectidos no tienen piezas bucals capables ta rosigar u masticar l'alimento, sino que por cuentas d'ixo tienen un aparello bucal modificau, conoixiu como estilet, que les sirve ta perforar o exoesqueleto d'as presas y chuflar-les saliva y enzimas liticas en o interior que les liquan os organs internos. Dimpués, se limitan a zurrupar o liquido resultant y albandonan a carcana vueda en rematar.

Ista peculiar forma d'alimentación, en os insectos depredadors, tiene un inconvenient: cal inmovilizar y subchectar a la presa bells minutos dica que as enzimas fan efecto y muere y se le disuelve o interior, y en conseqüencia puede consumir-se. Ixo significa que os insectos que s'alimentan asinas son muit vulnerables a que les saquen a presa antes de consumir-la, por o que, quan cazan, se miran ta retirar ta bell endreto discreto y amagau a on que puedan disfrutar de a lifara o mas luent posible d'os suyos concheneres.

Fizada[editar | editar código]

O estilet sirve ta fizar quan l'animal se siente menazau.

As cucas de remo fizan. A la contra de como os teixidors y atros hemipteros, que se miran ta fuir siempre que pueden y gosan albandonar l'augua y fuir por tierra quan se sienten menazaus, os notonectidos s'amagan en o fondo y si se sienten amenazaus u sienten o suyo espacio vital periglosament invadiu, eventualment pueden atacar.

A fizada no se realiza con garra fizón, sino con o estilet bucal, y instantaniament inchectan una cantidat reducida d'a suya saliva y suco gastrico en a piel de l'intruso, o que, en os sers humans lo menos, produce un efecto muit desagradable, con una sensación de dolor aguda instantania, como una punchada d'agulla hipodermica, que se desvaneix a escape y deixa una tremoleta, como sensación de forniguetas, que dura bells minutos. Se tracta d'una fizada purament defensiva, disuasoria, y l'insecto se retira a l'inte d'haber atacau.

Anque a sensación de a fizada a l'inte puet estar encara mas intensa que a de belatros insectos fizadors, como por exemplo as graspias, as substancias inchectadas gosan difundir en o torrent sanguinio, disolvendo-se, y os danyos tisulars remanents son muito menors y quasi imperceptibles pasau sisquiera bell par d'horas: no amaneix ni granet, ni queda royo ni res, pero fa un mal y una sensación desagradable de fornigas en os primers minutos d'haber fizau.

Imáchens[editar | editar código]

Se veiga tamién[editar | editar código]

Vinclos externos[editar | editar código]