Gerridae

De Biquipedia
Ir ta: navego, busca
Gerridae
Gerris by webrunner.JPG
O chenero Gerris ye o chenero tipo y un d'os mas conoixius en a familia.
Denominacions populars
Sastres, zapaters, teixidors, teixedors, aclaradors, lavaderas, anadons, ruedabasas, rodabasas
Clasificación scientifica
Dominio:
Eukaryota
Reino:
Animalia
Filo:
Arthropoda
Clase:
Insecta
Orden:
Hemiptera
Suborden:
Heteroptera
Superfamilia:
Gerroidea
Familia:
Gerridae
Descripción
Gerridae
Leach, 1815

Os guerridos (scientificament Gerridae -en latín-), popularment conoixius como sastres[1], zapaters/os[1] u teixedors/teixidors, son una familia d'insectos hemipteros heteropteros, depredadors d'atros invertebraus, de costumbres aquaticos y caracterizaus por a suya forma de desplazar-se sobre a superficie de l'augua gracias a la tensión superficial d'iste elemento.

A familia concabe a mas de 1.700 especies d'insectos, d'entre as quals o 90 % habitan en augua dulza, y un 10 % se gosan trobar en augua de mar.[2]

Descripción[editar | editar código]

Os guerridos se caracterizan por tener as patas largas y obiertas ta os costaus, sin que puedan replegar-las ta o centro d'o cuerpo. As zarpetas terminals d'as patas de totz os insectos en ista familia son retráctils u se pueden debantar, de forma que l'animal as puede fer servir quan camina por tierra, y sacar-las de que faigan contacto con a superficie d'o liquido quan dentra en l'augua.

Tienen pelos hidrofobos en as patas y en o cuerpo. Os d'as patas son os responsables de a suya flotabilidat, pus les permiten de caminar sobre a superficie de l'augua gracias a la tensión superficial. Os pelos d'a resta d'o cuerpo impiden que l'animal se muixe con gotetas d'augua y que s'afunda en l'augua por o peso. Os pelos corporals tamién atrapan una napa d'aire contra o cuerpo si l'animal se vei submerchiu (forzadament), de forma que torna inmediatament ta la superficie por a baixa densidat. En os puestos a on que istos animalons abundan, un chuego espontanio entre os ninos ye o que consiste en mirar d'afundiar-los con un palet u una branqueta y veyer como tornan a amaneixer a escape.

A mayoría d'especies se desplazan sobre os dos pars de patas zagueras, mientres que as dos primeras les sirven de palpos ta detectar as mimbracions de o telo superficial de l'augua, y ta subchectar as presas mientres s'alimentan d'ellas.

Como totz os hemipteros, os guerridos tienen l'aparello bucal modificau de forma que no disposan de partes bucals aptas ta rosigar u masticar a las suyas presas. A la contra, o que fan ye perforar-las con o estilet y inchectar-les una saliva muit rica en enzimas liticas, que disuelven os organos internos de a presa, y dimpués os zurrupan.

Alimentación[editar | editar código]

Una nimfa (pre-adulto) de sastre que ha atrapau una abella.

Totz os guerridos son depredadors d'atros invertebraus, especialment insectos terrestres y/u voladors que espontaniament caigan en l'augua. Son conoixius por a suya voracidat y a velocidat con a qual s'arrullan contra la presa en quanto sienten as mimbracions de l'augua, competindo entre ellos quan a victima ye chiquinina. Una experiencia curiosa ye arrullar-les atros insectos de fácil capturar, como por exemplo as fornigas, y observar como se tiran ta pillar-los y como dimpués s'encorren os uns a os atros mirando ta sacar-se la presa mutuament.

S'agosan a atacar a presas de muitas midas, tamién as que son muito mas grans que ellos. Pueden tener comportamientos cooperativos en a captura de presas grans, como si sabesen que as secrecions bucals d'un solo d'ellos no son prou ta matar a presa. Manimenos, quan a victima ye un insecto chicorrón, a tendencia ye chusto la oposada y se tornan muit competitivos, mirando ta fuir con a presa sisquiera l'han capturau.

Como totz os hemipteros, no pueden fer sique perforar o exoesqueleto de as suyas presas y inchectar-les a saliva, rica en enzimas, que liquan a la presa por adintro. Dimpuesas, absorven o conteniu y albandonan a carcana. Ista forma d'alimentación requiere bells minutos de retener a la presa ta que as enzimas puedan actuar, y por ixo se presentan as conductas de firme competitividat y persecución d'entre ellos, pus a l'individuo le resulta especialment rentable robar as presas d'atri, que ya s'ha perforau y van inchectadas, pus en obtiene l'alimento sin invertir recursos propios.

Imáchens[editar | editar código]

Por cheneros:

Se veiga tamién[editar | editar código]

Referencias[editar | editar código]

  1. 1,0 1,1 (an) VIDALLER TRICAS, Rafel (2004), Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza. ISBN 978-84-8986-235-7
  2. (en) LANCASTER, J.B. & BRIERS, R. (2008). Aquatic insects: challenges to populations. CABI.

Vinclos externos[editar | editar código]