Enzima

De Biquipedia
Ir ta: navego, busca
Articlo d'os 1000
Modelo d'estructuras proteicas d'a Glioxilasa I d'o ser humano. Una enzima que cataliza reaccions de dimerización d'aldeidos con moleculas que tienen o grupo peptidico Glutatión.

As enzimas son biomoleculas que catalizan (ixo ye, que aumentan a velocidat) as reaccions metabolicas, asobén fendo mas fácil la interacción d'os sustratos d'entre sí. A mayoría d'as enzimas son proteínas y son claus en a mas gran parte d'as reaccions cutianas que pasan a drento d'a celula. Perque cada enzima ye fuertement especifica d'un tipo de sustrato especifico y no catalizan si que qualques reaccions d'entre muitas posibles, o conchunto d'enzimas produeitas per a celula determinan qué reaccions bi podrán pasar.

Como totz os catalizadors quimicos, as enzimas funcionan reducindo l'enerchía d'activación (Ea u ΔG) d'una reacción, aumentando-ne asinas a velocidat de reacción. Como ye regular en os catalizadors, tampoco no son consumitos per a reacción, ni ne modifican as condicions d'equilibrio quimico. Enguán se considera que as enzimas catalizan arredol de bellas 4000 reaccions bioquimicas. Qualques moleculas d'ARN (ditas ribozimas) tamien tienen actividat catalitica en bellas reaccions, y en son un eixemplo muit important qualques rechions d'o ribosoma. Moleculas sinteticas ditas enzimas artificials tamién manifiestan una actividat catalitica pareixita d'as enzimas naturals.

l'Actividat d'as enzimas gosa modificar-se per altras moleculas. Os inhibidors son moleculas que reducen l'actividat enzimatica, os activadors l'aumentan. Muitos medicamentos y verenos son inhibidors enzimaticos. A desparte, l'actividat d'as enzimas tamien se modifica per factors externos como son a temperatura, a concentración de solutos en o environe (p. ex. o pH) y la concentración de sustrato.

Vinclos externos[editar | editar código]