Meropidae
De Biquipedia
| Meropidae | |||||||||||||
|---|---|---|---|---|---|---|---|---|---|---|---|---|---|
 Abellaruelo eurasiatico (Merops apiaster) |
|||||||||||||
| Clasificazión zentifica | |||||||||||||
|
|||||||||||||
| Cheneros | |||||||||||||
Es meropidos (zentificament Meropidae) son una familia de muixons inseutiboros de gran capazidat boladora, migradors, e per un regular de colors muito bitarizas, que son clamatos popularment abellaruelos.
Se pareixen á es suyos parients remotos es martinez pescataires en a suya manera de capturar as presas, salindo con reboladas rapedas dend'una percha á on s'están, e gosan engalzar inseutos en buelo con una gran maniobrabilidat aeria. Como es suyos parients, es abellaruelos escardan es suyos niedos con forma de cado en es taluz e as marguins de faixas cautibatas, luen d'o suelo ta impedir que i dentren gripias predadoras. Se conoix que es suyos més grans enemigos son es fardachos, que s'enfilan t'alto enta es suyos niedos y en deboran es pollez u es güebos.
A consonante con o suyo nombre popular, s'han feto estudeos d'es suyos abitos alimentarios e significatibament, en totas as espezies estudeatas d'ista familia, d'entre o 70 e o 96% d'es inseutos capturatos yeran imenopteros (o grupo d'as abellas e brispas). A razón d'ista predilezión no ye guaire esclatera, pero si que ye conoixito d'o saber popular que istes animals, més que més, son predadors d'as abellas á sobent d'as domesticas, e gosan establir, á tamas d'es apicultors, es suyos territorios de cazata á redol d'es arnals domesticos.
Como no son inmunes contra o bereno d'es inseutos, es abellaruelos tienen una tecnica unica ta rematar as suyas presas antes que no las engorchen; agafando-las fuertament con o largo pico per o torax u mesmo per a capeza, lis claban firmes trucazos contra a mesma branca á on son aposatos, e dica que no son seguros que l'inseuto ye bien muerto, no se'l minchan.
[editar] Enrastres externos
Se beigan as imachens de Commons sobre os meropidos.
Biquiespezies tien un articlo sobre Meropidae.- (en) Abellaruelos
- (en) Abellaruelos d'o Parque Nazional Krueger de Surafrica
- (en) Bideos de meropidos en o portal Internet Bird Collection
