Comunidat d'aldeyas
La comunidat d'aldeyas ye una institución meyeval que consistiba en una agrupación de las aldeyas arredol d'una ciudat u villa, prenendo-ne lo nombre.
Empecipioron a existir con Alifonso I lo Batallero, que veyendo cara la compensación a los nombres con tenencias a cambeyo d'aduyas melitars, pensó que yera millor que los habitadors de las aldeyas reconquiestas en la estremadura estasen los mesmos defensors d'ixa tierra.
Son caracters de las comunidatz meyevals
- No yeran senyorías
- Ampla extensión territorial, cubrindo arias encara por poblar.
- Fuero unico, con churisdicción civil y criminal.
- Base común economico-social, agricola, ganadera, aproveitamiento de monts y pasturas, y defensa mutua. En las comunidatz de Teruel y Daroca l'asambleya pa la recaudación d'impuestos se diciba plega u plega cheneral.
- División en sexmas u sesmas.
Las ilesias de las comunidatz yeran patrimonials. Alifonso I lo Batallero dió en lo [[Fuero de Calatayú] a los habitadors de Calatayú y su tierra las rendas de las ilesias de lo suyo territorio. Tamién s'establió que lo clero heba d'estar autoctono, ye dicir las ilesias heban de ser servitas por fillos de la Comunidat, formando l'Arcedianato de Calatayú. Este modelo fue aplicato en las atras comunidatz.
Las quatro comunidatz que i heba en l'Aragón meyeval estioron:
- Comunidat de Calatayú
- Comunidat de Daroca
- Comuidat de Teruel (deseparata de l'anterior)
- Comunidat d'Albarrazín
Las relacions entre la capeza y la comunidat d'aldeyas en las quatre comunidatz d'Aragón estioron dificils por qüestión de churisdicción, y por diferents intreses economicos, y se distancioron cada vegata més.
Entre os habitants d'as comunidatz d'aldeyas en Aragón quasi no bi heba nobles ni infanzons, a diferencia d'as ciudatz. Os habitants d'as aldeyas y d'as suyas capitals teneban diferents orichens cheograficos y etnicos (aragoneses, vascos, rivers navarros, castellans, gascons, mozarabes, ecetra). Quan a población s'estabilizó os habitants d'estas comunidatz charraban un aragonés con influencia castellana u con caracters de parla de transición con o castellán.
L'aproveitamiento común de selvas, defesas y pasturas estió una d'as causas principals d'a desforestación d'o Sistema Iberico en as comarcas d'o surueste d'Aragón, a diferencia d'as senyorías, as arias controlatas por as ordens melitars u en as que as selvas yeran d'os propietarios d'os mases.
En Castiella i heba una institución equivalent dita Comunidad de villa y tierra.
