Sufixo -tut

De Biquipedia

O sufixo -tut provién d'o latín -TUS, -TUTIS a traviés de l'acusativo -TUTE(M) y se fa servir pa creyar sustantivos abstractos de qualidat a partir d'adchectivos.

A més gran part d'as parolas con este sufixo en aragonés son cultismos derivaus d'os sustantivos abstractos latins con o sufixo -TUS, -TUTIS: choventut, multitut, virtut, lonchitut, ecetra. Bi ha pocos casos que se remonten a la fase romanz.

Actualment a pronunciación d'a -t final d'este sufixo culto se mantién en benasqués coincidindo con os usos medievals; en o resto d'as parlas altoaragonesas esta -t ya no se pronuncia, y s'escribe por razons etimolochicas y de coderencia paradigmatica (en bell puesto se documenta plurals en -tz). Manimenos bi ha derivaus que s'escriben con -d-, como lonchitudinal.

Os usos d'o sufixo -tut en aragonés no siempre coinciden con os d'as luengas vicinas (por eixemplo "servitut" se troba como servidumbre en castellán). A vegadas este sufixo compite en aragonés con atros sufixos. D'esta traza o concepto de "lonchitut" podemos trobar-lo tamién con o sufixo -ura ("largura"), con o sufixo -eza ("largueza"), u con o sufixo -aria ("llargaria").

Bibliografía[editar | modificar o codigo]