Sufixo -acum

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Lo sufixo -acum (celtico *-ākon > gall. -og, bret. -e(u)c, irl. -ach ) ye un sufixo común en la toponimia galo-romana, va dezaga d'antroponimos y indica pertenencia.

En la evolución dende lo latín galico ta las luengas galorromanicas, en occitán ha evolucionau ta -ac (Aureliac, Conhac, Brageirac) a diferencia de lo que ha esdeveniu en francés, a on que ha evolucionau ta -y (Orly) (ta -ay, ta -ey, ta -é..) estando tanto Aureliac como Orly evolucions de lo latín AURELIACUM. En atras luengas d'oïl bi ha evolucions similars a la -y francesa.

Bi n'ha posibles representacions en la toponimia aragonesa, como son los casos d'Ateca, Lechago, Litago y Lumpiac.

Bi ha presencia de toponimos terminaus en -ac en Gascunya, tierra de los antigos aquitanos preceltas. Lo filologo Gerhard Rohlfs interpreta que ye por la colonización tardana galo-romana, entre los sieglos II y III, cuan los galos ya yeran prou romanizaus y la romanización plegaba enta Aquitania-Novempopulania dende ellos.

En Gascunya los toponimos en -ac s'estendillan por la plana de Tarba y un poco mes a lo norte pasan lo río Ador dibuixando una ampla falca que s'adreza enta Pau: ye on que se troban Valirac (VALERIUS), Audirac (ALTERIUS), Clarac (CLARUS), Arsac (ARCIUS), Sevinhac (SAEVINIUS), Poliac (POLIUS).

Mes enta l'ueste se fan escasos: Tarsac (TARCIUS) y Maslac (MASSULA) en la val de la Gave de Pau. En atras zonas son de tot esporadicos: Sevinhac (SAEVINIUS ), Revenac (REBINNUS) en la val d'Osal y los Preishac (PRISCIUS) de la val de la Gave d'Aulorón.

Los zaguers eixemplos se troban a l'este de Dacs. Este sufixo ye ausent de tot en las Landas a lo norte de Dacs, que yera una zona poco poblada en l'antigüedat.

• DOMITIUS, DOMITIACUM > Donzac (DOMITIACUM da en las luengas d'oïl Donzy).
• GAUDIUS, GAUDIACUM > Gaujac (GAUDIACUM da en las luengas d'oïl Jouy, Joué, Gouy, y en las luengas d'oc en atras zonas Gaujac y Jaujac).

Bi ha una reaparición d'estos toponimos terminaus en -ac en las tierras de los basaz arredol de Bazas y cerca de Bordeus.

Lista de toponimos occitans terminaus en -ac

• Albiac (orichen d'un apelliu común en Casp).
• Armanhac (adaptau en aragonés medieval como "Armenyac" u "Armanyac").
• Arcizac-ez-Angles.
• Aureliac.
• Aurinhac.
• La Bastida-Ceserac.
• Bénac (en Altos Pireneus, orichen d'un apelliu común en Albalat de l'Arcebispe; ye tamién l'orichen de l'apelliu catalán Benach).
• Benejac.
• Brageirac.
• Bourriac.
• Cabanac.
• Cadiac.
• Castelbajac.
• Cirac (orichen d'un apelliu común en Casp y de l'apelliu afrancesau u con fonetica nordoccitana Chirac).
• Clarac.
• Conhac.
• Era Marca-Pontac.
• Estirac.
• Gèus d'Arsac.
• Loubajac.
• Maslac.
• Pailhac.
• Paréac.
• Poliac.
• Pouzac.
• Préchac.
• Preishac de Gèusvath.
• Preishac-Navarrencs.
• Revenac (orichen de l'apelliu Rebenaque).
• Saint-Créac.
• Semiac-Blaishon.
• Sevinhac.
• Sevinhac-Meirac.
• Tarsac.
• Tibiran-Jaunac.
• Tilhac (Gers).
• Valirac.

Bibliografía

• (es) Gerhard Rohlfs: La colonización romana y prerromana en Gascuña y Aragón. Archivo de Filología Aragonesa, nº XL. 1988.

• Datos: Q3503005