Sistema reproductivo

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Sistema reprodutor masculín.

O sistema reproductivo u sistema reprodutor ye o conchunto d'organos que entre as suyas funcions prencipals tienen a reproducción d'os sers vivos.

Toz os sers vivos se reproducen, pero bi ha unas cuantas formas de reproducción que pueden estar u no sexuals: escisión, chemación, esporas y partenochenesi son trazas de reproducción asexual. En a reproducción asexual os nuevos individuos son clonicos, ya que comparten una carga chenetica identica, excepto por as mutacions espontanias.

Comparten una mesma sensibilidat a los cambios ambientals, de tal manera que un cambio drastico puet suposar a desaparición de beluna d'istas especies. Manimenos, muitas esporas son formas de vida altament resistents a l'aspera d'a tornada de circumstancias favorables.

A reproducción sexual suposa o intercambio de material chenetico, por o cual os individuos son diferents, excepto en o caso d'os cheminucos identicos. A ventacha d'a reproducción sexual ye que os individuos d'una determinata especie tienen mas capacidat d'adaptación debant de circumstancias adversas, de traza que sobreviven os individuos que pueden adaptar-sen a un determinato cambio u que resisten una determinata malautía.

A reproducción sexual embreca la fecundación que ye a fusión de gametos haploides y forma un cigoto diploide que rematará formando un embrión y un nuevo individuo. A reproducción sexual puet estar externa u interna. Ye externa cuan a fecundación se produce en o medio extracorporal y interna cuan ocurre en l'interior. A reprodución externa suposa a emisión coordinata d'ovulos u de uevos por parti d'individuos fembra y d'esperma por parti d'individuos masclos. D'atra man, a reproducción interna se da cuan a fecundación se produce en l'interior d'o cuerpo de l'individuo fembra que actúa como receptor y que alporta un u uns cuantos ovulos, a la vegata que un individuo masclo alporta o esperma. En o caso de sers hermafroditas se da una fecundación mútua, con os ovulos de cada individuo y o esperma que l'atro li alporta. Os mamifers tienen un tipo de reproducción sexual interna.

Entre os mamifers bi ha diferencias en os prencipios d'o proceso reproductivo: a reproducción prencipia con l'aparellamiento precedito a sobén d'un festeyo, parada nupcial u exhibición por parti d'un miembro d'a parella d'as suyas caracteristicas fisicas u de fortaleza debant d'os competidors. En muitos animals as fembras nomás permiten a copula cuan se troban en o periodo fértil, por lo que a fecundación ye guaranciata y a sexualidat ye muit ligata a la reproducción. En animals como a rabosa y bels mustelidos a fembra puet reabsorber l'embrión si as condicions ambientals son desfavorables. En a subespecie de chimpanzés bonobos os aparellamientos homosexuals y heterosexuals s'emplegan pendendo d'a necesidat reproductiva como una traza de mantener a cohesión social adintro d'o grupo.

As malautías d'o sistema reproductor humán son muit comuns y estendillatas, mas que mas as malautías de transmisión sexual.

Referencias

• Datos: Q7895
• Multimedia: Reproductive system / Q7895