Sierra de Santa Cruz (Sobrepuerto)

De Biquipedia
Ir a la navegación Ir a la búsqueda
Iste articlo tracta sobre o cerro de Sant Cocobat en Sobrepuerto, tamién conoixiu como de Sant Blas. Ta atros emplegos de Sant Cocobat se veiga Sant Cocobat (desambigación), y ta Sant Blas se veiga Sant Blas (desambigación).
O cerro, por o cabo que se conoix como de Sant Blas, dende Basarán.

A sierra de Santa Cruz[1] ye un sarrato (sensu stricto) d'a sierra d'a Oturía que s'adintra en o Sobrepuerto, dica o cuello Basarán (en os arredols de Basarán) y marca buena cosa d'a divisoria d'auguas entre os dos cursos principals de Sobrepuerto: a cuenca d'o barranco d'Oliván y a d'o barranco de Forcos.

A serreta comienza en a partida de monts que se conoix como «de Sant Cocobat», recibindo por ixo o nombre de cerro de Sant Cocobat por ixa part, y remata aman de Basarán en un tozal que se conoix popularment como cerro de Sant Blas por una ermita que i hai alto. O toponimo «de Santa Cruz» se troba asociau, más que más, a la loma que se prolarga entre la un y l'atro mont (loma Santa Cruz)[2]. A parola «cerro» s'ha documentau en Sobrepuerto con un significau sinonimo de «sarrato»[1] que no ye o mesmo que tiene en aragonés en cheneral.

O cerro u sarrato, que tiene forma ueste-este y dimpués chira progresivament dica norte, desparte la valle de Cortiellas con a suya man sud (dita «valle de Sant Cocobat» en o suyo sector alto) contra la valle d'o barranco de Bergusa (afluent d'o barranco d'Oliván), que ye la suya man norte. As dos valles se deseparan bien luego, chirando a d'o barranco de Bergusa ta norte y dimpuesas nor-ueste de camín ta o Galligo, mientres que o barranco de la Valle de Cortiellas (dimpués barranco de la Pera) marcha ueste→este dica o Forcos.

Orografía[editar | editar código]

Toponimia en a Oturía dende o cerro de Sant Blas, en a serreta de Santa Cruz, a par de Basarán.
A Estiva
Valleta d'Isábal
Sarrato de Sarradiblo

O «cerro» ranca d'a man oriental de la Oturía en una zona de vechetación rala colonizada d'abrinzons, que enantes yera pratos, a on que encara se conserva una mallata dita de Santa Cruz[2]. En os primers metros por a on que comienza a deseparar-se d'a montanya d'a Oturía i hai un cuello, que se conoix popularment como «cuello de Sant Cocobat» y comunica as dos baixants d'o sarrato. No s'ha d'entivocar iste «cuello de Sant Cocobat», de menors proporcions, con o puerto de Sant Cocobat (chusto en a man cuentra d'a cul d'a valle de Cortiellas), o qual comunica o Sobrepuerto con o parache de Santa Orosia.

A sierra forma, a partir d'ixe puesto, una loma con alturas quasi contino a redol d'os 1500 mslm, y forma un segundo cuello entre as dos versants que ha nombre de cuello Cortiellas quan pasa a ran d'iste despoblau. A pista que une os nuclios de Basarán, Cortiellas y Ciellas con o puerto de Santa Orosia y, a o suyo traviés, con Yebra de Basa, resigue paralela la cresta superior d'a serreta pero bells metros más t'abaixo por a man solana.

Referencias[editar | editar código]

  1. 1,0 1,1 (es) VAZQUEZ OBRADOR, Jesús. Nombres de lugar de Sobrepuerto, análisis lingüístico. Ed. comarca de l'Alto Galligo. Uesca, 2004. ISBN 84-8127-131-4. Versión dichitalizada consultable en linia
  2. 2,0 2,1 (es) Serrablo, Sobremonte, Sobrepuerto, La Guarguera. Mapa excursionista de los Pirineos. Editorial Pirineo. Uesca 2007. ISBN 84-87997-90-2