Scenic World

De Biquipedia
Ir a la navegación Ir a la búsqueda
Scenic Skyway
Scenic Railway
Katoomba Scenic Railway antis d'estar esviellau (fotografiau antis de 2006)
O trampo más baixo d'a vía de 45 graus de pendient

Scenic World Blue Mountains ye una atracción toristica privada situada en a localidat de Katoomba en os Monts Azuls, Nueva Galas d'o Sud, Australia, a alto u baixo 100 kilometros a l'ueste de Sydney. Scenic World se divide en quatre atraccions, Scenic Railway, Scenic Skyway, Scenic Cableway y Scenic Walkway, una plataforma ta caminar de 2,4 km de largaria sobre un selva antiga. Bi ha quantas instalacions como un parking gratuito tot o día.

Descripción[editar | editar código]

Scenic Railway[editar | editar código]

O Scenic Railway ye un antigo trenet menero inclinau emplegau en l'actualidat con fins toristicas. A sección con mas pendient d'o recorriu tien 52 graus, estando a largaria total de 310 m.[1] Fue construyiu orichinalment ta una mena de carbón y lutita bituminosa que operaba en a val de Jamison en a decada de 1880 ta poder puyar as materias primas quitadas d'a mena. De 1928 a 1945 levaba carbón entre semana y pasachers os cabos de semana. A mena de carbón zarró en 1945, quedando asinas o trenet nomás como atracción toristica. O Scenic Railway estió zarrau temporalment o 13 de chinero de 2013 (encara que o Skyway, Cableway y Walkway continoron ubiertos) ta prencipiar as obras de millora tanto d'as vías como d'os vagons. Os treballos se rematoron y o trenet se reubrió en abril de 2013.[2] O Scenic Railway diz estar o tren de pasachers y o funicular más inclinau d'o mundo. Manimenos o trenet fa servir un sistema de cabrestante[1] y no un vagón con contrapeso, por o que tecnicament no estaría un funicular, sino una mena d'ascensor inclinau. L'autentico funicular más inclinau d'o mundo se troba en Stoosbahn, Suiza.

Scenic Skyway[editar | editar código]

Construyiu en 1958, o Scenic Skyway ye un teleferico situau en Scenic World. Viacha a traviés d'a foz sobre Katoomba Falls, a una altaria de 270 m sobre a base d'a val. O Scenic Skyway orichinal se desmontó o 4 d'abril de 2004 dimpués de trescruzar a foz 587.401 vegadas y en l'actualidat se puet vesitar en a zona de picnic de Scenic World. Se reemplazó por un nuevo modelo en aviento d'ixe mesmo anyo. O nuevo Skyway fue construyiu por as interpresas Doppelmayr y CWA Constructions, y tien una cabina con capacidat ta 72 personas con seccions de cristal liquido que fan que partis d'o sulero se tornen transparents mientres l'atracción progresa en o suyo recorriu. En noviembre de 2005 s'ubrió una segunda estación a l'atro canto d'o barranco, permitindo asinas a os pasachers d'o Skyway baixar-ne y seguir un camín a traviés d'os arbustos ta plegar enta Echo Point. En noviembre de 2017 se quitó a zaguera versión d'o Scenic Skyway. A cabina d'o Skyway ye agora un 30% mas gran, ufre a os vesitants un viache con mas espacio, ye más fácil de puyar-ie y tien wifi gratis.

Scenic Cableway[editar | editar código]

En l'anyo 2000 Scenic World instaló o Sceniscender, actualment dito Scenic Cableway, una telecabina de 84 pasachers d'a interpresa Doppelmayr que pasa sobre una torre de 25 m situada en o rafe d'o barranco y dimpués d'un recorriu de 510 m plega a la estación base situada a 200 metros por debaixo en a val de Jamison.[3]

Restaurants[editar | editar código]

Scenic World tien en l'actualidat en funcionamiento dos puestos ta mercar comida y bebida, o EATS270 y o Terrace Café.

L'antigo Scenic Revolving Restaurant fue esviellau y reubierto en zaguerías de 2012. En iste periodo se sacó o sulero rotatorio. Manimenos o sulero d'o restaurant encara se puet chirar si ye requiesto. Os dos, o EATS270 y o Terrace Café tien balcons con grans zonas a l'aire libre que permiten alufrar as Tres Serols y a val de Jamison.

Os puestos de comida y bebida de Scenic World no gosan ubrir ta cenas, encara que se pueden reservar a istas horas ta eventos privaus u d'interpresa.

Orphan Rocker[editar | editar código]

En 1984 Scenic World prencipió a construyir una montanya rusa conoixida como Orphan Rocker, en honor a la vecina formación rocosa dita Orphan Rock. Ista estió a primera montanya rusa disenyada y construyida de tot en Australia. A caracteristica prencipal d'ista atracción yera que había d'estar una montanya rusa que baixase dende o rafe d'un barranco de 200 m d'altaria. D'antis mas se feba referencia a ista atracción como una montanya rusa "suspendida", ya que encara que tecnicament yera una montanya rusa convencional, os vagons podeban mover-sen d'un canto a l'atro, como si estasen suspendius. En primeras yera planificada como un monorail scenico, pero a la fin evolucionó enta una montanya rusa. A montanya rusa nunca no s'ubrió a o publico debiu a o retraso en o redisenyo de bells d'os suyos components y a la mayor prioridat d'atras atraccions d'o parque.[4] As vesitas a Scenic World puyaron ascape en a decada de 1980, mas que mas debiu a o creixient numero de toristas chaponeses, por o que s'amenistaba un acceso adicional a la val. Ye asinas como naixió a ideaya ta construyir a tercera atracción d'o Scenic World, o Cableway (orichinalment Scenicscender).

Referencias[editar | editar código]

Bibliografía[editar | editar código]

Vinclos externos[editar | editar código]