Sant Pavlo (Zaragoza)

De Biquipedia
Ir a la navegación Ir a la búsqueda
Sant Pavlo
Barrio de Zaragoza
San Pablo Zaragoza 06.JPG
Ilesia de Sant Pavlo
Entidat
 • País
 • Ciudat
 • Districto
Barrio
Flag of Aragon.svg Aragón
Bandera de Zaragoza.svg Zaragoza
Casco historico
Codigo postal 50.003
Carreras prencipals Sant Pavlo, Predicadors, Casta Álvarez, Sant Blas
El Gancho (Zaragoza).png
Situación d'o vico en o Casco Antigo

Sant Pavlo, u más conoixito popularment como o Gancho, ye un barrio d'a ciudat de Zaragoza. Administrativament fa parti d'o districto d'o Casco Antigo, estió un d'os primers desanches medievals d'a ciudat, trobando-se as radices d'ista parroquia arredol de l'anyo 1118.

Destaca a ilesia de Sant Pavlo que le da nombre, construyita en 1259, d'estilo mudéchar y conoixita popularment como a tercera seu de Zaragoza ya que ista parroquia teneba bells d'os privilechios d'as seus. A parroquia de Sant Pavlo enantes de dicir-se asinas se diciba parroquia de Sant Blas. Por un tiempo se diciba parroquia de Sant Blas u parroquia de Sant Pavlo indistintament, pero dende 1270 a unica denominación yera de Sant Pavlo.

O simbolo d'o barrio que tamién le da o suyo nombre popular ye un tocho con un gancho en a suya punta. Iste simbolo tien o suyo orichen en os primers anyos d'a parroquia, entre 1118 y 1119, quan no yera que una ermita situata extramuros, ye dicir difuera d'a muralla d'a ciudat. A romeria que se feba se trobaba en o camín a dificultat d'abanzar entre os árbols y a vechetación, por lo que tenioron a ideya de meter una falz en a punta d'un tocho ta ir tallando as brancas d'os árbols, y d'ista traza apareixió lo que dimpués sería simbolo d'o vico.

A cofadría d'o silencio encluye en o suyo escudo o gancho, simbolo d'o vico

Dimpués en o sieglo XIV o rei Chuan I dió privilechio a la parroquia ta que o gancho ubrise totas as procesions d'a ciudat de Zaragoza. Hue encara encabeza a manifestación d'o Corpus Christi y aquellas que salen dende ista parroquia. En o suyo Romance a la procesión del Corpus de l'anyo 1679, escribe Ana Abarca de Bolea:

Iba lo gancho primero
con muy grande ligereza
cortando todos los ramos
que han posato en las tabernas

O escudo actual d'a parroquia encluye o gancho cruzato con a espata de Sant Pavlo, dencima d'un libro a on que se puet leyer EPISTOLAE SANCTI PAULI, por as epistolas que escribió dito santo.

Se veiga tamién[editar | editar código]

Vinclos externos[editar | editar código]


Barrios d'o districto Casco historico de Zaragoza
La Madalena | Sant Agostín | Sant Miguel | Sant Pavlo | Tenerías | Tubo