Obertauern

De Biquipedia
Ir a la navegación Ir a la búsqueda
Obertauern
Obertauern-Logo.png
Obertauern ski area.jpg
Pistas d'Obertauern
Situación cheografica
Situación Flag of Salzburg (state).svg Untertauern/Tweng, Salzburgo, Austria
Altaria maxima 2.526m
Altaria minima 1.630m
Pistas
Total km. 100 km
Pistas 85
Pista mas gran 2km
Verde.png Verdas
Azul.png Azuls 41
Rojo.png Royas 34
Negro.png Negras 9
Cadmiumyellow.jpg Travesía 1
Cross country skiing pictogram.svg Fundo
Snowboarding pictogram.svg Terrain parks
Esquí nueiturno
Remuntes
Pictogram T-Bar Lift.svg Telesquis 6
Pictogram Chair Lift.svg Telecadieras 18
Pictogram Cable Car.svg Telecabinas 2
Pictogram Rope Tow Cable Car Lift.svg Cintas
Canyons
Superficie km²
Datos chenerals
Pachina oficial www.obertauern.com
Correu-e info@obertauern.com
Telefono +43 (0)6456 7252
Fax +43 (0)6456 7252 9

Obertauern ye una estación d'esquí y centro toristico que se troba en a sierra de Radstädter Tauern en o estau austriaco de Salzburgo. A estación d'esqui ye deseparada en dos localidatz: Tweng y Untertauern.

Cheografía[editar | editar código]

Obertauern ye entre as mayors estacions d'esqui d'Austria.

Obertauern se troba en o sudeste d'o estau de Salzburgo en a cordelera de Radstädter Tauern entre os 1.630 y os 2.526 metros d'altaria sobre o libel d'a mar. O centro hibernal ye amán d'o punto mas alto d'o collau de Radstädter Tauern por o que pasa a carretera de Katschberg (en alemán Katschberger Straße u B99). Obertauern ye trestallau en dos districtos: St. Johann/Pongau y Tamsweg, por o que ye deseparau en os municipios d'Untertauern (Pongau) y Tweng (Lungau). A muga entre os dos municipios ye en o punto mas alto d'o puerto, estando asinas o centro d'a estación d'esqui.

Historia[editar | editar código]

Celtas y romans[editar | editar código]

Obertauern tien una luenga historia que prencipia con os celtas (sieglos IV–I aC). Ya existiba una calzada romana que trescruzaba o paso d'o Tauern (en os Alpes) dica Iuvavum (Salzburgo). S'han puesto trobar marcas feitas por os carros romans que cubriban ista ruta, asinas como fitas antigas que amostran l'uso d'iste puerto por os romans. A millora d'a calzada se fació probablement en tiempos d'o emperador Claudio (anyos 41-54).

Desenvolique d'a ciudat[editar | editar código]

A primera vegada que se nombra o Radstädter Tauern ye en l'anyo 1207. En 1224, os rechistros dicen que bi heba una chicota ilesia en o cobalto d'o paso. En 1517, son decumentadas dos posadas en o Tauern, fendo referencia a las casas de Schaidberg y Wisenegg. Istos dos edificios encara son en servicio actualment. En 1519, s'enampló a carretera ta permitir o paso de carruaches. En 1764, l'arcebispe Sigismund de Schrattenbach ubrió una oficina postal en Untertauern, a on bi heba dos servicios postals cada semana. En 1870 a freqüencia s'incrementó a quatre por semana, y, en 1895, yeran dos por día. En 1902, se rechistran os primers esquiadors.

O centro toristico d'Obertauern[editar | editar código]

En 1920, dimpués d'a Primera Guerra Mundial, os primers esquiadors plegoron enta Obertauern a piet y tresportando o suyo equipache con caballos. Entre 1925 y 1927, se facioron as conoixidas cursas d'autos y motos de Tauern, eventos que atrayeban a muitos vesitants. A chent d'Obertauern data a fundación d'o suyo lugar en o día 8 d'aviento de 1929, ya que ye o día en que prencipió a pasar por primera vegada de traza regular o trafico a traviés d'o paso de Tauern d'hibierno. En 1948, s'instaló o primer remunte en Seekarhaus. Entre 1948 y 1960, as pistas las feban os propios esquiadors, por una hora de treballo en a preparación d'as pistas teneban gratis 3 baixadas. As carreteras y as proteccions contra os lurtes s'amillororon en 1950 y se construyoron tamién os primers remuntes de percha. A creación d'o primer hotel en a localidat d'Obertauern estió en 1952. Entre 1952 y 1961, s'instaloron muitos telesquís, telecadieras y telecabinas modernos.

D'os ueitanta dica l'actualidat[editar | editar código]

En 1961 dentró en servicio una moderna telecabina en Zehnerkar. A l'anyo venient, en 1962, Obertauern se convirtió en o nombre oficial d'a localidat. Un anyo dimpués, a primera maquina pisanieus motorizada d'Austria prencipió a treballar en Obertauern, ya que dica alavez as pistas yeran pisadas a piet por os propios esquiadors. Por ixas envueltas se creyó a "Escuela popular ta esquiadors" (Schifahrende Volksschule) en a que os alumnos esquiaban de tardis dimpués d'as clases normals d'o maitín.

En 1965, Obertauern estió un dos puestos trigaus por The Beatles ta apareixer en a suya cinta "Help!". A localidat fue trigada por estar una d'as pocas zonas que teneban nieu por ixos tiempos.[1]

En l'anyo 1967 se construyó a primera pista fendo servir un bulldozer. O resultau estió un gran cambeo d'o terreno ta fer as pistas mas facils de mantener y de baixar ta os esquiadors, permitindo asinas o suyo uso a un mayor rango d'usuarios. A traviés d'una serie de remuntes se creyó o precursor de l'actual cercuito de Tauern (Tauernrunde).

En 1985 s'instaló o primer canyón de nieu y en os siguients anyos a-saber-los telesquis y telecadieras fuoron esviellaus. Entre 1991 y 1998 s'heban completau quantos prochectos de modernización – como a creyación d'una pista nueiturna iluminada y a introducción d'o sistema de lectura d'o pase d'esquí a distancia. En aviento de 1999, l'alemán Christian Flühr, fació o record d'o mundo de maratón con esquís en Obertauern – esquiando mientres tres días sin aturar (68 horas y 23 minutos), fendo a distancia entre America y Europa. Una temporada dimpués, en febrero de 2001, Christian Flühr tornó a batir o record d'o mundo esquiando mientres mas de 4 días (103 horas y 21 minutos) sin aturar. Dimpués batió o suyo propio record mundial quantas vegadas, encara que en atras localizacions.

Obertauern s'ha estableixiu tamién como un d'os prencipals centros d'après ski d'Austria. O Edelweißalm y a zona d'arredol de Lürzer Alm son reconoixius internacionalment.

Fosal d'o desconoixiu[editar | editar código]

En o punto mas alto d'o collau se trona o "fosal d'o desconoixiu" (en alemán Friedhof der Namenlosen). Dita denominación viene d'os tiempos en que a chent travesaba o collau de Tauern a piet con vestius y equipación malos, muito a sobén con mal orache, morindo muitas vegadas como resultau. A ormino istos viachers no yeran identificaus y por ixo yeran apedecaus como "desconoixiu". Actualment iste ye tamién o fosal d'a localidat d'a estación d'esquí d'Obertauern.

Esporte d'hibierno en Obertauern[editar | editar código]

Esquí y snowboard[editar | editar código]

O lechendario pico Gamsleiten

O esquí ye o esporte mas popular en Obertauern, seguiu d'o snowboard. A estación d'esquí tien alto u baixo 100 kilometros de pistas paradas y 26 remuntes que son capables de tresportar entre 48.000 y 49.000 personas por hora. Os remuntes d'a estación se dividen entre 1 telecabina, 19 telecadieras y 6 telesquís.[2] As pistas se graduan fendo servir o tipico sistema de colors, con pistas fácils marcadas en azul (61%), meyas en royo (35%) y dificils en negro (4%). A pista d'o Gamsleiten 2 ye a pista d'esqui con mayor pendient d'Austria. Os no esquiadors pueden prener totz os remuntes ta puyar, encara que nomás o Zehnerkarbahn y Grünwaldkopfbahn se pueden pillar ta baixar. Os vesitants pueden aparcar l'auto en un d'os 24.000 m² d'aparcamientos que se troban chunto a las pistas. A interpresa Liftgemeinschaft Obertauern (LGO) ye responsable de mantener os remuntes.

O cercuito de Tauern[editar | editar código]

Como os remuntes se troban rodiando a localidat, ye posible fer o "cercuito de Tauern" (Tauernrunde), bien en a endrecera d'as agullas d'o reloch (si se siguen os sinyals royos) u en contra d'as agullas d'o reloch (seguntes os sinyals verdes). Ta trescruzar a carretera B99 (Katschberg-Straße) bi ha puents ta pasar esquiando en as pistas de Gamsleiten/Edelweiß, Kirchbühel (dos puentes) y Grünwaldkopf/Zehnerkar. O cercuito puet prencipiar-se en qualsiquier remunte, tornando dica o mesmo punto en rematar. A buena senyalización fa que sía posible esquiar tamién difuera d'as pistas.

Esquí nordico[editar | editar código]

A más d'as pistas d'esquí alpín y snowboard, Obertauern ufre atras actividatz esportivas d'hibierno. Os vesitants pueden fer servir os 26 kilometros de pistas paradas ta esquí nordico, incluyindo una que se fa servir en a copa d'o mundo, asinas como bellas pistas ta fer senderismo.

Pases d'esquí[editar | editar código]

Obertauern tien o suyo propio forfait que, dende a temporada 2012/13, tamién ye valido ta la vecina rechión de Großeck-Speiereck, que se troba a nomás 15 kilometros de distancia. O Lungo Ski Pass (ta a rechión Obertauern - Lungau - Katschberg) y o "Super Salzburg Ski Card" (Estau de Salzburgo) tamién son validas, pero no'n ye o pase de Ski Amadé.

Referencias[editar | editar código]

  1. (en) Jeremy Skidmore (20 de febrero de 2012). "Help! Ski classes for intermediates in Obertauern, visited by the Beatles". Travel. Telegraph Media Group. http://www.telegraph.co.uk/travel/snowandski/9093707/Help-Ski-classes-for-intermediates-in-Obertauern-visited-by-the-Beatles.html#. Retrieved 11 de chulio de 2012. 
  2. (en) "Trail Map". Ski & Snowboard. Obertauern Tourism Association. http://www.obertauern.com/en/winter/ski-snowboard.html. Retrieved 26 d'aviento de 2011. 

Vinclos externos[editar | editar código]