Muriwai

De Biquipedia
Ir a la navegación Ir a la búsqueda
Muriwai Beach
Vista enta o norte

Muriwai, tamién conoixida como Muriwai Beach, ye una comunidat costera situada a l'ueste d'a Costa d'a rechión d'Auckland en a Isla d'o Norte de Nueva Zelanda. A placha d'arena negra, ideyal ta o surf, y a suya redolada constituyen una popular aria de tiempo libre ta os habitants d'Auckland. Existe una gran colonia con niedos de Morus serrator en as suyas rocas.

Situación[editar | editar código]

Muriwai ye alto u baixo a 17 km a l'ueste de Kumeu, 42 kilometros a o norueste de d'a ciudat d'Auckland, en o estremo sud d'un brazo de placha de 50 kilometros que remata en a costa d'a mar de Tasmania chusto en a desembocadura d'a badía de Kaipara. Ye una d'as muitas plachas populars que bi ha en ista zona (estando-ne atras Piha y Karekare), por ixo experimenta un gran creiximiento en a suya población en verano, quan os habitants d'Auckland vienen a la mar. Administrativament se troba en o districto electoral de Rodney Ward en a rechión d'Auckland.

Estatisticas[editar | editar código]

O censo oficial de 2013 indicaba que o numero residents permanents de Muriwai Beach yera de 1.131 personas. O ingreso medio d'os habitants de Muriwai Beach yera de 39.500$, contimparau con o 29.600$ d'os habitants d'Auckland. Mas d'o 93% d'a población d'a ciudat ye formada por blancos d'orichen europeu. A tasa d'ature yera d'o 4%.[1]

Cheolochía[editar | editar código]

Formacions rocosas en Muriwai

Cheolochicament a playa ye formada d'arena y piedras y antigos materials vulcanicos, con muitas concrecions y capas en as suyas penyas.

A placha de Muriwai tien arena negra, debiu a o suyo conteniu en fierro causau por os antigos vulcans d'a zona, incluyindo o gran "vulcán Kaipara" que yera situau en o litoral interior en a zona de Kaipara Heads y que esclató fa entre 23 y 16 millons d'anyos.[2] L'arena negra se desplazo a o largo d'a costa occidental d'a Isla d'o Norte levada por as corrients marinas. Ista aria ha conservau gran parti d'a suya polideza natural y a suya situación isolada.

Parque Rechional de Muriwai[editar | editar código]

Morus serrator en Muriwai

Gran parti d'o terreno situau en o estremo sud d'a placha fa parti d'o Parque Rechional de Muriwai. Maukatia (Maori Bay), a o sud, ye deseparada de Muriwai Beach por Otakamiro Point, que aculle entre as suyas penyas y rocas a unica Colonia de Morus serrator d'a rechión. A zona ha estau identificada como una Aria important ta a conservación d'as aus, por BirdLife International.[3]

O Parque Rechional incluye un campo de golf a o largo de Coast Rd, y l'aria a o norte d'Okiritoto Stream que ye conoixida como "Five Mile Strip" u "Five Mile Block" (literalment a "francha u bloque d'as cinco millas") debiu a la suya largaria aproximada. Un parking de caballos (zona ta aparcar carrozas de caballos) ye situau a o sud d'Okiritoto Stream. Se i puet acceder tamién en auto todoterreno dende iste punto.

A zona de Five Mile Block ofreixe camins ta fer en caballo u a piet.[4] Os ciclistas pueden disfrutar d'a carretera de Coast Rd dica a muga d'o Parque Rechional (encara que ye viedau de dentrar en a selva adchacent de Woodhill). Tamién bi ha muita chent fendo una gambada con os suyos cans por a zona, ya que bi ha muitas zonas en as que os animals pueden correr sin haber d'estar ligaus.

Referencias[editar | editar código]

  1. (en) "2013 Census QuickStats about a place: Muriwai Beach". Statistics New Zealand.
  2. (en) https://researchspace.auckland.ac.nz/handle/2292/4872
  3. (en) BirdLife International. (2012). Important Bird Areas factsheet: Gannet Island. Downloaded from http://www.birdlife.org on 2012-02-16.
  4. (en) "Muriwai Beach and Regional Park". NZ Bridleways.

Vinclos externos[editar | editar código]