Penyas (costa)

Este articlo ye sobre las penyas como forma costera. Pa atros significatos d'as palabras penya u penyas vaiga a penya (desambigación).

Penyas de Moher (Irlanda).

Esquema de formación de las penyas costeras. Texto en francés.

Unas penyas (u puntualment un salto), son unas costas rocosas con una pendient quasi vertical que se forman por la erosión que producen las ondas marinas, fendo que las penyas s'esboldreguen y retaculen, devez que la mar abance y creye una plataforma d'abrasión en a zona a on dinantes plegaban las penyas. Estas penyas se pueden decir tamién "cinglos" si la suya part superior corresponde a una superficie con plans u replans, no necesariament horizontals, pero paralelos a la estratificación.

Las ondas d'a mar trencan contra la base d'as penyas producindo una erosión contina. Quan l'augua d'a onda de mar entra en as crepas comprime l'aire que bi ha, y quan l'augua se'n retira l'aire comprimiu s'expande y va esgallando y crebando la roca. L'augua va foradando la roca, va creyando covachas, esplugas dica que la masa rocosa que bi ha dencima d'estas espacios vuidos de roca s'esboldrega, con esbalzadas y eslices. Si la roca d'as penyas ye masiva y compacta este proceso de compresión y expansión de l'aire ye menos efectivo, pero las ondas d'a mar pueden igualment ir esgarrapando la base con los materials erosionaus que transporta l'augua.

Los trozos de roca que cayen a l'augua pueden mover-se por la fuerza d'a mar, se desgastan por l'acción d'as ondas d'a mar y s'esminglanan, quedando redondeyaus, y achiquius. Quan son prou chicos las corrients de deriva litoral se'n pueden levar estos materials sueltos a las plachas. Entre los livels de marea alta y marea baixa, a piet d'as penyas se forma una plana un poquet abocada enta la mar dita plataforma d'abrasión, y por debaixo d'o livel de marea baixa se forma una faixa acumulación.

Denominacions

Las penyas sobre la mar mes altas d'Europa son en Santo André de Teixido (Galicia).

En as parlas altoaragonesas no bi ha una denominación tradicional especifica pa estas formacions litorals porque a on se charran no bi ha costa. Pa despenyaders por un regular mes grans que los cinglos y las ripas bi ha denominacions como salto u penya. En textos aragoneses medievals por un regular trobamos la denominación de penyas en pluralia tantum. A vegadas tamién trobamos salto en singular, referindo-se a puntos mes concretos.

En "Historias contra los paganos" d'Orosio, se fa mención d'as costas d'una part d'a mar Roya como penyas:

Entro a Egipto e al çaguero puerto de Arabia, qui es de la part meridional, luengo e estrecho por las penyas e islas muit altas e fragosas, el cual parece desde el Mar Bermejo (esto es, del Oceano), enta occident

En a "Cronica de los Conquiridors" leyemos tanto penya como salto, encara que salto ye un termin que i apareix pa traducir atros conceptos en atras partz d'o libro:

et de continent corineu todo yrado recobro fuerça et priso goemagot estrenyen fuerment a goemagot et puso se lo en los musclos et corria ayna ala riba dela mar et gito a goemagot que tenia en el cuello. et de aqui puyosen en cabo de una penya muyt alta ala riba dela mar et gitolo dentro en la mar. Et antes que goemagot fuesse caydo en la mar fue espeçado en muchas pieças. por que cayendo feria adiesso en una piedra adiesso en otra. Et la mar fue sangrienta dela sangre de goemagot. asi que aquel lugar entroal present dia es llamado salto de goemagot.

Bibliografía

• (es) Eumenio Ancochea Soto, Francisco Anguita Virella, Fernando Moreno Serrano. Geología Procesos Externos. Editorial Edelvives, 1990.
• (es) Francisco Anguita Virella, Fernando Moreno Serrano. Procesos geológicos externos y geología ambiental. Editorial Rueda, 1993.