Motorland Aragón

De Biquipedia
Ir ta: navego, busca
Logo Motorland.png
Motorland Aragón. Sacacorchos. 2009 World Series by Renault 3.5.jpg
Información cheneral
Localización Alcanyiz, Aragón Flag of Aragon.svg
Disenyador Hermann Tilke y Pedro de la Rosa
Eventos prencipals Moto GP
Superbikes
World Series by Renault
Motorland Aragón FIA.svg
Grand Prix FIA
Longaria 5.344,53 metros
Curvas 18
Tiempo record 1:44.833 (James Walker, P1 Motorsport, 2009)
Grand Prix FIM
Longaria 5.077,65 metros
Curvas 16
Tiempo record 1:49.521 (Dani Pedrosa, Repsol Honda, 2010)
Cercuito RFEdA
Longaria 2.646 metros
Curvas 18
Cercuito RFME
Longaria 2.379,12 metros
Curvas 11

Motorland Aragón u tamién dita Ciudat d'o Motor d'Aragón ye un complexo adedicato a o motor situato amán d'a ciudat aragonesa d'Alcanyiz en o Baixo Aragón teruelano. Se troba situato en una plana amán d'a Estanca d'Alcanyiz, a bells 5 km d'a ciudat, estando a suya aria d'influencia de 25 millons d'habitants en un radio de 300 km[1]

Anvista de Motorland, con a Estanca d'Alcanyiz dezaga de tot y a la dreita.

Con una amplaria de 350 hectarias (1.320.000 m²), mas gran que a ciudat d'Alcanyiz, ye dividita en tres cercuitos: un cercuito de karting, atro de tierra y o más important, o cercuito de velocidat, con una recta prencipal de 1.726 metros que fa que sía un referent mundial en a realización de prebatinas aerodinamicas.

Tamién encluye un parque tecnolochico de 21 hectarias ta rechiras y prebatinas de materials d'os fabricants de vehíclos y un centro comercial.

Motorland Aragón ye herencio d'una ampla tradición automobilistica en Alcanyiz que prencipia en l'anyo 1965 con a celebración d'a primera cursa en l'antigo cercuito urbán Guadalope.

En l'anyo 2010 estió premiato por a Professional MotorSport World (PMW) como o millor complexo d'o esporte de motor.[2]

Historia[editar | editar código]

Antecedents[editar | editar código]

Logo d'o Cercuito Guadalope

Alcanyiz tien una larga tradición y trachectoria automovilistica, o primer Premio Ciudat d'Alcanyiz fue celebrato en l'anyada 1965 en o cercuito urbán Guadalope. A ciudat tamién aculle o Rally de Tierra d'Alcanyiz, o qualo fa parte d'o Campionato d'Espanya de rallies.

O cercuito urbán d'Alcanyiz (1965 – 2003)[editar | editar código]

Ta más información se veiga l'articlo sobre o Cercuito Guadalope

O cercuito urbán d'Alcanyiz, creyato en l'anyo 1965, ha acullito competicions automovilisticas dende a calendata d'a suya inauguración dica 2003 quan se celebro o "XXXVII Premio Ciudat d'Alcanyiz" habendo-se deixato de fer nomás en 1980 y 1981 por razons de seguridat y en 1998 por problemas burocraticos con a Federación Espanyola d'Automovilismo.[3]

Ya dende l'anyo 1992 prencipioron a planteyar-se problemas de seguridat que facioron que hese de limitar-se a velocidat d'os autos en o cercuito, dificultando a organización de cursas de primer ran. En zaguerías d'a decada de 1990 amaneixió a ideya de construir un complexo d'o motor a man d'a ciudat que permitise poder celebrar competicions de ran internacional. Asinas ye como prencipia o prochecto de l'actual Motorland.

Prochecto d'a Ciudat d'o Motor[editar | editar código]

Antigo logo d'a Ciudat d'o Motor
Pedro de la Rosa y Antonio Lobato en a presentación d'o prochecto en Zaragoza

En os zaguers anyos d'a decada de 1990 a Federación Espanyola prencipió a meter trabas a la celebración d'o Gran Premio ciudat d'Alcanyiz decindo que o Cercuito Guadalop no reuniba as condicions de seguridat que yeran menester, encara que o cercuito teneba totz os meyos de seguridat que desichiban os reglamentos nacionals y internacionals.

Asinas a la fin a Federación Espanyola d'Automobilismo quitó a licencia ta a realización de prebas a ran estatal, quedando nomás as competicions organizatas por a Federación Aragonesa. Os ingresos baixoron muito y en 2004 ya no se podió celebrar o Gran Premio Ciudat d'Alcanyiz.

En l'anyo 2001 se constituye a empresa publica "Ciudat d'o Motor d'Aragón" con l'obchectivo d'a creyación d'una futura zona d'ocio arredol d'o motor en a ciudat d'Alcanyiz. Fan parti d'o Consello d'Administración d'iste prochecto o Gubierno d'Aragón, a Deputación Provincial de Teruel y o Concello d'Alcanyiz. Dende o prencipio istas tres institucions han treballato chuntas ta desembolicar o prochecto, incluyendo-ie tanto os tramites administrativos y adchudicación d'as obras como a financiación d'as mesmas.

Actualment o vicepresident d'Aragón, José Ángel Biel, ye president d'o Consello d'Administración de Motorland y o director cherent d'o Instituto Aragonés de Fomento, Antonio Gasión, ye consellero delegato.

O cercuito de velocidat[editar | editar código]

Vista cheneral d'o cercuito de velocidat

O cercuito de velocidat ye o más important de Motorland. Disenyato por l'arquitecto alemán Hermann Tilke, un d'os millors disenyadors de cercuitos d'o mundo (disenyador d'entre atros os cercuitos de Sepang (1998), Bahrein (2004), Xangai (2004), Istambul (2005) u Fuji (2005)) ha tenito amás a colaboración tecnica d'o piloto de Formula 1 Pedro de la Rosa, qui amás de fer parti d'o equipe de disenyo, ha adoptato o cercuito como propio, fendo o papel d'embaixador d'o cercuito en diferents puestos.[4]

O resultato d'ista colaboración ye un cercuito unico en o mundo por as suyas caracteristicas, ideyals ta a realización tanto de prebas como de competicions d'o más alto ran.[5] As prencipals caracteristicas d'o cercuito de velocidat son:

Renaul Clio Cup, curva 9 u d'o "sacacorchos"
  • Largaria total: 5.345 m.
  • Recta más larga: 1.726 m.
  • Amplaria d'o cercuito: 12 m. (15 m. en recta)
  • Recta de salita: 630 m.
  • Numero de curvas: 18 (cercuito 1) u 14 (cercuito 2)
  • Maxima puyata: 5,4%
  • Maxima baixata: 7,2%
  • Desnivel maximo: 50 m.
  • Superficie paddock: 33.700 m²

O sentito de chiro ye contrario a las agullas d'o reloch. Amás ye enamplable a 10 km ta pruebas de resistencia y ye adaptato a la orografía d'o Baixo Aragón, ista ye una caracteristica de todo cercuito disenyato por Tilke qui intenta adaptar-ne a o terreno d'a redolada.

O cercuito ye hemologato en a categoría 1T d'a Federación Internacional d'Automovilismo (Permite entrenamientos de Formula 1) y en as categorías 2, 3 y 4 y Grau A Grand Prix d'a Federación Internacional de Motociclismo.

Trazato FIA[editar | editar código]

Cercuito FIA
Motorland Aragón FIA.svg
Largaria 5.344,53 metros
Curvas 18
Cercuito FIM
Motorland Aragón FIM.svg
Largaria 5.077,65 metros
Curvas 16
Cercuito RFEdA
Motorland Aragón RFEdA.svg
Largaria 2.646 metros
Curvas 13
Cercuito RFME
Motorland Aragón RFME.svg
Largaria 2.379,12 metros
Curvas 11

O cercuito tien a hemologación en a categoría 1T d'a FIA, lo que significa que se i pueden fer prebatinas oficials de Formula 1, asinas como muitas atras competicions d'automobilismo.[6]

A longaria total d'o vercuito ye de 5.344,53 metros con 18 curvas, 10 a cuchas y 8 a dreitas. O sentito de chiro ye contrario a las agullas d'o reloch.

O trazato d'o cercuito ye a-saber-lo completo. Prencipia en a recta de salita, que tien 630 metros de longaria, en a que se sitúan o paddock y o pit lane prencipal d'o cercuito. A recta remata en una curva de 90º a cuchas. Destacan tamién a curva 9, dita o "sacacorchos" (tirabuzón) por o suyo pareixito con a famosa curva d'o cercuito de Laguna Seca, y a recta gran d'o cercuito que tien una longaria de 1.726 m.

Entre as competicions automovilisticas más importants que se i fan destacan as World Series by Renault, segunda competición más important a ran mundial dimpués d'a Formula 1, que se celebrarán en Motorland en 2009 y 2010.[7]

Trazato FIM[editar | editar código]

MotoGP en a curva 5 d'o cercuito de velocidat

Iste trazato conta con a maxima hemologación internacional d'a FIM, lo que significa que se i pueden celebrar tot tipo de competicions internacionals de motociclismo, incluyindo cursas de MotoGP, a categoría más important d'o motociclismo a ran mundial.[6]

Amás gracias a un alcuerdo con a FIM y Dorna Sports, a interpresa que organiza o mundial de MotoGP, Motorland ye dende a temporada 2010 o cercuito reserva oficial d'ista competición,[8] y debito a la baixa d'o Gran Premio d'Hongría en a temporada 2010 se celebró por primera vegata o Gran Premio d'Aragón de Motociclismo entre os días 17 y 19 de setiembre de 2010 en o cercuito de Motorland Aragón.[9] Amás o cercuito ye un sobrebuen escenario de prebatinas ta os equipes de MotoGP. Dende marzo de 2011 Motorland ye cercuito oficial d'o mundial de MotoGP dica a o menos 2016 seguntes un alcuerdo sinyato con Dorna.[10]

D'atra man o 19 de mayo de 2010, s'anunció que o cercuito aculliría o Campionato Mundial de Superbikes dende l'anyo 2011, con un alcuerdo por tres temporadas.[11]

A longaria total d'o cercuito ye de 5.077,65 metros con 16 curvas, 8 a cuchas y 8 a dreitas. O sentito de chiro ye contrario a las agullas d'o reloch.

O trazato d'o cercuito ye parellán a o trazato d'a FIA, pero sacando as dos curvas zagueras. Asinas prencipia tamién a recta prencipal a on que se troban o paddock y o pit lane prencipal, con una largaria de 630 metros. Igual que en o trazato FIA i destacan a primera curva de 90º a cuchas y a curba 9, dita o "sacacorchos". A recta gran d'o cercuito ye un poquet más chicota que en o cercuito FIA, ya que en iste caso remata en una curva parabolica a cuchas.

Trazato RFEdA[editar | editar código]

Recta principal

Ye o trazato curto ta cursas d'automovilismo hemologato por a RFEdA. Como no tien hemologación internacional nomás se i fan cursas oficials organizatas por a Reyal Federación Espanyola d'Automovilismo.

Ye un cercuito que aproveita a metat más oriental d'o trazato FIA. Ista destribución d'o cercuito deixa libre l'atra metat ta poder fer atras cursas u entrenamientos. Tien una longaria total de 2.646 metros, con 13 curvas, d'as qualas son 8 a cuchas y 5 a dreitas.

Prencipia igual que o internacional en a recta prencipal a on que tamién se troban paddock y pit lane. A primera curva ye a mesma que en os trazatos internacionals, una curva de 90º a cuchas. Dimpués d'una curva más a dreitas o cercuito albandona o trazato internacional con unatra curva a cuchas. En iste trampo s'anyaden dos curvas más antis de tornar enta o trazato internacional, a on que s'aproveita parti d'a recta luenga, ta fer atra serie de 4 curvas difuera d'o cercuito y tornar-ie, rematando a vuelta por o mesmo trazato internacional.

Trazato RFME[editar | editar código]

Ye o trazato curto ta cursas de motociclismo hemologato por a RFME. Como no tien hemologación internacional nomás se i fan cursas oficials organizatas por a Reyal Federación Motociclista Espanyola.

Ye un zercuito que aproveita a metat más oriental d'o trazato FIM. Ista destribución d'o cercuito deixa libre l'atra metat ta poder fer atras cursas u entrenamientos. Tien una longaria total de 2.379,12 metros, con 11 curvas, d'as qualas son 6 a cuchas y 5 a dreitas.

Prencipia igual que o internacional en a recta prencipal a on que tamién se troban paddock y pit lane y ye prou parellán a o trazato RFEdA. A primera curva ye a mesma que en os trazatos internacionals, una curva de 90º a cuchas. Dimpués d'una curva más a dreitas o cercuito albandona o trazato internacional con unatra curva a cuchas. En iste trampo s'anyaden dos curvas más antis de tornar enta o trazato internacional, a on que s'aproveita parti d'a recta luenga, ta fer atra serie de 4 curvas difuera d'o cercuito y tornar-ie, rematando a vuelta por o mesmo trazato internacional FIM, con a curva parabolica.

Cercuito de karting[editar | editar código]

David da Luz, campión d'o mundo de karting en Motorland
Cercuito de karting
Karting Circuit Alcañiz Spain.svg
Largaria 2.049 metros
Curvas 19
Anvista d'o cercuito de karting

Disenyato por Jaime Nogué, tien a maxima hemologación ran A por a CIK-FIA ta competicions internacionals de karting. As prencipals caracteristicas d'o cercuito de karting son:

  • Largaria total: 2.049 m.
  • Largaria cercuito hemologato: 1.671,633 m.
  • Amplaria d'o cercuito: 10 m. - 15,75 m.
  • Recta de salita: 993,74 m.
  • Numero de curvas: 9 a cuchas y 10 a dreitas
  • Maxima puyata: 3,25%
  • Maxima baxata: 4,5%
  • Superficie paddock: 200 plazas de 8 x 6

Iste cercuito puede apologar-se u alcorzar-se seguntes a competicion que se celebre. Asinas existen 4 variants:

  • Variant norte: 1.030 m
  • Variant sud: 948 m
  • Trazato hemologato internacional: 1.671,63 m
  • Variant luenga: 2.028 m

En o cercuito se celebran importants cursas como o "Campionato aragonés de Karting y Rotax Series", o "Campionato d'Espanya de Karting" u as "6 horas de Resistencia de Vespas".

Cercuitos de tierra[editar | editar código]

Ocupan una superficie de 34 hectarias. En istos cercuitos se celebran competicions d'autocross, motocross, rallycross, dirt-track y 4x4. Bi ha tres cercuitos: uno ta motocross, un atro ta supermotard y un atro ta competicions d'autocross. Existe tamién un trampo d'enduro de 4 km y un atro de extrema enduro.

Cercuito de motocross[editar | editar código]

World Series by Renault 2010

Ye un cercuito d'arena con un sistema permanent de riego. Ocupa una superficie de 70.000 m² y tien una largaria de 1.646 m. L'amplaria d'o cercuito oscila entre os 10 y 13 m.

Se celebran importants competicions nacionals y internacionals de motocross como as "3 Horas de Resistencia d'Enduro", o "Campionato d'Aragón de MotoCross" u o "Memorial Gaibar-Mir de Motocross".

Cercuito de supermotard[editar | editar código]

Ye un cercuito mixto de gudrón y tiera con dubies y meseta engudronata. A suya superficie ye de 55.000 m² y tien una largaria de 1.210 m con una amplaria que varía entre 10 y 13 m.

En o cercuito de tierra se fan competicions de supermotard como o "Campionato d'o Mundo de Supermotard", o "Campionato d'Aragón de Supermotard" u as "3 Horas de Resistencia nocturna de Supermotard".

Cercuito d'autocross[editar | editar código]

O certuito tien dos variants con una largaria maxima de 1.069 m y una superficie de 70.000 m².

En a categoría d'autocros se celebran entre atros o "Campionato d'Aragón d'Autocross" y o "Campionato d'Espanya de Autocross".

Competicions[editar | editar código]

Automobilismo[editar | editar código]

Renault Mégane Trophy 2009

Entre as competicions automobilisticas que se celebran en Motorland a mas important son as World Series by Renault, ya que constituyen una d'as mas importans competicions en iste esporte a ran mundial, nomás por dezaga d'a Formula 1. As World Series se celebran en Motorland Aragón dende l'anyo 2009 y se dividen en quantas categorías encluyindo a Formula Renault 3.5 Series, a Eurocup Formula Renault 2.0, a Eurocup Mégane Trophy y a

Atras competicions importants en o mundo de l'automobilismo son o "Campionato francés de Resistencia V de V" u a "Copa d'Espanya de Resistencia" (CER). Tamién se fan atros eventos relacionatos con o mundo de l'auto como o "Rally Hospederías d'Aragón ta clasicos esportivos".

Cal destacar tamién entre as competicions automobilisticas a presencia en o cercuito d'a "BAJA Espanya-Aragón", competición de rally puntuable ta a Copa d'o Mundo de Rallies Cross Country.

Motociclismo[editar | editar código]

En Motorland Aragón se celebran as competicions de motociclismo mas importants a ran mundial, destacando o Campionato d'o mundo de MotoGP y o Campionato Mundial de Superbikes os dos eventos de mayor categoría en iste esporte.

En o Campionato d'o mundo de MotoGP se i fa dende a temporada 2010 o Gran Premio d'Aragón de Motociclismo, celebrando-se-ie cursas d'as tres categorías que componen o mundial: MotoGP, Moto2 y 125cc.

O Campionato Mundial de Superbikes celebra dende a temporada 2011 en Motorland o Gran Premio de Superbikes d'Aragón.

Amás en o cercuito se celebran atros campionatos motociclisticos de gran importancia entre os que destacan o Campeonato de Espanya de Velocidat (CEV), o "Campionato castellán-manchego de velocidat", o "Campionato aragonés de velocidat" y atros eventos como o "European Suzuki Days" u l'"Open Zona Norte" (a on que fan parti pilotos de Castiella y Leyón, Aragón, País Vasco, Navarra, Asturias, A Riocha y Cantabria en diferents categorías), asinas como entrenamientos de MotoGP y Superbikes.

Aria tecnolochica[editar | editar código]

Instalacions de TechnoPark

Chunto a os cercuitos y adintro d'o recinto de Motorland Aragón se troba o Parque Tecnolochico d'o Motor d'Aragón u "Technopark". O parque tien una amplaria total de 212.344 m² d'os quals 114.736 m² corresponden a superdicie industrial innovadora y en ell se pueden trobar instalacions d'investigación, formación y hemologación. O tipo de suelo se divide en tres categorías: productivo tecnolochico de tipo 1, productivo tecnolochico de tipo 2 y suelo dotacional educativo y polivalent. D'atra man bi ha una superficie d'aparcamientos de 16.793 m² y 49.223 m² de zonas verdas.

L'obchectivo d'iste parque tecnolochico ye estar un referent en a investigación scientifica relacionata con o mundo d'o motor. Asinas as interpresas que decidan instalar-se-ie y desembolicar os suyos productos podrán, entre atras cosas, fer servir as instalacions de Motorland Aragón ta fer prebatinas con os suyos prototipos, podendo tamién hemologar os suyos productos.

Presentación de Motorland en FITUR

Entre atros ya existe una seu d'o Instituto d'Investigación en Incheniería d'Aragón d'a Universidat de Zaragoza ta realizar prochectos d'I+D+i y seguridat vial[12] y ye previsto que a Federación Internacional de Motociclismo instale en o parque atro instituto d'investigación[13]

Aria d'ocio y cultura[editar | editar código]

Ye en prochecto a construcción d'una zona d'ocio creyata por o estudeo d'arquitectura Foster + Partners que tendrá una superficie total de 330.000 m² y en a que se trobará un complexo multifuncional, un hotel y una zona residencial y un centro de tecnificación esportiva. O complexo d'ocio encluyirá un centro comercial y un cercuito de karting indoor.

D'atra man tamién bi habrá edificios destinatos a negocios, seus federativas y propia seu corporativa de Motorland Aragón. A parti cultural se completará con espacios de exposición y museus relacionatos con o mundo d'o motor.

Referencias[editar | editar código]

Vinclos externos[editar | editar código]