Mollusca

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Mollusca
Tonicella lineata
Clasificación scientifica
Dominio: Eukaryota Reino: Animalia Superfilo: Lophotrochozoa Filo: Mollusca Clase: Aplacophora Bivalvia Cephalopoda Polyplacophora Gastropoda Monoplacophora Pleistomollusca Polyplacophora ? †Rostroconchia Scaphopoda incertae sedis

Os moluscos (Mollusca) constituyen un filo d'animals invertebraus. Se conoixen bellas 93.000 especies vivents, feito que fa que sía o filum marín mas numeroso, contiene un 23% de toz os organismos marins. Os representants d'iste filo viven en un rango d'habitats muit amplo incluyindo o medio marín, l'augua dulce y medio terrestre. Os moluscos son un grupo muit diversificau, en mida, en anatomía estructural, comportamiento y habitat. A ciencia que estudia os moluscos se diz malacolochía

O filo por un regular se divide en nueu u diez clases taxonomicas, d'as que dos son extintas de tot. Os gasteropodos (caragols y limacos) son por muito os moluscos mas numerosos d'as especies clasificadas, y suman o 80% d'o numero total d'especies de moluscos conoixidas. Os moluscos cefalopodos, como os calamars, sepias y pulpos, se troban entre os invertebraus con un sistema neurolochico mas enantau. U bien o calamar chigant o bien o calamar colosal ye o invertebrau mas gran conoixiu.

Os moluscos son protostomaus con cuerpo tovo e insegmentau, con simetría bilateral, (de fueras d'os gasteropodos), y celoma muito redueito, (ocupa cuasi exclusivament a cambra pericardica y gonadal). O cuerpo ye dividiu en 3 rechions morfolochicas: cabeza, piet y masa visceral.

• Cabeza: presenta boca, centros niervosos cerebroides y cualques organos sensorials.
• Piet: ye una modificación d'a part ventral, ye musculoso y gosa tener funcions locomotoras.
• Masa visceral: puet prener forma conica. A masa visceral presenta una paret dorsal con un par de plegos, o manto, que s'abocan sobre o resto d'a masa visceral, embolicando-la. O manto segrega carbonato calcico formando una casca calsinosa.

Entre o manto y o resto d'a masa visceral queda un espacio prou gran cuasi cerrau pero que comunica con l'exterior. Este espacio ye la cambra palial u d'o manto, y ye a on se troba as branquias internas, y a on se recullen os conductos excretors, chenitals y dichestivo.

Casca

A casca d'os moluscos ye formada por carbonato calcico en forma d'aragonito y por una proteína dita conquiolina. En a casca d'os moluscos bi ha 3 estratos:

• Periostraco: exterior, fin y organico.
• Mesostraco: prou calcificau y pero con conquiolina.
• Endostraco: interior, con capas d'aragonito y de conquiolina en una estructura prismatica en part.

A denominación de casca coexiste en aragonés moderno con cosca, y se refiere tamién a la cosca d'o uego y a la casca d'os fruitos secos. En aragonés medieval han existiu as variants clasca y closca:

el es enemjgo delas ostias por q(ue) el come su ca(r)ne por maraujlloso enemjgo, e oyres com(m)o el trahe vna chica piedra e g(u)arda q(u)ando la hostia abre sus clasclas o clascas la ora vien(e) el ca(n)cre e gita la piedra dent(r)o en tal man(er)a q(ue) ella no ha poder de çerrar su boca e ella pre(n)de pu(e)s e se la come

E mete(n) enlas rrayzes closcas de muscles / o de pechelid[o]s/ o alga de mar/. E otros son q(ue) toma(n) las ma(n)çanas de las tuberas

Etimolochía

A denominación cientifica molluscus provién de mollis, tovo. A la vegada Molluscus ye una adaptación d'o griego τᾲ μαλάκια, "a cosa tova", que Aristótil aplicó a la sepia.

A parola molluscus no se relaciona etimolochicament con a parola patrimonial aragonesa "musclo", que designa a cualsiquier especie d'a familia Mytilidae, y deriva d'o latín mūsculus (como o francés moule y l'anglés mussel), diminutivo de mūs ("ratolín", "zorz").

Bibliografía

• C.P.J.Hickman: Principios Integrales De Zoologia - 10ª Ed. McGraw-Hill. 1998.
• Natividad Ferrer Marí, Miguel Gracia Vicente, Manuel Medina Martínez: Bachillerato. Biología y Geología Bruño, 2008.

Vinclos externos

• Se veigan as imáchens de Commons sobre Mollusca.
• Wikispecies tiene un articlo sobre Mollusca.

• Datos: Q25326
• Multimedia: Mollusca / Q25326
• Especies: Mollusca