Miguel Chueca Cuartero

Miguel Chueca Cuartero
Vicepresident segundo d'o Consello Rechional de Defensa d'Aragón
12 de chinero de 1937 – 10 d'agosto de 1937
President	Joaquín Ascaso Budría
Gubierno	Gubierno Ascaso
Consellero de Treballo d'o Consello Rechional de Defensa d'Aragón
16 d'octubre de 1936 – 10 d'agosto de 1937
President	Joaquín Ascaso Budría
Gubierno	Gubierno Ascaso
Naiximiento	3 de chinero de 1901 Fuent de Xalón (Campo de Borcha, Aragón)
Muerte	18 d'octubre de 1966 París (Isla de Francia, Francia)
Atras afiliacions politicas	CNT
Profesión	Anarquista

Miguel Chueca Cuartero yera un anarquista aragonés naixiu o 3 de chinero de 1901 de Fuent de Xalón (Campo de Borcha, Aragón) y muerto en París (Isla de Francia, Francia) o 18 d'octubre de 1966.

Biografía

Naixiu de Fuent de Xalón en 1901, fillo de Bernardo Chueca Sancho (qui heba estau alcalde de Fuent de Xalón) y María Cuartero Ibáñez, quedó popiello de mai y a lo cudiau de su avuela. Cuan ista morió en 1917 se marchó enta Barcelona an treballó de fustero y obtenió lo titol de mayestría. En 1924 s'afilió a la CNT. En zaguers d'os anyos 1920 s'instalará en Zaragoza an treballará de bibliotecario y colaborará en a revista Cierzo. Lo 9 de setiembre de 1929 estió condenau a dos anyadas de presón y 1.000 pesetas de pinyora per conspiración a la rebelión.

Entre 1930 y 1931 estió redactor de La Antorcha y Cultura y Acción. Participó activament en a Sublevación de Chaca d'o 12 d'aviento de 1930. Con o fracaso d'ista, será feito presonero y tresladau enta la garchola de Torrero en Zaragoza dica que sía liberau o 4 de marzo de 1931. Con a proclamación d'a Segunda Republica Espanyola en 1931, estió él qui ubrió las puertas d'a garchola de Torrero ta liberar a los presos enfgarcholaus.

Lo 13 de chulio de 1935 estió aturau per l'asasinato d'o lider d'os esquirols d'as obras d'o Puent d'o Pilar de conchunta con Francisco Foyos, Alejandro Miguel y Isabelo Romero. En salir d'a garchola continará las suyas fayenas propagandisticas en diversos lugars d'Aragón y Navarra dica chulio de 1936.

Una vegada que lo golpe d'estau d'o 18 de chulio de 1936 sale abance en Zaragoza, prebó en primeras de conseguir armas ta los militants d'ezquierda de mans d'Ángel Vera Coronel (asasinau por os franquistas en 1937) y, en fracasar, Chueca fuye enta Casp y en octubre de 1936 participó en a constitución d'o Consello Rechional de Defensa d'Aragón, d'o como estió consellero de Treballo, vicepresident y delegau d'o Comité Rechional d'a CNT en iste organismo.

En acabar a guerra civil espanyola s'exilia enta Francia. Asinas, en 1941 s'establió en Montalban, an treballó de picador. En 1942 colaboró con o rete de Francisco Ponzán, pero estió capturau y deteniu en o campo de Vernet. Entre 1944 y 1946 participó en numbrosos mintins en diversas ciudaz d'a Occitania. Estió nombrau secretario de propaganda d'a CNT y dende 1945 dica 1946 s'encargará d'a tresorería d'a CNT. Manimenos fue esfurriau en 1948 per participar en o Congreso de Viena, de caracter pro-comunista. Con os anyos se va a quedar ciego y feneixió lo 18 d'octubre de 1966 en estar atropellau per un cambión en París.

Ye autor de cuantismos articlos y publicacions en cuantos periodicos d'ideyolochía anarquista, a sobén fendo servir o pseudonimo de "Tío Calzones".

Predecesor: Dengún	Vicepresident segundo d'o Consello Rechional de Defensa d'Aragón 12 de chinero de 1936 - 10 d'agosto de 1937	Succesor: Dengún
Predecesor: Dengún	Consellero de Treballo d'o Consello Rechional de Defensa d'Aragón 16 d'octubre de 1936 - 10 d'agosto de 1937	Succesor: Dengún

• Datos: Q20005948