María Victoria Broto

De Biquipedia
Ir a la navegación Ir a la búsqueda
María Victoria Broto Cosculluela
María Victoria Broto


16 d'abril de 2008 – 15 de chulio de 2011
President Marcelino Iglesias
Precedito por Eva Almunia
Succedito por Dolores Serrat

18 de chulio de 2007 – 15 d'abril de 2008
President Marcelino Iglesias
Precedito por Ángela Abós
Succedito por Mª Pilar Ventura
Partito Partido Socialista Obrero Español
Profesión Politico y mayestra

María Victoria Broto Cosculluela (casa Salinas, Guaso, Sobrarbe, 10 de chinero de 1956[1]) ye una mayestra y politica aragonesa, melitant de o PSOE.[2][3]

En habendo estau previament a Directora Cheneral d'Administracions Educativas d'a DChA,[1] estuvo a'l frent de diferents Departamentos de l'Executivo aragonés mientres a VII lechislatura, a zaguera en a que a presidencia estuvo en mans d'os socialistas, con Marcelino Iglesias. Asinas, la nombrón Consellera de Sciencia, Tecnolochía y Universidat d'o Gubierno d'Aragón en a formación d'executivo posterior a las eleccions de 2007, y dica lo cambeo de gubierno de dimpués d'as eleccions de mayo de 2011 fue a Consellera d'Educación, Cultura y Esporte.

En o suyo periodo como Consellera d'Educación, Cultura y Esporte s'aprebó, d'entre bellas atras, a Lei de Luengas d'Aragón (aviento de 2009), que preveyeba o reconoiximiento como luengas propias d'Aragón a l'aragonés y a o catalán,[4] y a suya normalización.[4]

Biografía[editar | editar código]

Mª Victoria Broto naixió de casa Salinas, en o vico d'o Tozal que pertenece a o lugar de Guaso. Guaso actualment fa parte d'o municipio de l'Aínsa-Sobrarbe, y se troba alto en un tozal que fa de divisoria d'entre a valle de l'Ena y a valle de l'Ara (que ye como dicir a divosoria d'entre o Viello Sobrarbe y a valle de Boltanya), a 4 kilometros en sudueste de a villa de l'Aínsa. O vico d'o Grau, a on ye la casa natal de Maria Victoria Broto, se troba en a baixant oriental de o tozal, deseparau bells cientos de metros d'a resta de vicos diseminaus que forman Guaso.

Cursó os estudeos primarios en a escuela de Guaso[1] y fizo as primeras anyadas de Bachillerato Elemental en a escuela de l'Aínsa,[1] anque en tresladar-se ta la ciudat de Uesca habió de continar os estudeos astí.[1] Ye licenciada en machisterio por a Universidat de Zaragoza, y en psicolochía por a Universidat de Barcelona.[1]

Carrera profesional[editar | editar código]

A suya carrera profesional, d'antes d'incorporar-se a la politica, heba estau centrada en l'amostranza. Fizo de mayestra 23 anyos.[1][2]

Gosó estar a directora d'o colechio Puente Sardas en Samianigo d'entre 1987 y 1989[2] y cabeza d'estudeos de o mesmo centro d'entre 1999 y 2003,[2] por o que fixó a suya residencia en a capital de l'Alto Galligo buena cosa d'anyos.

Carrera politica[editar | editar código]

María Victoria Broto en l'acto d'entrega d'os Premios d'as Bibliotecas Escolars 2010, chunto a Eva Almunia.

A carrera politica de Mariví Broto dende as orichens ha diu muit asociada con a suya profesión y puesto de residencia: Dende l'anyo 2000 perteneixió a'l Consello d'o Centro de Profesors y Recursos locals de Samianigo,[2] y dica l'anyo 2003 fue tamién miembro de o Consello Escolar d'Aragón,[2] parcialment solapando-se con o suyo paper como secretario d'Educación, Cultura, Universidat y Investigación que fizo dende o 2000,[3] tot fendo parte d'o Departamento que a par d'alavez presidiba Ángela Abós.

Ye afiliada a o Partido Socialista Obrero Español dende l'anyo 1982,[2][3] melitancia en virtut de a qual exerció diferents concellalías de a comarca de l'Alto Galligo, a on que arribó a ostentar a presidencia comarcal,[3] en paralelo a la suya actividat profesional y a la suya posterior embrecación en l'administración autonomica.

En 2007 fue nombrada Consellera d'o Gubierno d'Aragón a primer vegada, en ocupando o cargo de Consellera de Sciencia, Tecnolochía y Universidatz,[3] que aglutinaba a Viceconsellería de Sciencia y Tecnolochía con a Secretaría Cheneral Tecnica, tres direccions chenerals; a Dirección Cheneral d'Amostranza Superior, a Dirección Cheneral d'Investigación, Innovación y Desarrollo, a Dirección Cheneral de Tecnolochías ta las Sociedat d'a Información y as direccions d'as organizacions Aragonesa de Servicios Telemáticos (AST), l'Instituto Tecnolochico d'Aragón (ITA), o Centro d'Investigación y Tecnolochía Agroalimentaria d'Aragón (CITA) y l'Achencia de Calidat y Prospectiva Universitaria d'Aragón (ACPUA).[3]

En chulio de 2008, o president autonomico Marcelino Iglesias a designó Consellera d'Educación, Cultura y Esporte,[2] que dica alavetz heba estau o puesto d'a ex-consellera Eva Almunia, nombrada Secretario d'Estato d'Educación y Formación por o president espanyol José Luis Rodríguez Zapatero. A succedió en a Consellería de Sciencia, Tecnolochía y Universidatz María Pilar Ventura Contreras.[2]

Ocupó a Consellería d'Educación, Cultura y Esporte dica la surtida de o gubierno autonomico d'o Partido de los Socialistas de Aragón en chulio de 2011, con a investidura d'a nueva presidenta electa Luisa Fernanda Rudi, d'o Partido Popular, qui heba ganau as eleccions autonomicas d'o 22 de mayo de 2011.

Vinclos externos[editar | editar código]

(es) María Victoria Broto Cosculluela en a pachina web d'as Cortz d'Aragón.

Referencias[editar | editar código]

  1. 1,0 1,1 1,2 1,3 1,4 1,5 1,6 (es) PALLARUELO CAMPO, Severino; Entrevistas (cap. V en Comarca de Sobrarbe (Num. 23 en a Colección Territorio)). Gobierno de Aragón; Zaragoza, 2007. ISBN 84-7753-630-9. O capítol puede leyer-se en linia aquí.
  2. 2,0 2,1 2,2 2,3 2,4 2,5 2,6 2,7 2,8 (es) Noticia «Mª Victoria Broto asume la consejería de Educación y Pilar Ventura la de Ciencia y Tecnología en el gobierno aragonés», de 15 d'abril de 2008; consultada o 17 de chulio de 2011.
  3. 3,0 3,1 3,2 3,3 3,4 3,5 (es) Noticia «El departamento de Ciencia, Tecnología y Universidad será dirigido por María Victoria Broto» d'11 de chulio de 2007; consultada o 17 de chulio de 2011.
  4. 4,0 4,1 (es) «LEY 10/2009, de 22 de diciembre, de uso, protección y promoción de las lenguas propias de Aragón.», a Lei de Luengas d'Aragón, en o BOA nº 252; consultau o 17 de chulio de 2011

Predecesor:
Eva Almunia
Consellera d'Educación, Cultura y Esporte d'o Gubierno d'Aragón
2008 - 2011
Succesor:
Dolores Serrat
Predecesor:
Ángela Abós
Consellera de Sciencia, Tecnolochía y Universidat d'o Gubierno d'Aragón
2007 - 2008
Succesor:
Mª Pilar Ventura