Ir al contenido

Gryllidae

De Biquipedia
(Reendrezau dende Gricha)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Iste articlo tracta sobre as grillas u grillos que son insectos. Ta las chemas verdes que brostan en as trunfas y belatras hortalicias, se veiga grillón.
Gryllidae
Acheta domesticus
Denominacions populars
grillas / grichas, grechas, grillos / grichos, grius, grilletas / grichetas, grillons / grichons
Clasificación cientifica
Dominio:
 Eukaryota
Reino:
 Animalia
Filo:
 Arthropoda
Clase:
 Insecta
Orden:
 Orthoptera
Suborden:
 Ensifera
Superfamilia:
 Grylloidea
Familia:
 Gryllidae
Descripción
Gryllidae
BOLÍVAR, 1878

Os grilidos[1] (cientificament Gryllidae -en latín-) son una familia d'insectos ortopteros en a suborden d'os ensifers y a superfamilia d'os griloideus que comprende bellas 900 especies descritas d'insectos, de regular herbivoros y nocturnos.[2]

Son especialment conoixius por a suya canción nupcial, una estridulación aguda caracteristica con a cual os masclos s'atrayen as fembras ta cubrir-las, que executan tipicament en as horas nocturnas.

O chenero tipo d'a familia ye Gryllus, que comprende especies tan comuns como Gryllus campestris, a grilla u grilleta.

Zoonimia

[editar | modificar o codigo]

En l'Alto Aragón, as parolas mas comuns ta nombrar a istos insectos son «grilla»[3][4] (d'o latín <GRYLLA, femenín de GRYLLUS) y «grillo»[3][nota 1] (lat. <GRYLLU). A forma femenina ye predominadera en aragonés, mientres que a masculina, por estar común con o castellano, se ye tornando mas cheneral solo en os zaguers anyos.

En Nerín (val de Vio, Sobrarbe), Artur Quintana i documenta a variant «grella».[3][5]. A forma «gricha»[3][nota 2] s'ha documentau nomás en as zonas a on que s'ha dau historicament una mayor tendencia a la hiper-palatalización d'o grupo -ll-, como Pandicosa (val de Tena, Alto Galligo)[4] y a val de Broto (Sobrarbe).[4]

Rafel Vidaller documenta con frecuencia a forma diminutiva «grilleta»[3][nota 3], que s'emplega dende Ayerbe (Plana de Uesca) dica Chistén (val de Chistau, Sobrarbe).[4]

Notas

[editar | modificar o codigo]
  1. ↑ Con as variants gricho y griu
  2. ↑ Con a variant grecha
  3. ↑ Con a variant gricheta

Referencias

[editar | modificar o codigo]
  1. ↑ (es) Amenazas sobre los Ortópteros. Ministerio de Medio Ambiente, Rural y Marino. Consultada o 22 de septiembre de 2012.
  2. ↑ (en) Cricket info por a Universidat d'Arizona; consultada o 22 de septiembre de 2012.
  3. ↑ 3,0 3,1 3,2 3,3 3,4 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
  4. ↑ 4,0 4,1 4,2 4,3 (an) VIDALLER TRICAS, Rafel (2004). Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza. ISBN 978-84-8986-235-7
  5. ↑ (es) QUINTANA i FONT, Artur (2007). El Aragonés nuclear de Nerín y Sercué (Valle de Vio); Gara d'Edizions. Zaragoza. ISBN 978-84-8094-060-3

Vinclos externos

[editar | modificar o codigo]
Obteniu de "https://an.wikipedia.org/w/index.php?title=Gryllidae&oldid=2329107"