Gorra larga

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Pastor d'o sieglo XIX con gorra llarga roya.

A gorra larga (en ribagorzano y en catalán occidental gorra llarga) ye una pieza de vestiu masculina y rustica que s'emplegaba pa cubrir a cabeza, feita en casa por lo regular de lana, que s'emplegaba dica las zaguerías d'o sieglo XIX u escomienzos d'o sieglo XX en buena cosa d'os Pireneus, incluindo as vals más altas de comarcas aragonesas como a Val de Benás en Ribagorza, an que s'emplegaba pa diario y se reservaba os sombreros pa os días de fiesta.

Anque agora ye a-saber-qué relacionada con os vestuaches tipicos de Catalunya (an s'ha popularizau a denominación «barretina»), a gorra larga yera común en un buen numero de vals pirenencas en sieglos pasaus, y puestar que se conoixese mismo en o País Basco, pos seguntes Violant i Simorra en a val d'Ezcua esistiba una variant que en deciban «buru-tapa».

Confección

A gorra larga se feba de lana cardada y tixida en casa y dimpués se tenyiba. En Pallars y Ribagorza en i habeba de dos colors por principal, roya, que se deciba «gorra roya», y morada, que se deciba «gorra musca». Como atros cheneros, a tinción se feba lo más a sobén en as villas y cabeceras de val, pos yera raro que en as casas se tenese os medios pa tenyir as telas.

Tanto a color como a forma como se lievaba gosaban estar sinyals d'identidat de l'individuo. L'uso tamién podeba variar con a posición social u economica, pasando por un rabanyo de puestos que as muscas as lievaban os amos, pero tamién os viellos, entre que as gorras royas yeran más propias d'a chovenalla. En a Ribagorza tamién i habeba chent que la lievaba sin tenyir, ixo ye, de color de lana que en deciban burell.

Se veiga tamién

• Sombrero de Sastago.
• Cacherulo.