Euskadi Ta Askatasuna
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
ETA (que significa Euskadi Ta Askatasuna, en basco País Basco e Libertat) ye una organización independentista basca armata y clandestina, d'idiolochía marxista, que tien como obchectivo a creyación d'un Estato basco euskaldun, independient d'Espanya y Francia, y encluyendo os siet territorios bascos historicos (Euskal Herria): tres perteneixients a lo Estato Francés (que son toz almenistrativament en o departamento francés d'os Pireneus Atlanticos), tres provincias d'o Estato Espanyol que forman l'actual País Basco, y a tamién provincia espanyola de Navarra, en l'actualidat Comunidat Foral de Navarra; y socialista. Ye considerata una organización terrorista por o gubierno d'Espanya, por a Unión Europea[1] y por os Estaus Unius.[2]
ETA practica a sobén a extorsión e a vegatas o secuestro como metodos de financiamiento y con finalidat de presión política. Organizacions como Amnistia Internacional[3] denuncian anyalment as activitaz d'ETA en os suyos informes asinas como belas actuacions d'os cuerpos policials espanyols en o mesmo conflicto.
Os integrants d'ETA son clamatos etarras, y o suyo simbolo ye una serpient enreligata en una estral.
ETA en Aragón
Debito a las buenas comunicacions d'Aragón con o País Basco y Francia y a la suya orografía ha estato siempre un puesto privilechiato ta las actividaz d'ETA.
En total 17 personas han muerto en o país debito a los atentatos, a mas gran parti d'els relacionatos con a Guardia Civil u l'Exercito. As dos primeras victimas d'ETA en Aragón estioron Manuel Rivera Sánchez y Ángel José Ramos Saavedra, comandant y soldato de l'Exercito que morioron dimpués que esclatase l'autobus militar en que viachaban en a Plaza de San Chuan d'os Panez de Zaragoza o día 30 de chinero de 1987. Ixe mesmo anyo, l'11 d'aviento, se produció tamién o pior atentato d'ETA en Aragón con o esclatito d'un coche-bomba en a casa d'a Guardia Civil de l'Avenita de Catalunya de Zaragoza, morindo 11 personas, entre ellas cinco ninas.
En 1989 moriba en Chaca sarchento de l'exercito Joaquín Bordonaba en un atentato con libro-bomba. Dica l'anyo 2000 ETA no torna a actuar en Aragón y ye o 20 d'agosto de 2000 en Sallén cuan son asasinatos os guardias civils Irene Fernández Pereda y José Ángel de Jesús Encinas con una bomba penchata en os baixos d'o suyo coche. Un anyo dimpués ye asasinato de tres tiros en a carrera Corz d'Aragón o president d'o ``Partido Popular de Aragón`` Manuel Giménez Abad cuan se'n iba ta La Romareda a veyer a lo Real Zaragoza.
Bi ha habito atros atentatos d'ETA en Aragón como por eixemplo en o Corte Inglés de Sagasta en que nomás habió danyos materials y bellas personas feritas.
Manimenos l'actividat d'ETA ha estato muito mayor en a suya historia en Aragón. S'han trobato diferents pisos francos prencipalment en Zaragoza y tamién s'ha preso a personas relacionatas con ETA en atros puesto como l'Almunia.[4] Tamién ETA s'aprofeitato d'a orografía pirenenca ta amagar armas y personas como amuestra o descubrimiento d'un zulo en a Guarguera con 125 kg d'explosivos a prencipios de 2008.[5]
Tamién ye important a operación policial en a que a Guardia Civil de trafico prenió lo 21 d'aviento de 1999 dos furgonetas a mán d'Alfama d'Aragón y Contamina con grans cantidaz d'explosivos ta emplegar en futuros atentatos d'ETA.
Referencias
- ↑ (en) Lista d'organizacions terroristas feita por a UE o 29 de mayo de 2006
- ↑ (en) Lista de organizacions terroristas foranas feita por os EUA
- ↑ (es) Amnistía Internacional condena la campaña de amenazas y homicidios deliberados de ETA contra representantes de los partidos políticos''.
- ↑ (es) Detenidas 34 personas en una amplia operación antiterrorista en Espanya y Francia
- ↑ (es) La Guardia Civil localiza dos zulos de ETA con explosivos en Lesaka y Sabiñanigo