Euskaldun

From Wikipedia
Jump to navigation Jump to search

Euskaldun u euskalduna ye una palabra que en vasco quier decir «vascofablant». Etimolochicament conchuga a parola "euskara" (luenga vasca) con u sufixo -dun ('que lo tien'). Asinas, qui "tien" a luenga vasca ye o vascofablant. En o País Vasco francés y en Navarra se fa servir tamién a variant eskualdun. En Sola (Zuberoa) amás emplegan o termin manex[1] ta designar a la resta d'habitants d'Iparralde o simplament t'a chent que no charra o dialecto sulentino, dixando o termin eskualdun no más ta ells.

A las personas que tienen o vasco como luenga mai se lis diz euskaldun zaharrak («vascofablants viellos», ye decir, nativos), mientres que as personas que l'han aprendito de grans son os euskaldun berriak («vascofablants nuevos»).

En sentito amplo, en vasco s'ha feito servir o termino "Euskaldun" ta referir-se a personas que son vascas, independientement de si dominan u no o vasco.[2] En iste caso puet emplegar-se tamién o termino euskal herritar (literalment, ciudadán vasco) u euskal herritarra.

Por contra, en vasco tamién existe o vocable erdaldun u erdeldun, que fa referencia a o fablant de qualsiquier atra luenga que no siga a vasca (erdara u erdera), a ormino y por motivos de proximidat, o castellán u o francés. Etimolochicament sería bella cosa parexita a «meya luenga» (d'erdi, «meyo»). O fablant d' erdara seria l' erdaldun. Iste termin, a esferencia d'o "barbaro" romano, no tien sentito despectivo.

Referencias[edit | edit source]