Río de la Fuent d'el Berro

Lo Río de la Fuent d'el Berro ye lo principal afluent de lo río Guadalaviar en la Sierra d'Albarrazín.

Naixe en la Fuent d'el Berro, situata en una prolongación de lo termin d'Albarrazín que bi ha entre los termins de Fridas y Calomart. Antes de la Fuent del Berro lo cauz de lo río reculle las auguas d'un ventallo de barrancos que bi ha a lo norte de la Muela de Fridas, en lo termin de Fridas d'Albarrazín.

Tien dos tramos on lo cauz ye entallato en lo substrato rocoso, la Foz d'el río Blanco y la Foz de Calomart.

La Foz d'el río Blanco correspone a lo curso alto de lo río, on trescruza por calsineras y dolomías churasicas. Lo paisache tien encara trazas naturals encara que i haiga una zute y bells molins (Molino de las Pisadas y Molino de abajo). Bi ha ripas u paretz quasi verticals, mallos aislatos y covachos, resaltando entre pins, sabinas y chinebros.

En Calomart lo río trescurza uns materials de chesos y archilas de facies Keuper y la val s'enampla. Bi ha una chicota huerta.

Manimenos quan lo río deixa dezaga ixos materials torna a encaixar-se de sopetón ta l'este, on bi ha materials calsinosos y forma la Foz de Calomart (Canyón de Calomarde en castellán). La carretera d'Albarrazín ba paralela a lo río. A lo piet de las ripas bi ha tarteras, que a vegatas fosilizan atras acumulacions de materials de ladera més antigos indicadors de periglacialismo en un clima que i heba en la zaguera glaciación u Würm.

En la marguin cucha de la val ye lo Rollo de Calomarde, un puent natural calsinoso bells metros por dencima de la carretera, y que puet corresponder con lo Despenyadero de Ruello mencionato en lo "libro de pasos, masadas, abrevaderos y dehesas" de l'archivo de la Comunidat d'Albarrazín y con materials escritos dende 1326.

Lo més intresant de la Foz de Calomart ye la cascada de Calomarde, un salto de 20 m. Lo río caye sobre una gorga rodeyato de tot por paretz de travertins que se formoron entre fa 10.000 y 7.000 anyatas. La formación de travertins encara ye activa, pero menos, porque predominan los procesos d'erosión. Quan se formó la mayor part de los travertins o clima lo río no yera tan rapido y lo clima yera més calido.

Pasa tamién a man de Royuela. En un prato embadinato temporalment por lo río bi ha una localidat de lo endemismo botanico Puccinellia pungens, que tamién se troba en la Laguna de Gallocanta.

Desemboca en lo río Guadalaviar en frent d'un puesto dito en la Edat Meya Entramasaguas y huei en castellán Entrambasaguas que vien de lo latín INTER AMBAS AQUAE y da ideya de forcallo de ríos.

Bibliografía

• (es) Jorge Hermosilla Pla (dir.):Los regadíos históricos del Alto Turia turolense. Generalitat Valenciana, Conselleria de Cultura, Educació i Esport, Universidad de Valencia, 2008. ISBN: 978-84-370-7316-3.