Electromagnetismo

Fluido ferroso que s'agrupa amán d'os polos d'un imán potent.

O eletromagnetismo ye a branca d'a fisica que estudeya os campos eletromagneticos, unos campos que exercen una fuerza sobre as particlas con carga electrica quan son afectatos por a presencia y o movimiento d'istas particlas.

O campo magnetico se produz por o movimiento d'as cargas electricas, como por eixemplo en o caso d'a corrient electrica. O campo magnetico produz una fuerza magnetica d'o mesmo tipo que la d'os imans.

Un campo magnetico quan varía produz un campo electrico: se tracta d'o fenomeno d'a inducción electromagnetica que s'emplega en o funcionamiento d'os cheneradors electricos, os motors electricos y os transformadors. D'una traza parellana, un campo electrico que cambeya chenera un campo magnetico. Como conseqüencia d'ista interdependencia entre os campos electricos y magneticos, tien sentito considerar os dos como una unica entidat, u campo eletromagnetico.

Ista unificación fue desembolicata por diferents fisicos en o curso d'o sieglo XIX y tenió lo suyo punto más important con os treballos de James Clerk Maxwell qui unificó los treballos anteriors en una sola teoría. Dimpués Oliver Heaviside simplificó y reformuló as equacions de Maxwell en a forma en que las conoixemos hue. Maxwell descubrió a naturaleza eletromagnetica d'a luz y, como conseqüencia, hue se considera que a luz ye una alteración oscilatoria que se propaga en o campo electromagnetico, como una onda electromagnetica. As diferents freqüencias d'oscilación dan orichen a las diferents formas de radiación electromagnetica d'o espectro electromagnetico, dende as ondas de radio a baixas freqüencias a los rayos gamma a las mas altas freqüencias, pasando por a luz visible a freqüencias intermeyas.

As implicacions teoricas d'o electromagnetismo levoron a Albert Einstein a desembolicar a teoría d'a relatividat especial en 1905. O descubrimiento d'a mecanica quantica obligó a formular una teoría quantica de l'electromagnetismo, que se completó en a decada de 1940 y conoixita como electrodinamica quantica.

Plantilla:Link GA Plantilla:Link FA an:Electromagnetismo