Animalia

Animals
Quantos animals.
Clasificación scientifica
Dominio: Eukaryota Reino: Animalia
Phyla
Subreino Parazoa     Porifera Subreino Agnotozoa       Placozoa       Orthonectida       Rhombozoa Subreino Eumetazoa   Radiata       Cnidaria       Ctenophora   Bilateria    Protostomia       Acoelomorpha       Platyhelminthes       Nemertina       Gastrotricha       Gnathostomulida       Micrognathozoa       Rotifera       Acanthocephala       Priapulida       Kinorhyncha       Loricifera       Entoprocta       Nematoda       Nematomorpha       Cycliophora       Mollusca       Sipuncula       Annelida       Tardigrada       Onychophora       Arthropoda       Phoronida       Ectoprocta       Brachiopoda    Deuterostomia       Echinodermata       Chaetognatha       Hemichordata       Chordata

Os animals u metazous (zentificament, o reino Animalia) son organismos bibos quimioorganoheterotrofos plurizelulars, lo menos en a suya forma adulta, con respirazión aerobia -son toz dependients de l'osicheno- e reproduzión sexual -con formazión de gametos haploides e zigotos diploides (zirclo bital haplo-diploide)-, que son diferenziables d'altros sers bibos heterotrofos per a suya sensibilidat e capazidat de mobimiento boluntario.

Anque que no ye de plen una caracteristica que agrupe a toz os animals, s'ha de tener en cuenta que muitos d'os organismos a dintro d'este grupo son os que han desembolicato més e millor a capazidat suya ta lo mobimiento. Bi ha animals estaticos como os poriferos (esponchas) que tienen nomás mobimiento ziliar a dintro d'os suyos conductos zentrals meyante zelulas que desplazan l'augua, sin que l'animal entiero pueda fer garra mobimiento propiament dito.

Con bien pocas eszepzions, as més embistables d'entre os propios Porifera, os animals tienen cuerpos bien diferenziatos con texitos deseparatos. Ixes encluyen, asinas, os musclos que se contrayen ta controlar o mobimiento, e un sistema nerbioso que nimbía e prozesa siñals. También gosan tener una cambra dichestiba interna, con una u dos ubriduras enta l'exterior. Ye la presenzia d'estas tres caracteristicas lo que fa que os animals que las tienen sigan cuaternatos como «metazous» u «eumetazous», estando ixe segundo termin lo més endicato mientres que lo primer no sería si que una expresión a sobén confusa ta designar a toz os animals de manera cheneral.

Toz os animals tienen zelulas eucariotas embolicatas d'una matriz extrazelular caracteristica composada de colacheno e glicoproteínas elasticas. Ixa matriz puet manifestar-se en dibersas formas, como per eixemplo quan ye calzificata en os güesos u closcas d'os moluscos.

Mientres o suyo desarrollo embrionario, forman de regular una carcasa relatibament flexible a dintro d'a cual as zelulas pueden mober-se de forma relatibament libre e reorganizar-se, fendo posibles altras estruturas posteriors més complexas. Tot ixo contrasta con altros organismos multizelulars como plantas e fongos, a on que as zelulas obtienen o suyo puesto dende os prenzipios meyante la formazión de parez zelulars que esperimentan una creiximiento progresibo.

Se veiga tamién

• Plantae
• Fungi
• Reino (biolochía)
• Zoolochía
• Zelula eucariota
• Eukarya